Jakobueri familia niáraspti ísï mítikateni komueska israelitecha engaksï Ejiptu japka. Engaksï Jakobu ka Jose uarhipkia, jimbanhi faraoni ma niáraspti juramuni. I juramuti chésïrendi jimbokaksï israelitecha sánderu uinhapiti úkuarhixapka eska ejipsiuecha. Jimbosï jántspiri uaapti. Afuersa úraasïrendi tabiki ka uinhamu ánchitaani kampurhu. Nájkirukaksï ejipsiuecha afuersa ánchitaauenga israelitechani, íksï sánhani arhixapti uánini. Ka komu faraoni no tsitienga ini ambe, juramuspti eskaksï uándikuapiringa iámindu tataka sapirhatichani engaksï andajpenupiringa, peru nanakaechani nómbe. ¿Eranhaskasïniri na engaksï xáni chéni japka israelitecha?

Uarhiiti israelita ma enga Jokébedi arhinhaenga, sési jásï ma charhakuni kánguarhispti. Para kuájchakuni, tsïkiateni jásïrhu ma jatsiraspti ka jimesï jískaspti enga uitsakua jatamipka ríu Nilurhu. Míriami, charhakueri ermana, jima no iauani pakaraspti para exeni ambe úkuarhipirini.

Faraoniri uájpa, ríurhu niraspti jikuani ka exespti tsïkiatani. Exespti charhakuni ma enga uerani japka ka pʼamojkuspti. Míriami kurhamarhispti: “¿Uékasïniri eskani niuaka uarhiitini ma jirinhani parakini kuidaricheni charhakuni?”. Ima arhispti eska jo ka Míriami amambani niraspti pʼirani. Faraoniri uájpa arhispti Jokébedini: “Pá ini charhakuni, kuidaricherini ka meiamuakakini”.

Enga charhaku kʼépkia, Jokébedi pákuntaspti faraoniri uájpani. Moisesi arhinhataraspti ka ísï kʼuiriperaspti enajki imeripi. Moisesi ísï kʼuiripespti eska prínsipe ma ka úpirindi jatsini iámindu ambe enga uékapiringa. Peru no méni mirikurhispti Jeobani. Moisesi mítispti eska ima, israelita máespka ka no ejipsiu ma, jimbosï erakupti Jeobani marhuakuni.

Enga 40 jatiripkia, Moisesi uékaspti jarhuataani israelitechani. Ma jurhiatikua, exespti eska ejipsiu ma ataxapka jántspirini ma enga israelitepka. Indeni ambe exeparini, Moisesi xáni uinhamu ataspti ejipsiuni enga jamberi uándikupka ka kutsarirhu jískaspti kuerpuni. Enga faraoni mítipka ini ambe, uékaspti uándikuni Moisesini, peru ima sïpakuarhispti ka Madiani niraspti. Jini, Jeoba kuidarispti.

Moisesi 40 uéxurhini irekaspti Madiani. Tembuchaspti ka kaaspti sapiichani. Ma jurhiani, karichichani kuidariuaxapti Sinairi juátarhu ka exespti ambe ma enga ísku pakatapka. Anhatapu ma tixaraxapti, ¡peru no kurhisïrendi! Enga Moisesi nípka exeni ambe úkuarhixapi, kurhaaspti bosi ma anhatapurhu uératini enga arhienga: “¡Moisesi! Ásteru andarheria anhatapuni. Pʼiua kuarhachichani, jimbokari pímbinhasï echerirhu jarhaska”. Jeobaespti enga ánjilini ma úrani japka para Moisesini uandajpani.

Moisesi chéspti, jimbosï ónharhipti. Ima bosi arhispti: “Exeska eskaksï israelitecha no sési nitamakuarhixaka. Petaatantauaka Ejiptu uératini ka ambakiti echerirhu ma páuaka. Ka uékasïnga eskari t’u petaatantaaka juchiti iretani Ejiptu”. ¿Exesïniri eska i ambe ísku pakatapka Moisesini?

Moisesi kurhamarhispti: “¿Ambe arhiaua engaksï uékaska mítini nérini axaski?”. Tata Diosï mókukuntaspti: “Arhia eskakini Jeoba axaska, Abraaniri Tata Diosï, Isaakiri ka Jakobueri”. Moisesi arhispti: “¿Ka engarini ireta no kasu úchiakia?”. Jimajkani Jeoba milagru ma úspti para xarhatakuni eska jarhuatapiringa. Arhispti eska kʼuanikupiringa imeri bastonini, enga ísï úpka, ¡bastoni akuitsi ma úkuarhintaspti! Tátsekua, Moisesi chʼétirhisï jupikaspti akuitsini ka i ménderu bastoni ma úkuarhintaspti. Jimajkani Jeoba arhispti: “Jiáni engari uáka ini milagruni, xarhataakari eskakini jí axaska”.

Peru Moisesi uandaspti: “Ji no úsïnga sési uandani kʼuiripuni japarini”. Jeoba eiakuspti: “Jíkini arhiaka amberi uandaa ka ístuni axaaka chíti ermanu Aaronini parakini jarhuatani”. Enga Moisesi mítipkia eska Jeoba jarhuatapiringa, níntaspti Ejiptu ka páspti témbani ka uájpechani.

Israelitechaksï jántspirispti ka ejipsiuechaksï uinhamu ánchitaasïrendi. Jeoba, Moisesini ka Aaronini axaspti paraksï arhini faraonini: “Jurajku juchiti iretani pararini kómarhini desierturhu”. Peru faraoni jukari kʼéramakuarhisïrendi ka arhiaspti: “Ambe uéjki uandani Jeoba, no jurajkuauaka israelitechani”. Tátsekua, faraoni sánderu uinhamu ánchitaaspti. Jimbosï Jeoba uékapti xarhatakuni néspi ima. ¿Ambe úspi? Diesi plaguechani axaspti Ejiptu. Jeoba arhispti Moisesini: “Faraonirini no kasu úchesïndi. Pauani tsípku, ríu Nilurhisï jámani jauati. Ní ka arhi eska iámu ríu iurhiri úkuarhintaaka, jimboka no jurajkuska eska juchiti ireta uéakuntaaka”. Moisesi kurhajchaspti Jeobani ka niraspti faraonini exeni. Faraoni exespti eska Aaroni inchamaspka bastonini ríu Nilurhu ka itsï iurhiri úkuarhintaspti. Ríu uénaspti no sési jájkundeni, nóksï úsïrendi itsïmani ka kuruchechaksï uarhimespti. Peru faraoni útasï no uékasïrendi eskaksï israelitecha nipiringa desierturhu.

Siete jurhiatikua tátsekua, Jeoba ménderu axaspti Moisesini para arhini faraonini: “Engari no jurajkuska juchiti iretani, iápuru ísïksï jauati ranecha Ejiptu”. Ka jimboka faraoni no kasu úspka, Aaroni tarhataspti imeri bastonini ka uénasptiksï uánikua ranecha jámani iámu Ejiptu. Kʼumanchikuecharhisïksï jámasïrendi, kamecharhisï ka tʼirekuarhisï... ¡Iápurisïksï jámasïrendi! Faraoni arhispti Moisesini: “Kurhaku Jeobani eska anhaxustaaka ini plagani. Tátsekua, jurajkuauaka israelitechani”. Jimbosï Jeoba anhaxustapti plagani ka ejipsiuechaksï uánikua rana uarhirichani tánantaaspti. Ka uénaspti iápurisï no sési jájkundeni, peru faraoni ménderu no jurajkuaspti israelitechani.

Tátsekua, Jeoba arhispti Moisesini: “Eska Aaroni uántskaaka imeri bastoni jingoni. Enga ísï uáka, tʼupuri, kupu sapirhati úkuarhintaati”. Ka ísï úkuarhispti, uánikua kupu sapirhatichaksï uénaspti jámani engaksï atajpenga. Máru ejipsiuechaksï arhispti faraonini: “¡I plaga Tata Diosïni jimboesti!”. Peru faraoni siempri no jurajkuaspti israelitechani.

Moisesi ka Aaroni, nirasptiksï faraonini exeni paraksï arhini ambe enga Tata Diosï arhiapka: “Engari no jurajkuska juchiti iretani, tábanuechani axauaka paisirhu”. Tábanuechaksï kʼérati tíndichesti engaksï atajpijka. Uánikua i jarhajti tíndicha, inchakuasptiksï ejipsiuechani, rikuechani ka pobrichani. Iámu ireta jimboksï jarhaspti tábanuecha. Peru ireta Goséni jimbo, nani engaksï israelitecha irekapka no ma jarhaspti. I kuarta plaga ka máteruecha engaksï tátsekua japka, soluksï ejipsiuechani no sési úkuaspti, israelitechani nómbe. Faraoni arhispti Moisesini: “Kurhaku Jeobani eska kénditauaka tíndichani ka tátsekua chíti ireta uáti nirani”. Peru enga Jeoba kénditaapkia tíndichani, faraoni no úspti ambe enga uandapka. ¿Exesïniri eska ma jurhiani faraoni mójtakurhipiringa?

Tátsekua, Jeoba uandaspti: “Enga faraoni no jurajkuska juchiti iretani, ejipsiuecheri animalichaksï pʼamenchaati ka uarhini”. Pauandikua, ísï úkuarhispti eska Jeoba na uandapka, peru israelitecheri animalichaksï no ma ambe úkuarhinchaspti. Nájkiruka i ambe úkuarhipka, faraoni no mójtakurhispti.

Jeoba ménderu juramukuspti Moisesini eska nipiringa faraonini exeni ka eska kʼuaninchepiringa tʼupuri jápu. I tʼupuri jápu, tʼupuriini jásï úkuarhintaspti, uinintaspti iámu Ejiptu, ka úspti eskaksï ejipsiuecha ka animalicha pixirhekuarhepiringa ka eskaksï kánikua pʼamerapiringa. Peru ménderu faraoni arhiaspti israelitechani eska no jurajkuapiringa.

Jeoba ménderu axaspti Moisesini para arhini faraonini: “¿Útasïri no uékasïni jurajkuni juchiti iretani? Jimajkani pauani uáka eska xanuauaka”. Pauandikua, Jeoba úspti eska xanuapiringa, piritani ka chpiri uekorhini. I jindespti sánderu no sési jásï janikua enga Ejiptu úkuarhipka. Kʼamajkuaspti anhatapuechani ka kampuechani, peru ireta Goséni jimbo nómbe. Jimajkani faraoni uandaspti: “Kurhaku Jeobani eska anhaxustaaka ini ambe ka jurajkuakaksïni. Peru enga xanuata ka janikua anhaxurhipka, faraoni no úspti ambe enga uandapka.

Jimajkani Moisesi uandaspti: “Iásï, chochuechaksï iámu plantechani auauati engaksï pakaraka janikuarhu”. Uánikua chochuechaksï arhaspti ambe enga pakarapka anhatapuecharhu ka kampuecharhu. Tátsekua, faraoni niáraspti arhini Moisesini: “Kurhaku Jeobani eska kénditauaka chochuechani”. Enga Jeoba ísï úpkia, faraoni ménderu no úspti ambe enga uandapka.

Tátsekua, Jeoba arhispti Moisesini: “Tarhata jájkini auandarhu ísï”. Ka jirejiresï pápjandispti. Ejipsiuechaksï tanimu jurhiatikua no ma ambe úspti exeni. Jimajkusï japti lusi engaksï israelitecha irekapka.

Faraoni arhispti Moisesini: “Tʼu ka chíti ireta uákajtsï nirani, peru chári animalichaksï ixú pakaraati”. Moisesi mókukuspti: “Jatsiskachi para paani animalichani para kéjtsïtakuani juchari Tata Diosïni”. Faraoni kánikua ikiaspti ka uinhachakuspti Moisesini: “¡Kéndikuchirini! Engakini ménderu exeska, uándikuakakini”.

Moisesi aiakuspti faraonini eska nóteru nipiringuia exeni. Peru antesi de níntani arhispti: “Terojkani chúri, iámindu ejipsiuecheri orheta uájpa uarhiati, desde faraoniri uájpa asta jántspiricheri”.

Jeoba arhiaspti israelitechani: “Preparari je tʼirekua espesiali ma. Uándiku je karichi o kabrani ma enga ma uéxurhini jatirika, ka atamuta je imeri iurhiri chári puertarhu. Uiripa je kʼuiripitani ka kurhinda jingoni a je enga no xarhipikua jukaka. Listu ja je parajtsï uéakuntani, xukuparhatini ka kuarhachichani jukarini. I chúrikuaksïni salbariuaka”. ¿Eranhaskasïniri na engaksï xáni tsípini japka israelitecha?

Terojkani chúri, Jeobaeri ánjili nitamaspti iámu Ejiptu anapu kʼumanchikuecharhu. Puertecharhu enga no atamutakata japka iurhiri, orheta uájpa uarhispti. Peru kʼumanchikuecharhu enga atamutakata japka iurhiri, ánjili no ma ambe úkuasti uájpechani. Iámu Ejiptu anapu familiecha, riku ka pobriicha uarhirasptiksï uájpani ma. Peru no ma israelita uájpa uarhispti.

Orheta uájpa faraoniri ístu uarhispti. Faraoni nóteru aguantarisptia ka arhispti Moisesi ka Aaronini: “¡Uéakunta je! ¡Ní je ka kómarhi je chári Tata Diosïni! ¡Pákuarhia je animalichani ka uéakunta je!”.

Ima chúrikua, luna uinirixapti. Israelitechaksï familiecha ka tribuecha jimbo uéakuntaspti Ejiptu. Jarhasptiksï 600,000 achaticha ka ístu grupu ma uarhiiticheri ka sapiicheri. Uánikua engaksï no israelitepka, imecha jingonksï niraspti para Jeobani kʼéri ambe arhini. ¡Iásï kʼóruksï israelitecha libresptia!

Paraksï miáni eska Jeobasï salbariuapka, jatsipirindiksï para mándani uéxurhini ima mísmu tʼirekua úntani enga espesialipka. Ka Paskuaksï arhiraspti.

Jiáni enga faraoni kurhaapka eskaksï israelitecha uéakuntaspkia Ejiptu, arrepentirikuarhispti enga ísï jurajkuapka. Juramukuaspti imeri soldaduechani: “Listu jatsia je iámindu juchiti karretechani uarhiperakueri ka ju je andanguani. Nochi jatsispka para jurajkuani”. Jimajkani, faraoni ka imeri soldaduechaksï niraspti andanguani israelitechani.

Jeoba orhekupaxapti imeri iretani nubi ma jimbo jurhiakua ka chpiri ma jimbo chúrikua. Mari Charhapitirhu paaspti ka arhiaspti eskaksï jima akamparipiringa.

Tátsekua, israelitechaksï exespti eska faraoni ka imeri ejersitu jurhaxapka andanguani. Peru nóksï úspti sïpakuarhini, jimbokaksï entre mari ka Ejiptueri ejersitu pakaraspka. Uénasptiksï uinhachani ka arhini Moisesini: “¡Uarhiskachia! ¿Andisïjtsïni petanta Ejiptu?”. Peru Moisesi arhiaspti: “Asï ché je. Erokuarhi je ka exe je na engajtsïni salbariuaka Jeoba”. ¿No ísïski eska Moisesi mintsikasïrenga Jeobani?

Tátsekua, Jeoba arhiaspti israelitechani eskaksï tarhatantapiringa iámindu ambe. Ima chúrikua, Jeoba manataspti nubeni ka terojkani péraspti entre ejipsiuecha ka israelitecha. Ejipsiuecheri ladu jimbo, pápjandispti, peru israelitecheri ladu jimbo, jarhaspti lusi.

Tátsekua, Jeoba arhispti Moisesini eska mari Charhapitirhisï eraatarapiringa imeri jájkini. Jimajkani, Jeoba úspti eska erantskutapiringa tarhiani. Ka mari tsimapuru arhukurhispti jimbokaksï tsimani parediini járhaticha úkuarhispka itsï jingoni ka xanharu ma úkuarhispti enga kʼarhindepka paraksï miioni israelitecha jimesï parhikuni.

Faraoniri ejersitu úraspti imani xanharuni para nirani andanguani. Peru Jeoba úspti eskaksï ejipsiuecha no jánhaskapiringa ambe úni, jimbokaksï karretecha uéndurhaaxapka ruedechani. Ka soldaduechaksï uinhachaspti: “¡Ju je sïpakuarhini! Jeoba uarhipexati imeri ireta jimbo”.

Jeoba arhispti Moisesini: “Marirhisï eraatara chíti jájkini”. Ka itsï ma repentku ójchakuraspti Ejiptueri ejersituni. Ka faraoni ka iámindu imeri soldaduechaksï uarhispti. No ma tsípiti pakaraspti.

Máteru ladu marirhu, iáminduksï kʼéri ambe arhispti Tata Diosïni pirekuparini: “Pirekuaka Jeobani, jimboka úska eska kʼéri ambe arhinhaaka. Marirhu kʼuanimasti kabaiuni ka imani enga jatapani japka”. Enga ireta pireni japka, uarhiitichaksï uarhaxapti ka kústaani panderetechani. Iáminduksï kánikua tsípixapti jimbokaksï iásï kʼóru librespkia.

Tsimani kutsï tátsekisï engaksï israelitecha uéakuntapkia Ejiptu, niárasptiksï Sinairi juátarhu ka jimaksï akamparispti. Jeoba, kurhakuspti Moisesini eska karhamapiringa juátarhu ka arhispti: “Jí salbariuaska israelitechani. Engajtsïni kurhajchaska ka kumpliriuanksï juchiti leichani, juchiti ireta espesialiuati”. Enga Moisesi kétsintapka juátarhu, eianguaspti israelitechani ambe enga uandapka Jeoba. ¿Ambeksï mókuntaspi? Uandasptiksï: “Uákachi iámu ambe engajtsïni Jeoba arhiaka”.

Tátsekua, Moisesi ménderu karhamaspti juátarhu. Ka Jeoba arhispti: “Tanimu jurhiatikua jimbo, uandaxeaka ireta jingoni. Eiangua eskaksï no karhamaaka juáta Sinai jimbo”. Moisesi kétsimantaspti ka arhiaspti israelitechani eskaksï listu japiringa para kurhajchani Jeobani.

Tanimu jurhiatikua jimbo, ireta exespti eska piritaxapka ka eska nubi turhipiti ma jarhaspka juátarhu. Ístuksï kurhaaspti sïuangua ma ka na enga uinhamu charanchenga. Tátsekua, Jeoba chpiri jimbo kétsispti juátarhu. Israelitechaksï kánikua chéxapti. Iámu juátarhu uinispti sïraata ka uinhamu jenchexapti. Ka sánhani arhixapti uinhamu kurhaakuarhini sïuangua. Jimajkani Jeoba uandaspti: “Ji jindeska Jeoba. Nójtsï jatsiska para máteru diosïchani kómarhiani”.

Moisesi ménderu karhamaspti juátarhu ka Jeoba íntsaspti leichani para ireta. Imani leicharhu arhiaspti nénaksï kómarhipirini ka nénaksï jatsispi para jámani. Moisesi karaaspti ka tátsekua arhikuntaspti iretani. Imaksï aiakuspti: “Uákachi iámindu ambe engajtsïni Jeoba kurhachijka”. Jo, aiatsperakua maksï úkuspti Jeobani, peru ¿kumpliripirinksï?

Jeoba arhispti Moisesini: “Karhama ixú juátarhu engani ji jaka. Tsakapu kórhaticharhu karaauaka juchiti leichani ka íntsauakakini”. Moisesi karhamaspti ka 40 jurhiatikua ka 40 chúrikua pakaraspti juátarhu. Enga jini japka, Jeoba tsakapu kórhaticharhu máru karaaspti Diesi Mandamientuechani ka Moisesini íntsaaspti.

No ióni jimbo, israelitechaksï uénaspti eratsini eska Moisesi jandiajku jurajkuaspkia. Jimboksïsï arhipti Aaronini: “¡Jucha uékasïnga nemani engajtsïni orhechipaaka. Úchejtsïni diosïni ma!”. Aaroni arhiaspti: “Juáchejtsïni je chári oruni”. Jimajkani, Aaroni uénaspti echerantani oruni para beserrueni jásï ma úni. Ka kʼuiripu uandaspti: “¡I beserru jindesti juchari diosï engajtsïni Ejiptu uératini petantaka!”. Kʼuínchikuaksï ma úspti ka uénasptiksï kómarhini beserru oruerini. ¿No sési jarhaspi inde ambe? Jo, jimboka ireta aiakuspka Jeobani eska imantku kómarhipiringa. Peruksï no kumplirixapti ambe engaksï uandapka.

Jeoba exespti ambe enga úkuarhini japka ka arhispti Moisesini: “Ní kétsintani, jimbokajtsïni no kurhajchaxaka. Diosï no jurhimbitinksï ma kómarhixati”. Ka Moisesi kétsintaspti tsimani tsakapu kórhaticha jingoni.

Enga Moisesi andarhentani japkia iretani, kurhaaspti kʼuiripuni pireni jarhani. Ka tátsekua, exeaspti israelitechani uarhani jarhanksï ka beserrunksï kómarhini jarhani. Moisesi xáni ikiaspti enga kʼuanikuapka tsimani tsakapu kórhatichani ka íksï kʼepekurhispti. Ka jirejiresï xerentaspti beserruni ka arhispti Aaronini: “¿Nénaksïni konbenseriski parari ini xáni no sési jásï ambe úni?”. Aaroni mókuntaspti: “Asï ikia, tʼuri sési mítiska ini iretani, diosïnksï ma uékasïrendi jimbosïni chpirirhu kʼuanijpapka oruni ka i beserru uérasti”. Aaroni no jatsispti para ini ambe úni. Moisesi ménderu karharaspti juátarhu ka kurhakuspti Jeobani eska puákuntapiringa iretani.

Jeoba puákuantaspti imani israelitechani engaksï uékaenga kurhajchani. ¿No ísïski eska kánikua jukaparhakuespka eskaksï israelitecha ístu kasu úkupiringa Moisesini?

Enga Moisesi Sinairi juátarhu japka, Jeoba arhispti eska tabernakulu ma úpiringa. Tabernakulu kʼumanchikua espesiali máepirindi nani engaksï israelitecha úpiringa Tata Diosïni kʼéri ambe arhini. Ka ístuksï úpirindi páni nani engaksï nipiringa.

Jeoba uandaspti: “Kurhaku iretani eska íntspiaka na enga xáni uáka para únhani tabernakulu”. Israelitechaksï íntspespti oru, plata, kobri, sési járhati tsakapu ka joiechani. Ístuksï íntspespti linu, lana, animalicheri sïkuiri ka uánikua máteru ambe. Xáni uánikua ambeksï páspti enga Moisesi jatsipka para arhiani: “Ásteru ambe ma juáia je, jukari kánistia”.

Uánikua achaticha ka uarhiiticha engaksï jorhenapka úni ambe ma, jarhuajpisptiksï úni tabernakuluni. Jeoba jánhastaaspti néna úni ambe ma para ánchikuarhita sési uérakuani. Máruksï piruakua pʼarhakusïrendi ka sïrikuni. Máteruksï oru jingoni ánchikuarhisïrendi, tsakapu akomodarini o chkari ambarheni.

Israelitechaksï ísï úspti tabernakuluni eska Jeoba na arhiapka. Sési jásï maksï kortina úspti para tsimani kuartuecha jimbo arhunhani tabernakuluni enga jindepka: Santu ka Santisimu. Santisimurhu, arka pakatperakueri jarhaspti enga oru ka chkari akasia jimbo úkata japka. Santurhu, kandelabru ma orueri jarhaspti, mesa ma ka altari ma para insiensu kurhirani. Patiurhu, pila ma jarhaspti kobreri ka kʼéri ma altari. Engaksï israelitecha exenga arka pakatperakuerini, miántasïrendiksï eskaksï aiakuspka kurhajchani Jeobani. ¿Mítiskiri ambeski pakatperakua ma? Aiatsperakua espesiali máesti.

Jeoba, Aaronini ka imeri uájpechani erakuaspti paraksï saserdotiini ka paraksï tabernakulurhu ánchikuarhini. Jatsisptiksï para kuidarini ka jima uératini úkuani kéjtsïtakuechani Jeobani. Solu kʼéri saserdoti Aaroni, jatsispti sésikua para inchani Santisimurhu. Mándani uéxurhini inchasïrendi para kéjtsïtakua ma úni imeri pekaduecha jimbo, imeri familieri ka iámindu israelitecheri pekaduecha jimbo.

Israelitechaksï ma uéxurhini tátsekua kʼamaraspti tabernakuluni engaksï uéakuntapkia Ejiptu. Iásï kʼóruksï jatsisptia lugari ma para Jeobani kʼéri ambe arhini.

Jeoba xarhataspti eska jeiapanhintaspka tabernakuluni ka nubi ma péraspti jima karhakua. Enga nubi no manakuarhienga tabernakulurhu, israelitechaksï jima pakarasïrendi. Peru enga nubi manakuarhienga, mítesïrendiksï eskaksï jatsispka para mótsini. Xerentasïrendiksï tabernakuluni ka nubenksï chúxapasïrendi.

Israelitechaksï kéndikuspti Sinairi juátarhu ka desiertu Paráni jimbo ísïksï biajarispti asta Kadési jamberi. Jima, Jeoba arhispti Moisesini: “Axaa 12 achatichani, máechakua mándani tribueri, paraksï nirani espiarini Kanaani, echerini engani israelitechani íntskuauaka”. Jimbosï Moisesi erakuapti 12 achatichani ka arhiaspti: “Ní je Kanaani ka exe je sini echeri ambakiski para ikarani. Ka ístu exe je abersieka kʼuiripu uinhapika o nómbe ka sinksï sïkuiriri kʼumanchikuecharhu irekaski o kʼéri iretecha jimbo”. Ima 12 espiechaksï niraspti Kanaani ka tsimani espiechaksï jindespti Josue ka Kalebi.

Espiechaksï 40 jurhiatikua jimbo kʼuanhatsintaspti. Ka juásptiksï jigusï, granada ka ubasïchani ka uandasptiksï: “Kanaani ambakiti echeri máesti, peru kʼuiripu kánikua uinhapisti ka iretechaksï kʼérati barda jukaasti”. Ka Kalebi uandaspti: “¡Uákachi andaani! Ju je”. ¿Andisï ísï uandapi Kalebi? Jimbokaksï Kalebi ka Josue mintsikasïrenga Jeobani. Peru máteru 10 espiechaksï uandaspti: “Nochi niuaka. Jima anapu kʼuiripuechaksï kánikua kʼérasti, ísïstiksï komueska jiganticha. Imechani japarini juchachi ísïska komueska chochuecha”.

Israelitechaksï chéspti, uénasptiksï kejarikuarhini ka arhijperanksï: “Ju je erakuni máteru nemani parajtsïni orhechipani ka kʼuanhatsintakachi Ejiptu. ¿Andichisï jatsipirini para Kanaani nirani? ¿Parajtsïni uándikuni?”. Josue ka Kalebi uandasptiksï: “Sánderu sésisti Jeobani kurhajchani. Imajtsïni kuájchakuati. Asï ché je”. Peru israelitechaksï no kasu úkuaspti, sánderu sési, uékasïrendiksï uándikuni Josueni ka Kalebini.

¿Ka ambe úspi Jeoba? Arhispti Moisesini: “Uánikua ambe úskia israelitecha jimbo..., peru imajtsïni útasï no kurhajchasïndi. Ísï jimbo, 40 uéxurhini jurajkuauaka ini desierturhu astakaksï uarhiaka. Uájpechajkuksïsï irekaati imani echerirhu engani aiakuaka ka Josue ka Kalebi”.

Enga tiempu nitamapkia ka israelitechaksï útasï desierturhu jarhani, Kore, Datáni, Abirami ka máteru 250 achaticha, nóteruksï kurhajchasptia Moisesini. Arhisptiksï: “¡Kuatajkuskajtsïnia! ¿Andirisï t’u jatsi para jindeni juchari orhejtsïkuti? ¿Ka andisï Aaroni jatsi para jindeni kʼéri saserdoti? Jeoba no tʼunguini ka Aaroni jingontkusï jati, sino ístu iámindu juchantsïni jingoni”. Peru Jeoba no tsitispti eskaksï indeni ambe uandapiringa. Ísï pʼikuarheraspti enajkiksï imani nóteru uékenia kurhajchani.

Moisesi arhispti Koreni ka imeri chúxapatichani: “Pauani, ju je tabernakulurhu ka insiensu jatarini juá je chári insiensu jatakuechani. Jeobajtsïni exeraati néni erakuski ima”.

Pauandikua, Kore ka 250 achatichaksï niraspti Moisesi jingoni tánguarhini tabernakulurhu. Jimaksï uénaspti kurhirani insiensu enajkiksï saserdotichepi. Jimajkani Jeoba arhispti Moisesini ka Aaronini: “Kéndikuku je Koreni ka imeri chúxapatichani”.

Kore niraspti tabernakulurhu enga Moisesi japka, peru Datáni, Abirami ka imecheri familiechaksï no uékaspti nirani. Jeoba arhiaspti israelitechani: “Kéndiku je Koreri, Datániri ka Abiramiri kʼumanchikua sïkuiririrhu”. Israelitechaksï jirejiresï kéndikuspti. Datáni, Abirami ka imecheri familiechaksï anhandetini pakaraspti imecheri kʼumanchikuarhu uérakua. Ka echeri arhapakurhispti ka ima engaksï no kurhandirapka jimaksï uekanhespti. Ka tabernakulurhu, chpiri ma uekorhispti auandarhu uératini ka kʼamajkuspti Koreni ka 250 achatichani.

Tátsekua, Jeoba arhispti Moisesini: “Eska mándani tribueri orhejtsïkuti, juaaka imeri bastonini. Kara orhejtsïkutiri nombrini imeri bastonirhu. Peru Lebiri tribueri bastonirhu, Aaroniri nombri jatsiku. Ka iámindu bastonichani tabernakulurhu incharaa. Ka bastoni ima achatiri engani erakuaka, tsïpaati”.

Pauandikua, Moisesi petaaspti iámindu bastonichani ka exeraaspti orhejtsïkutichani. Ka Aaroniri bastoni tsïtsïki jukaaspti ka almendra ninirichani. Ísï úparini, Jeoba xarhataspti eska Aaronini erakuspka para kʼéri saserdotiini.