Jesúsi: ¿Tata Diosïski?

UÁNIKUA kʼuiripuechaksï uandasïndi, eska sánderu jukaparhakua ambe para kristianu ma jakajkuni, jindeeska Trinidadi, —enga jindeeka jakajkuni eska Taati, Uájpa ka espiritu santu, tanimu kʼuiripueskaksï, joperu májku Tata Diosï—. Joperu nájkiruka ísï, cardenal John O’Connor uandaspti eska Trinidadi “jindeeska kʼéri misteriu ma engachi no méni úpiringa kurhanguni”. ¿Andisï xáni úkua juka kurhanguni ambeeski Trinidadi?

Diksionariu ma ini ambe uandaspti: “Trinidadiri jorhenguarhikua no nani jukanharhisti Bibliarhu” (Diccionario crítico de Teología, ediciones Akal). Indeni ambe jimbo uánikua engaksï Trinidadini jakajkujka, jirinhantastiksï Bibliarhu bersikuluechani paraksï Trinidadiri ambe jorhentpini nájkirukaksï ima bersikuluecha no imani ambe arhikuekajka.

Ambe arhikuekasïni Juanu 1:1

Ma bersikulu engaksï mémindu úrajka jindeesti Juanu 1:1. Biblia Jimbanhi aiatsperakua tata Jesukristueri, ísï tradusirisïndi: “Ueenakuarhutki jarhasptia Uandakua, ka ima enga jindeeka Uandakua, [Tata] Diosï [griegu jimbo ton theón] jingoni jarhaspti, ka ima Uandakua jindeespti mismu [Tata] Diosï [griegu jimbo theós]”. I bersikulu tsimani uandakuechani úrasïndi griegu jimbo engaksï diosïri ambeeka. Orheta uandasïndi ton (theón) —enga ísïipiringa komu purépecha jimbo uandani ima diosï—, jimbochisï míteka eska imani Tata Diosïni arhikuekasïnga enga iámindu ambe újka úni. Joperu segundu theós uandasïndi eska no májkueniska. ¿Sési jaki? Ju je exeni.

Orheta ju je miántani eska Juanueri karakata, griegu jimbo karakuarispti ka uétarhisïndi kurhanguni na engaksï úrakuarhejka máru uandakuecha griegu jimbo. Acheeti ma enga sési mítekuka Biblieri ambe enga arhinhajka Archibald Thomas Robertson, uandasïndi eska enga nema uandapiringa ima o inde antede tsimani amberi uandani, arhikuekasïnga “eskaksï ima tsimarhani ambe májku ambeeska, eskaksï májkueniska ka eskaksï úpiringa mójtakuarhini”. Pori ejemplu úrasïndi Mateu 13:18 enga uandajka: “Eska echeri [griegu jimbo, ho agrós] jindeesti parhakpini [griegu jimbo ho kósmos]”. Jimbochi míteka eska ixú i parhakpini jindeeska ima echeri.

Joperu ¿ambe arhikuekasïni engaksï primeru uandajka ima ambe peru segundu nómbe, ísï eska na úkuarhijka Juanu 1:1 jingoni? Ima bersikuelueri ambe uandaparhini jorhentpiri James Allen Hew­ett ini ambe uandaspti: “I bersikulurhu primeru ambe ka segundu ambe nóksï májkuenisti nóksï májku ambeesti ka méntkuksï no úsïndi mójtakurhini”.

Pori ejemplu i jorhentpini úrasïndi 1 Juanu 1:5, enga uandajka eska “Diosï jindeeska eramarandikua” griegu jimbo uandakua “Diosï” ísï karakata jarhasti arhikuekaparhini ima Diosï. Joperu uandakua para “eramarandikua” (fos) no uandasïndi ima eramarandikua sino nomasi eramarandikua. ¿Ambe arhikuekasïni inde ambe? Ima jorhentpiri uandasïndi, úpiringachi uandani eska Tata Diosï jindeeska eramarandikua peruchi no úpiringa uandani eska eramarandikua jindeeska Tata Diosï. Máteru bersikuluecha engaksï sáno májkuenika jindeestiksï Juanu 4:24 enga uandajka (“Diosï espirituesti”) ka 1 Juanu 4:16 enga uandajka (“Diosï jindeesti uékperakua”). Ima bersikuluecha griegu jimbo uandanhasïndi ima Diosï joperu nóksï uandasïndi ima “espiritu” ka ima “uékperakua”. Ísï jimbo, nóchi úpiringa mójtakuani uandakuechani, nóksï úpirindi arhikuekani eska “espiritu jindeeska Tata Diosï” káni eska “uékperakua jindeeska Tata Diosï”.

¿Uandanhasï né enga jindeeka o na enga jásïika?

Uánikuecha engaksï griegueri ambe mítekuka ka engaksï Bibliani tradusirijka uandasïndiksï eska Juanu 1:1, no uandantaxaka né enga jindeeka “Uandakua” sino na enga jásïika. Librurhu Comentario al Nuevo Testamento, jorhentpiri William Barclay, uandantasïndi: “Eska enga Apostoli Juanu no karapka ima Tata Diosï, arhikuekaxapka Diosïni jásï. Ka tátsekua uandasïndi, eska Juanu no uandaxapti [...] eska tata Jesukristu májkueniska eska Tata Diosï, sino eska tata Jesukristu sáno májkueni jásïiska eska Tata Diosï. Sáno májkueni Jason David BeDuhn enga relijioniri ambe jorhentpijka uandasïndi: “Ísï eska na karakata jaka Juanu 1:1 no uandasïni ho theós sino theós, griegu uandaricha engaksï arhintapiringa ísïksï kurhangupiringa eska “diosï ma”. [...] Griegu jimbo theós ka ho theós ménderuenistiksï májkueni eska ‘diosï ma’ na no májkueni ambeeka eska ‘ima Tata Diosï’”. Ka ístu uandasïndi: “Juanu 1:1, Uandakua no jindeesti ima Tata Diosï enga iámindu ambe újka úni sino jindeesti diosï ma o diosïni jásï ma”. Biblieri traduktori enga Juan Mateos arhinhajka ka máteru jorhentpiri enga arhinhajka Juan Barreto, karasptiksï libruni enga arhinheenga Juan. Texto y Comentario, ka jimaksï uandaspti i ambe Juanu 1:​1, 2: “Uandakua para griegu jimbo ‘Diosï’ tanimu xanhari jarhasti i [bersikuluecharhu] primeru ka terseru xanharu ísïksï karakata jarhasti ima (Tata Diosï); peru segundu xanharu nómbe, arhikuekaparini (Diosï ma o diosïni jásï ma)”. Máteru libru enga arhinhajka Análisis Gramatical del Griego del Nuevo Testamento, jorhentpiri katoliku ma enga arhinhajka Max Zerwick, uandasïndi: “Enga bersikulu uandajka ‘uandakua diosïspti’ peru nómbe uandakua, ima Tata Diosïspti uandantaxati na enga jásïika Uandakua”. Ka máteru Libru enga arhinhajka Clave Lingüística del Nuevo Testamento Griego sáno májkueni ambe uandantasïndi.

Jimajkani ¿jindee kʼéri misteriu ma míteni neeski Tata Diosï? Tata Jesukristu no ísï eratsesïrendi, jimboka kómarhikuarhu ma klaru uandaspka eska ima ka imeeri Taati jémba tsimani kʼuiripueskaksï. Ísï uandaspti: “Ini ambeksïsï jatsiti para úni paraksï jatsini tsípikua para méntkisï, eskaksïni míteaka tʼungini, engari tʼujku jindeeka Tata Diosï engari sési jimboeka, ka ístuksï míteni imani engari tʼu axaka, Jesukristuni”(Juanu 17:⁠3). Janhanharhinchi jauaka Tata Jesukristuni engachi jiókuarhiska ambe enga ima uandaka imeeri mismu ambe Bibliarhu: eska ima jindeeska Tata Diosïri Uájpa ka eska sáno májkueni jásïiska eska Tata Diosï. Ka ístuchi kʼéri ambe arhini jauaka Tata Diosï Jeobani enga “imajku jindeeka Tata Diosï enga sési jimboeka”.