Apostulichaksï kurhajchaspti Jesusiri juramukuani para aianhpini Tata Diosïri eianhperakuani interu parhakpini. Uéxurhini 47 jimbo, Antiokia anapu erachicha, axasptiksï Pabluni ka Bernabeni paraksï biaji ma úni aianhpikueri. Tsimarhanksï tsípikua jingoni aianhpisïrendi engaksï nirani japka Asia Menori jimbo, imani lugaricharhu komu Derbe, Listra ka Ikonio.

Pablu ka Bernabe iáminduechanksï aianguasïrendi: rikuechani ka pobrichani, tumbiichani ka jatirichani. Uánikuaksï jiókuarhispti jurhimbikuani Kristueri. Pablu ka Bernabe, ístuksï aianguspti Chipre anapu gobernadorini, enga Serjiu Paulu arhinhenga, peru bruju ma uékaspti pʼínguani. Pablu arhispti brujuni: “Jeobakini kastigariuati”. Ima ratu jimbo, bruju siegu pakaraspti. Enga gobernadori exepka inde ambe, jakajkuti úkuarhispti.

Pablu ka Bernabe, iápurisïksï aianhpisïrendi: kʼumanchikuecharhu, merkaduecharhu, xanharisï ka sinagogaecharhu. Ma ueltaksï kojuni ma tsinaspti Listra. Ima engaksï exepka, eratsisptiksï eskaksï diosïchespka ka uékasptiksï kómarhiani. Peru Pablu ka Bernabe nóksï jurajkuaspti, arhiasptiksï: “¡Tata Diosïntkusï uétarhijti kómarhini! Jucha solu kʼuiripueska”. Jimajkani niárasptiksï máru judiuecha engaksï úpka eska kʼuiripu ikiakupiringa Pabluni. Tsakapkuerasptiksï ka antsikupasptiksï asta iretarhu uéakumanisï, eratsiparini eska uarhirixapkia. ¡Peru Pablu tsípiti jarhaspti! Sóntkuksï jurhaspti máru erachicha para jarhuatani ka iretarhuksï pántaspti. Tátsekua, Pablu kʼuanhatsintaspti Antiokia.

Uéxurhini 49 jimbo, Pablu úspti máteru biaji. Niraspti erachichani exeani Asia Menori ka tátsekua eianhpispti Tata Diosïri ambe asta Europa. Niraspti Atenasi, Éfesu, Filipusi, Tesalonika ka máteru lugaricharhu. Imani biajirhu, pámbitaspti Silasi, Lukasi ka tumbi ma enga Timoteo arhinhenga. Márkuksï ánchikuarhispti paraksï jimbanhi kúnguarhikuechani uáni ka uinhaperaani. Pablujtu ma uéxurhini ka terujkani pakaraspti Korintu para uinhaperantaani erachichani. Aianhpisïrendi, jorhentpini ka kartechani karakuani kúnguarhikuechani. Ístu, ánchikuarhisïrendi kʼumanchikua sïkuiririchani uáni. Ísï tátsekua, Pablu kʼuanhatsintaspti Antiokia.

Uéxurhini 52 jimbo, Pablu úspti terseru biajini, enga Asia Menori uénapka. Norterhisï biajarispti asta Filipusi ka tátsekua asta Korintu kétsimaspti. Pablu ístu ióni Éfesu pakaraspti jorhentpini, tsinajpeni ka jarhuatani kúnguarhikuani. Ístu, pauani pauani íntspiasïrendi diskursuechani eskueleri salarhu ma. Uánikuechaksï kasu úkuspti ka mójtakurhisptiksï. Últimu, enga na nípkia xáni uáni lugaricharhu aianhpini Tata Diosïri ambe, Pablu Jerusaleni niraspti.

Filipusi, uátsï ma jarhaspti enga jántspiripka ka enga uénga adibinarini ambe úkuarhipirini jimboka demoniu ma incharhetixapka. Ka kánikua tumina andasïrendi para imeri dueniuecha. Engaksï Pablu ka Silasi Filipusi niárapka, uátsï úndaspti iápurisï chúxapaani uánikua jurhiatikua. Demoniu úsïrendi eska uátsï uinhachapiringa: “Íksï achaticha, Sánderu kʼéri Tata Diosïri jántspiristi”. Últimu, Pablu arhispti demoniuni: “¡Juramuchesïngakini Jesusiri nombri jimbo eskari uérhintaaka uátsïni!”. Ka demoniu uérhintaspti.

Engaksï imeri dueniuecha exepka eskaksï nóteru úpiringia tumina andani uátsï jimbo, kánikuaksï ikiaspti. Antsikupasptiksï Pabluni ka Silasini nani engaksï japka juramuticha ka juesicha ka arhiasptiksï: “¡Íksï achaticha no kurhajchasïndi leini ka uénastia mámaru ambe uandanhani!”. Juesichaksï juramuspti eskaksï atapiringa Pabluni ka Silasini ka eskaksï ónhaapiringa. Kárseliri kuári, iauani inchanhikua péraaspti, enga sánderu pápkandipka. Ístu, sepurhu péraaspti, jóndukupariani tablecha máru jimbo.

Jimajkani, Pablu ka Silasi úndasptiksï pireni para kʼéri ambe arhini Jeobani ka ima engaksï ónhakata japka, kurhauasïrendiksï. Ka terojkani chúri, kʼéri ma jenchespti ka iámu kárselini manataspti. Iámu puertechaksï mítakuarhispti ka kueratakuarhesptiksï kadenecha ka sepuecha. Kuári, uiriipaspti inchani asta jima enga Pablu ka Silasi japka ka exespti eskaksï puertecha mítakuarhitixapka. Eratsispti eska iámindu engaksï ónhakata japka, sïpakuarhispkaksï, jimbosï espada ma jupikapti para uándikukuarhini.

Peru Pablu uinhachaspti: “¡Asï ambe ma úkuarhi! ¡Iáminduchi ixú jarhaska!”. Kárseliri kuári uiriispti nani enga Pablu ka Silasi japka ka kʼutitsekuaspti. Ka arhiaspti: “¿Ambe uá parani pʼímutantskateni?”. Imaksï arhispti: “Tʼu ka imecha engaksï tʼunguini jingoni irekaka, jatsiskajtsï para Jesusini jakajkuni”. Jimajkani, Pablu ka Silasi jorhendaasptiksï Jeobaeri ambe, ka kuári ka iámindu imeri kʼumanchikuarhu anapuecha, itsï atakuarhisptiksï.

Timoteu, tumbi máespti Listreri kúnguarhikuarhu anapu. Imeri táti grieguespti, ka amamba judia. Imeri amamba Eunise ka imeri nanita, Loida, sapichkuksï jorhendaspti Timoteuni Jeobaeri ambe.

Enga Pablu Listra nípka, imeri segundu biajirhu para aianhpini, exespti eska Timoteu meru uékaasïrenga erachichani ka eska méntkisï uékasïrenga jarhuataani. Jimbosï Pablu pʼímarhipti Timoteuni para pámbitani biajirhu. Enga tiempu nitamapkia, Pablu prepararispti Timoteuni para ambakiti jorhentpiriini ka aianhpini Tata Diosïri ambe.

Espiritu santu orhekupasïrendi Pabluni ka Timoteuni nani engaksï nirenga. Ma chúri, Pablu bisioni ma exespti. Achatini ma exespti enga arhipka eska Masedonia nipiringa jarhuajpini. Jimboksïsï, Pablu, Timoteu, Silasi ka Lukasï nípti jima para aianhpini ka uaani kúnguarhikuechani.

Kʼéri ireta Tesalonika enga Masedonia japka, uánikua achaticha ka uarhiitichaksï kristianu úkuarhispti. Peruksï máru judiuecha enbidirisïrendi Pabluni ka imeri kompanieruechani. Tánaasptiksï uánikua no sési úrichani ka antsikuasptiksï erachichani asta jima engaksï iretarhu anapu juramuticha japka. Judiuechaksï uinhachasïrendi: “¡Íksï achaticha enemiguesti juramukua Roma anapueri!”. Pablu ka Timoteu úpirindiksï uarhini, jimboksïsï chúrikua sïpakuarhipti Berea.

Berea anapuechaksï uékasïrendi kurhaani Tata Diosïri ambe ka uánikua grieguecha ka judiuechaksï jakajkuti úkuarhispti. Peruksï máru judiuecha, Tesalonika uératini jurhaspti paraksï problema íntsaani, jimbosï Pablu Atenasi nípti. Timoteu ka Silasi, Bereaksï pakaraspti para uinhaperantaani erachichani. Enga tiempu nitamapkia, Pablu axaspti ménderu Timoteuni Tesalonika, para jarhuataani erachichani paraksï úni tekantani engaksï no sési kánhani japka. Tátsekua, Pablu axaspti Timoteuni para pʼorhembiani ka uinhaperantaani máteru kúnguarhikuechani.

Pablu arhispti Timoteuni: “Ima engaksï Jeobani uéjka marhuakuni no sésiksï kánhaati”. Timoteu no sési kánhaspti ka ístu ónhanhaspti imeri jakajkukua jimbo. Peru ima sési pʼikuarherasïrendi jimboka ísï úsïrenga xarhatani eska no méni jurajkupiringa Jeobani.

Pablu arhiaspti Filipusi anapuechani: “Axachixakaksïni Timoteuni. Indeksïni jorhendaati nénajtsï méntkisï jurhimbikuarhu jaua ka néna aianhpini”. Pablu mintsikasïrendi Timoteuni. Márkuksï ánchikuarhispti uánikua uéxurhini ka ambakiti amiguechesptiksï.

Terseru biaji enga Pablu úpka para aianhpini, Jerusaleni kʼamaraspti. Jimaksï jupikaspti. Ma chúri enga ónhakata japka, Jesusi arhispti bisionirhu ma: “Romari niuaka ka jimari eianhpiaka”. Jimajkani, pásptiksï Pabluni de Jerusaleni a Sesarea. Jima, tsimanksï uéxurhini ónhaspti. Enga jusgarinhapka juramuti Festu japarini, Pablu uandaspti: “Uékasïnga eskarini Sésari jusgariuaka Roma”. Festu arhispti: “Engari uéjka eskakini Sésari jusgariuaka, Sésari jingonikini axaaka”. Jimboksïsï barkurhu ma jatsirapti enga Roma niraenga. Tsimani kristianuechaksï pámbitaspti: Lukasï ka Aristarku.

Engaksï marirhu japkia, tormenta ma úkuarhispti enga uánikua jurhiatikua duraripka. Iáminduksï eratsispti eskaksï uarhipiringia. Peru Pablu arhiaspti: “Achaticha, ánjilirini ma arhisti tsánharhikua ma jimbo: ‘Asï ché. Niáraakari Roma ka iáminduechaksï salbarikuarhiati’. Ísï jimbo, ¡asï ché je! Nochi uarhiaka”.

Tormenta 14 jurhiatikua durarispti astakaksï exentapka echeri. Jindespti isla de Malta. Barku itsïrhu pakamespti ka iámu xerekuarhintaspti, peru 276 kʼuiripu enga jima nirani japka, úspti islarhu uanamukuni jamberi niántani. Máruksï nadaripaspti ka máteruksï úraspti barkueri ambe paraksï no uekameni. Malta anapuechaksï kuidariuaspti ka kurhikasptiksï paraksï jorhepentani.

Tanimu kutsï tátsekua, soldaduechaksï Roma páspti Pabluni máteru barku jimbo. Erachichaksï niraspti erokani. Enga Pablu exeapka, agradeserikuspti Jeobani ka sési pʼikuarheraspti. Nájkiruka Pablu jupikakata japka, jiáretasptiksï para kʼumanchikuarhu ma irekani enga rentarikatepka ka enga soldadu ma kuáni japka. Tsimani uéxurhini jarhaspti jima. Kʼuiripu nirasïrendi pʼorhembini ka ima aianguasïrendi Tata Diosïri Reinueri ambe ka Jesusiri ambe. Pablu ístu karaaspti kartechani para kúnguarhikuecha engaksï Asia Menori ka Judea japka. Xarharasïndi eska Jeoba Pabluni úraspka para aianhpini Tata Diosïri ambakiti ambe máteru nasionicharhu.