Babeli no iauani, jarhaspti máteru ireta enga Uri arhinhaenga. Jima anapu kʼuiripu no kómarhisïrendi Jeobani, sino uánikua máteru diosïchani. Peru ini ireta jimbo, jarhaspti ma achamasï enga Jeobani kómarhienga, Abraani arhinhasïrendi.

Jeoba arhispti Abraanini: “Jurajku chíti kʼumanchikuani ka chíti parientichani ka ní imani echerirhu engakini ji exeraaka”. Tátsekua, Tata Diosï aiakuspti: “Kʼéri nasioniri ma úkuarhiaka. Ka tʼungini jimbo, ambakiti ambe uáka interu parhakpini anapu kʼuiripuni jimbo”.

Abraani no mítispti Jeoba nani uékasïreni axani, peru mintsikasïrendi imani. Abraani; imeri témba Sara; imeri táti Taré, ka imeri sobrinu Loti, kurhajchasptiksï Tata Diosïni. Iámindu ambeksï prepararispti ka uénasptiksï biajini.

Abraani 75 jatirisptia enga ima ka imeri familia, niárapkaksï imani echerirhu enga Jeoba uékaenga eskaksï exepiringa. Kanaani arhinhasïrendi. Jima, Jeoba arini ambe aiakuspti: “Iámu i echeri engari exeni jaka, chíti sapiichani íntsauaka”. Peruksï Abraani ka Sara jatirisptia ka nóksï kánguarhiasïrendi sapiichani. Ísï jimbo, ¿néna kumpliripirini Jeoba ambe enga aiatspipka?

Abraani ka Sara ióniksï páxaptia temungurhirini. Jurajkusptiksï sési jásï kʼumanchikuani engaksï Uri jatsipka, paraksï kʼumanchikua sïkuiriri ma jimbo irekani. Peru Sara no kejarikuarhesïrendi, jimboka mítispka eska ambe enga sánderu sésipka, jindespka úni ambe enga Jeoba uandaenga.

Sara meru uékasïrendi kánguarhini sapini ma, jimbosï arhipti Abraanini: “Enga juchiti jántspiri Agari kánguarhiska sapini ma tʼungini jingoni, ísïuati komueska juchitiini”. Ísï tátsekua, Agari kánguarhispti sapini ma ka Ismaeliksï arhinhataraspti.

Uánikua uéxurhini tátsekua, enga Abraani 99 uéxurhini jatiripka ka Sara 89, tanimu kʼuiripuksï niraspti pʼorhembiani. Abraani pʼímarhiaspti paraksï mintsikuarhini anhatapurhu ma ka paraksï pakarani tʼireni. ¿Mítiskiri néspiksï? Ánjilichesptiksï. Imaksï arhispti Abraanini: “Máteru uéxurhini jimbo, i tiempu ísï, t’u ka chíti uarhiiti kánguarhiakajtsï sapini ma”. Sara incharini jatini kurhaaxapti ka enga kurhaapka indeni ambe, tsípinhchaspti ka eratsispti: “¿Meruni uá kánguarhini sapini ma xáni kʼéritinia?”.

Ma uéxurhini tátsekua, Sara sapini ma kánguarhispti, ísï eska Jeobaeri ánjili na uandapka. Abraani, Isaaki arhiraspti enga arhikuekajka “terekuarhini”.

Enga Isaaki sinku uéxurhinisï jatiripka, Sara exespti eska Ismaeli teresmarhusïrenga Isaakini. Ima uékasïrendi kuájchakuni uájpani, jimbosï uandontskuarhipti Abraani jingoni ka arhispti: “Chúnta Agarini ka Ismaelini”. Uénani jámani, Abraani no uékasïrendi ísï úni. Peru Jeobajtu uékasïrendi kuájchakuni Isaakini, jimbosï arhipti Abraanini: “Ú ambe enga Sara uandajka. Jí kuidariuaka Ismaelini. Peru juchiti aiatsperakuechaksï Isaakini jimbosï úkuarhiati”.

Loti imeri tíu Abraani jingoni irekaspti, Kanaani. Tsimarhanksï xáni uáneraasptia animalichani enga nóteru ambandepkia nani jatsiani. Jimbosï Abraani arhipti Lotini: “Nóteruchi uákia tsimarhani ixú irekani. Jimboetakua, eraku naniasïri uékasïni nirani ka ji máteru ladu ísï niuaka”. ¿No ísïski eska Abraani ambakiti kʼuiripu máespka?

Loti exespti eska ma parti echeri kánikua sési jándespka, kánikua itsï jarhaspti ka uitsakua. Jimbosï erakupti jima nirani irekani imeri familia jingoni, iretarhu ma enga Sodoma no iauani japka. Ka tátsekuaksï Sodoma úspti imecheri kʼumanchikuani.

Sodoma ka Gomorra anapu kʼuiripu, kánikua no sési úrispti. Xániksï no sési úrispti enga Jeoba eratsipka kʼamajkuani imani tsimani iretechani. Peru Tata Diosï uékasïrendi salbarini Lotini ka imeri familiani, jimbosï axaapti tsimani ánjilichani paraksï arhiani: “¡Sóntku je! ¡Uéaku je ini iretarhu! ¡Jimboka Jeoba kʼamajkuaka!”.

Peru Loti ióndaxapti uéakuni iretarhu. Jimboksïsï ánjilicha jupijtapti Lotini, témbani ka imeri tsimani uátsïchani ka uiriipasptiksï petaatantaani. Ka arhiasptiksï: “¡Uiria je! ¡Sïpakuarhi je parajtsï no uarhini ka asï era je tátsepani ísï! Engajtsï tátsepani ísï eraaska, uarhiakajtsï”.

Engaksï ireta Sóari jimbo niárapkia, Jeoba úspti eska chpiri ka asufri uekorhepiringa Sodoma ka Gomorra. Imaksï tsimani iretecha méntku iámu kʼamakurhispti. Lotiri témba no kurhajchaspti Jeobani, tátsepani ísï eraspti ka estatua itukueri ma úkuarhintaspti. Peru Loti ka uájpechaksï tsípiti pakaraspti jimbokaksï kurhandiraspka. Kánikuaksï no sési pʼikuarherapti jimboka Lotiri témba no ísï úspka, peru ístuksï sési pʼikuarherapti jimbokaksï ima kurhajchaspka Jeobani.

Abraani jorhendaspti Isaakini para uékani Jeobani ka mintsikaani iámindu imeri eiatsperakuechani. Peru enga Isaaki 25 uéxurhinisï jatiripka, Jeoba kurhakuspti Abraanini eska úpiringa ambe ma enga kánikua úkua jukapka. ¿Mítiskiri ambespi?

Tata Diosï arhispti Abraanini: “Jimboetakua, pá chíti sapini indentku engari kánguarhijka, juáta ma jimbo enga Moria jaka ka íntspi komueska kéjtsïtakua ma”. Abraani no mítispti andisï Jeoba indeni ambe kurhakupi, peru kurhajchaspti.

Pauandikua tsípa, Abraani páspti Isaakini ka tsimani imeri jántspirichani Moria ísï. Tanimu jurhiatikua tátsekua, uénasptiksïa eraakuarhini juátecha. Abraani arhiaspti imeri jántspirichani eskaksï erontapiringa, enga jamberi ima nipiringa Isaaki jingoni kéjtsïtakua ma úni. Abraani chkari páraspti Isaakini ka ima kuchiiuni páspti. Isaaki kurhamarhispti: “¿Nani jarhaski karichi engachi kéjtsïtaaka?”. Abraani arhispti: “Jeobajtsïni íntskuati iju”.

Engaksï niárapkia juátarhu, altariksï ma úspti. Tátsekua, Abraani jóndukuspti ka jójkuni Isaakini ka altarirhu péraspti.

Abraani pʼíkuspti kuchiiuni. Ka imani ratu jimbo, Jeobaeri ánjili arhispti auandarhu uératini: “¡Abraani! ¡Asï ambe ma úku tumbini! Iásï kʼóruni mítiskia eskari mintsikasïnga Tata Diosïni, jimbokari listu jarhaspka para íntspini chíti sapini”. Jimajkani, Abraani exespti karichini ma enga sïuanguecha jingoni matotakuarhetini japka anhatapu sapichurhu ma. Jimbosï sóntku jurajkupti Isaakini ka karichini kéjtsïtaspti.

Jiáni uératini, Jeoba uandaspti eska Abraani imeri amiguespka. ¿Mítiskiri andi? Jimboka Abraani úspka iámu ambe enga Jeoba kurhakupka, nájkiruka no kurhanguenga andi.

Jeoba ménderu aiakuspti Abraanini: “Újchakuraakakini ka uánikua sapiichanguini íntskuauaka ka kʼéri ma familiani”. Inde ambe arhikuekasïrendi eska Jeoba újchakuraapiringa iámindu ambakiti kʼuiripuechani Abraaniri familia jimbo.