Ochu kʼuiripu tsípiti pakarasïndi

Noe, imeri familia ka animalicha, inchasptiksï arkarhu. Jeoba míkaspti puerta ka uénaspti janini. Xáni kʼéri ma janispti enga jamberi itsï uénapka tarhatani arkani. Itsï sánhani arhispti iámu ójchakurani echerini. Iámu kʼuiripu enga no ambakipka ka enga no inchapka arkarhu, uarhispti. Peru Noe ka imeri familia no ma ambeksï úkuarhinchaspti jimbokaksï arkarhu jarhaspka. ¿Úsïniri eranhaskani na engaksï xáni tsípini pʼikuarherapka jimbokaksï kurhajchaspka Jeobani?

Kʼéri janispti 40 jurhiatikua ka 40 chúri, ka enga iópkia, itsï sánhani arhispti kʼarhini. Tátsekua, arka niáraspti juátarhu ma pakajtsïkuni. Peru Noe ka imeri familia, nótkiksï úsïrendi uéntani arkarhu jimboka kánikua itsï jarhaspkateru.

Noe ka imeri familia, jukari ma uéxurhinksï pakaraspti arkarhu, astaka itsï k’arhipka. Jimajkani, Jeoba arhiaspti eskaksï úpiringia uéntani. ¡Echeri ísï xarharasïrendi enajki jimbanhiipi! Kánikuaksï tsípini pʼikuarheraspti jimboka Jeoba kuájchakuaspka, jimboksïsï kéjtsïtakua ma úkupti.

Jeoba kánikua jaiapanhintaspti kéjtsïtakuani ka aiakuaspti eska nóteru méni kʼamajkupiringa echerini xásï ma dilubiu jimbo. Komu seniali ma ima eiatsperakueri, Jeoba úspti eska xarharapiringa primeru arkoirisi. ¿Exeskiri ménisï arkoirisi ma?

Jeoba ístu arhispti Noeni ka imeri familiani eskaksï kánguarhiapiringa sapiichani ka eskaksï uinirapiringa echerini.