¿Meru jarhaski Noambakiti?
Ambe enga Biblia uandajka
Jo, Noambakiti meru jarhasti, espiritu máesti enga no sési jásï úkuarhika ka enga nóteru uékapkia kurhajchani Tata Diosïni. Ima jindeesti “i parhakpini anapu juramuti” (Juanu 14:30; Efesu 6:11, 12). Biblia úraasïndi máru nombrichani para xarhatani na enga jásïika Noambakiti. Arhiksï jindeesti máru:
Satanasi, enga arhikuekajka “Tájpanharhikpeti” (Job 1:6).
Noambakiti, enga arhikuekajka “Ima enga chkuanderakua ambe jauatatspejka” (Jaŋaskuecha [Apocalipsis] 12:9).
Akuitsi, enga Bibliarhu májkueni ambe arhikuekajka eska támisï jánhastpiti (2 Korintu 11:3).
Engajtsïni tsʼéjkujka (Mateu 4:3).
Chkuanderari (Juanu 8:44).
No kʼuiripu máesti ni ambe ma enga no sési jásïini ambeni arhikuekajka
Máruksï eratsesïndi eska Noambakiti jindeeska no sési jásï ambe engachi incharinisï pájka iáminduecha, asta Tata Diosï. Biblia uandasïndi eskaksï uandontskuarhespka Tata Diosï Noambakiti jingoni. Peru Tata Diosï perfektuesti ka pímbinhasïni iámindu ambe jimbo. Jiájkani, ¿néna úpirini ménisï no sési jásï ambe úni? (Deuteronomio 32:4; Job 2:1-6.) Ka ístu Biblia uandasïndi eska Noambakiti tsʼéjkuspka Jesúsini, enga no méni pekadu úpka (Mateu 4:8-10; 1 Juanu 3:5). Ísï jimbo, Biblia jorhentpisïndi eska Satanasi meru jarhaska ka eska no jindeeska ambe ma enga no sési jásï ambeni arhikuekajka.
Uánikua kʼuiripuechaksï no jakajkusïndi eska Noambakiti meru jarhaska. ¿I ambejtsïni ísku pakatapirini? Nómbe, jimboka Biblia uandasïnga eska Satanasi támu jánhastpisïnga paraka ísï úkuarhiaka ambe ma eska ima na uékajka (2 Tesalonika 2:9, 10). Ka ma ambe enga sési uérakujka jindeesti eskaksï kʼuiripuecha jakajkuaka eska ima no jarhaska (2 Korintu 4:4).
Ambe enga no ísïika Noambakitiri ambe
No ísïisti: Eska Lusiferi jindeeska máteru Noambakitiri nombri.
Ísïisti: Máru Bibliecha eskaksï uandakuani enga ebreu jimbo jaka ísï peentaka komueska “Lusiferi” arhikuekasïndi “meremeresï” (Isaías 14:12). I uandakua profesiarhu ma úrakuarhesïndi, ka ambe enga arhijka antesi ka tátsekua xarhatasïndi eska Babilonia anapu reichani arhikuekaasïnga ka Tata Diosï úpirindi eskaksï kʼuratseni pakarapiringa jimbokaksï kʼéramakuarhisïreenga (Isaías 14:4, 13-20). Ini profesiarhu engaksï Babilonia anapu reicha kʼamajkunhapka, teresmarhuparinksï arhisïndi “meremeresï”.
No ísïisti: Eska Noambakiti ánchikuarhisïnga para Tata Diosï.
Ísïisti: Noambakiti Tata Diosïri ikiatspiti máesti ka no imeeri marhuari ma. Satanasi ístu ikiakuasïndi imeechani engaksï Tata Diosïni marhuakujka, ka jimbosï no sési kaajti ka chkuanderakua ambe jauatakuani (1 Pedru 5:8; Jaŋaskuecha 12:10).