Biblia arhisïndi eskaksï kʼuiripuecha “no ióni irekasïn[ga] ka uánikua problemecha jingoni” (Job 14:1). Peru ¿ísï uékasïni Tata Diosï eskachi irekaaka? Ka enga no ísïika, ¿ambe eratsetixaki úni Tata Diosï parachi sési irekani? ¿Niáraa ísï úkuarhini? Exe je na engajtsïni xáni sési pʼikuastajka ambe enga Biblia mókuntajka.

1. ¿Néna uékasïni Tata Diosï eskachi irekaaka?

Tata Diosï Jeoba uékasïndi eskachi sési irekaaka. Enga kueraapka Adáni ka Ebani, sési jándikuarhu ma peeraaspti: jardini de Edénirhu. Ka jima “Tata Diosï újchakuraaspti ka arhiaspti: ‘Kánguarhia je sapiichani, ka uánikua úkuarhi je, ka uinira je echerini ka ánchita je’” (Génesis 1:28). Tata Diosï Jeoba uékasïreendi eskaksï kánguarhiapiringa sapiichani, ka eskaksï iámu Echerini paraisu ma úntapiringa ka eskaksï kuidariuapiringa animalichani. Tata Diosï Jeoba uékasïreendi eskachi irekapiringa para méntkisï ka eska no nema pʼamenchapiringa.

Nájkiruka no ísï úkuarhipka eska Tata Diosï na uékeenga ueenakuarhu,a no mójtakusti imeeri eratsekuani (Isaías 46:10, 11). Tata Diosï útasï uékaxati eskaksï kʼuiripuecha engaksï imani kurhajchajka irekaaka para méntkisï no no sési jásï ambe jingoni (arhinta je Jaŋaskuecha 21:3, 4).

2. Desde iásï, ¿nénachi uaa tsípikua jingoni irekani?

Tata Diosï Jeobajtsïni ísï kueraasti parachi uékani kurhandini ‘Tata Diosïri Uandakuani ka únchi eska na arhijka’, i ambe arhikuekasïndi uékani míteni imani ka k’éri ambe arhini (arhinta je Lukasʌ 11:28). Tata Diosï uékasïndi eskachi ambakiti pájperakua ma jatsiaka imani jingoni, eskachi jámaaka “imeeri xanharuecharhu”, eskachi xénchaaka ka eskachi iámu mintsita jingoni marhuakuaka (Deuteronomio 10:12; Salmo 25:14). Engachi úska iámu ini ambe, uaakachi meru tsípikua jingoni irekani nájkirukachi jatsiauaka problemechani. K’éri ambe arhini Tata Diosï Jeobani úsïndi eskachi sési irekaaka, jimbokachi ísï irekasïnga eska ima na uékajka.

3. Tata Diosï Jeoba uékasïndi eskachi ambakiti irekua ma jatsiaka

Exe je BIDEUNI ka uandontskuarhi je íri ambe:

BIDEU: ¿Andisï kueraa Tata Diosï Echerini? (ma parti) (1:41)

• ¿Andisï Tata Diosï xáni sési jásï parhakpinini ma kueraa parachi irekani?

Arhinta je Eclesiastés 3:11 ka uandontskuarhi je íri ambe:

• ¿Ambejtsïni jorhendasïni i tekstu Tata Diosï Jeobaeri ambe?

4. Ambe enga Tata Diosï Jeoba uékeenga úni ueenakuarhu no mójtakurhisti

Arhinta je Salmo 37:11, 29 ka Isaías 55:11, ka uandontskuarhi je íri ambe:

• ¿Nénachi míteski eska no mójtakurhiska ambe enga Tata Diosï uékeenga úni ueenakuarhu?

5. K’éri ambe arhini Tata Diosï Jeobani úsïndi eskachi sési irekaaka

BIDEU: Kurhanguska andijtsïnisï kueraa Tata Diosï (5:03)

• ¿Ambe jarhuataspi Terumini míteni andijtsïnisï kueraa Tata Diosï?

Arhinta je Eclesiastés 12:13 ka uandontskuarhi je íri ambe:

• Exeparini iámindu ambe enga Tata Diosï Jeoba úka juchantsïni jimbo, ¿ambechi úpirini úni parachi xarhatani eskachi jukaparharasïnga ini ambe?

AMBE ENGACHI JORHENGUARHIKA

Tata Diosï Jeoba uékasïndi eskachi meru tsípikua jingoni irekaaka para méntkisï ixú Echerirhu. Ka iásïjtuchi úsïnga tsípikua jingoni irekani engachi iámu mintsita jingoni kómarhijka Tata Diosï Jeobani.

Ambejtsï jorhenguarhiski

• Enga Tata Diosï Jeoba kueraapka Adáni ka Ebani, ¿néna uékasïreeni eskaksï irekapiringa?

• ¿Nénachi míteski eska Tata Diosï no mójtakuska ambe enga uékeenga úni ueenakuarhu para kʼuiripuecha?

• ¿Ambeksïni jarhuataa parajtsï meru sési irekani?

ÍSTU EXE JE INI AMBE

Exe je andichisï uaa seguru jarhani eska jardini de Edéni meru jarhaspka.

“Jardini de Edéni, ¿solu uandantskua máeski?” (Aianhpiri, 1 de eneru de 2011)

Exe je andichisï seguru jaki eska Echeri méntkisï jauaka.

“¿K’amakurhia ma jurhiani Echeri?” (Artikulu ma enga jw.org jimbo jaka)

Exe je ambe enga Biblia uandajka andichisï kueraanha.

“¿Andichisï irekani jaki?” (Artikulu ma enga jw.org jimbo jaka)

Exe je na enga acheeti ma kuenta íntskukuarhepka eska kueratanchasïreenga ambe ma imeeri tsípikuarhu, nájkiruka ísï exeenga eska iámu ambe jatsispka.

Iásï kʼóruni tsípikua jingoni irekaxakaia (3:55)

2. ¿Neechaksï juramusïni Jesúsini jingoni?

Jesúsi no jandiajku juramusïndi. Juramuatiksï kʼuiripuecha engaksï ‘táchani jásï triburhu anapueka ka engaksï mámaru jásï idioma uandajka ka uápuru nasionicharhu ka iretecharhu’ anapuecha (Jaŋaskuecha 5:9, 10). ¿Namunksï juramua Kristuni jingoni? Jiáni uératini enga Jesúsi ixú Echerirhu japka, uánikua kʼuiripuechaksï chúxapaspti paraksï kristianu úkuarhini. ¿Joperuksï iáminduecha juramua Jesúsi jingoni? Nómbe, solu 144,000 engaksï auandarhu niuaka paraksï Jesúsi jingoni juramuni (arhinta je Jaŋaskuecha 14:1-4). Ka Tata Diosïri Reinu, juramukuauati iámindu máteru kristianuechani engaksï ixú Echerirhu irekaaka (Salmo 37:29).

Tata Diosïri Reinu, juramuxatiia. Ka no ióni jimbo uánikua ambe mójtakuati ixú Echerirhu. Ju je exeni máru ambakiti ambe enga i gobiernu uaaka ka enga chá uaaka erokuarhini kánikua tsípikua jingoni.

1. ¿Ambe uaa Tata Diosïri Reinu paraka ménderu jauaka pínandikua ka iámindu ambe jurhimbikua jingoni úkuarhini?

K’éri uarhiperatarhu enga jindeeka Armajedoni, Jesúsi —enga Juramutiika Tata Diosïri Reinurhu— kʼamajkuati kʼuiripu no sési úrini ka ístu gobiernuechani (Jaŋaskuecha 16:14, 16). Imani tiempu jimbo, kumplirikuarhiati ari Bibliaeri aiatsperakua: “Nóteru ióni jimbo, no sési úrichaksï nóteru jauatia” (Salmo 37:10). Ini gobiernu jimbo, Jesúsi uaati eska iámu Echerirhu pínandikua jauaka ka eska iámindu ambe jurhimbikua jingoni úkuarhiaka (arhinta je Isaías 11:4).

2. ¿Néna irenhaa enga úkuarhiakia ambe enga Tata Diosï uékajka ixú Echerirhu?

Tata Diosïri Reinu jimbo, “echeri jurhimbiticheriuati, ka jimaksï irekaati para méntkisï” (Salmo 37:29). ¡Eranhaska je na engaksï irekaaka iámindu kʼuiripuecha engaksï ambakiti ambe uaaka, engaksï xénchaaka Jeobani ka engaksï iáminduecha xénchperaaka! Ambakiti ambeesti, ¿no ísïiski? Nóteru nema pʼamenchaatia ka iáminduechaksï irekaati para méntkisï.

3. ¿Ambe uaa Tata Diosïri Reinu enga kʼamajkuauakia no sési úrichani?

Engaksï kʼamajkunhaakia no sési úricha, Jesúsi jindeuati Juramuti 1,000 uéxurhini. Imani tiempu jimbo, Jesúsi ka 144,000 engaksï imani jingoni juramuaka, jarhuatauatiksï kʼuiripuechani paraksï niárani perfektueni. Enga kʼamakurhiakia mili uéxurhini, Echeri sési jásï paraisu máeuatia ka kʼuiripuechaksï tsípikua jingoni irekaati jimbokaksï kurhajchauaka Tata Diosï Jeobaeri juramukuechani. Jiájkani, Jesúsi íntskuntaati juramukuani imeeri Tata jémbani, Jeobani. Ka Tata Diosïri nombri pímbinhajkunhantaati (Mateu 6:9, 10). Ka sési mítekuarhiati eska Jeoba ambakiti juramuti máeska ka eska sési kuidarisïnga imeeri iretani. Tátsekua, kʼamajkuati Satanasini ka demoniuechani ka náki uéjki kʼuiripuni enga no uékaaka kurhajchani imeeri juramukuani (Jaŋaskuecha 20:7-10). Iámindu ambe enga uaaka Tata Diosïri Reinu, jindeuati para méntkisï.

JORHENGUARHI JE SÁNDERU AMBE

4. Tata Diosïri Reinu kʼamajkuauati kʼuiripuecheri gobiernuechani

“Kʼuiripu juramukusïndi máteru kʼuiripuni solu para no sési ambe úkuni” (Eclesiastés 8:9). Tata Diosï Jeoba imeeri Reinu jimbo, sési peentaati iámindu no sési jásï ambe enga jaka jimboka no jurhimbikua jingoni úkuarhisïnga ambe ma.

Arhinta je Daniel 2:44 ka 2 Tesalonika 1:6-8, ka uandontskuarhi je íri ambe:

• ¿Ambe uaa Tata Diosï Jeoba ka Jesúsi, gobiernuecha jingoni ka imani kʼuiripuecha jingoni engaksï apoiariuajka?

• ¿Andijtsïsï seguru jaki eska ambe enga Tata Diosï Jeoba ka Jesúsi uaaka, jurhimbikua jingonksï uaaka ka eskaksï iáminduechani sési káuaka?

5. Jesúsi sánderu ambakiti Juramutiisti

Jimboka Jesúsi jindeeska Juramuti Tata Diosïri Reinurhu, uánikua ambakiti ambe uaati kʼuiripuecha jimbo. Exe je BIDEUNI parajtsï miántani néna xarhataspi Jesúsi eska uékasïnga jarhuataani kʼuiripuechani ka eska Tata Diosï íntskuska uinhapikua para ísï úni.

BIDEU: Jesúsi xarhatasti ambe enga uaaka Tata Diosïri Reinu (1:13)

Ambe enga Jesúsi úpka enga ixú Echerirhu japka, xarhatasti ambe enga uaaka Tata Diosïri Reinu. Aiatsperakuecha engaksï listarhu jaka, ¿nákichantsï sánderu uékasïni eska úkuarhiaka? Arhianta je iámindu tekstuechani nani engaksï pʼitakata jaka i aiatsperakuecha.

6. Tata Diosïri Reinu jimbo sésichi irekaaka sánderu orhepani

BIDEU: Ambakiti ambe engachi erokuarhini jaka para sánderu orhepatini (4:38)

Arhinta je Salmo 145:16 ka uandontskuarhi je íri ambe:

• ¿Nájtsï pʼikuarherasïni míteni eska Tata Diosï Jeoba íntsauaka “ambe engaksï uétarhinchajka imeecha engaksï tsípiti jaka”?

AMBE ENGACHI JORHENGUARHIKA

Tata Diosïri Reinu uaati ambe enga Tata Diosï uékajka. Eska iámu Echeri paraisu máeuaka ka eskaksï irekaaka ambakiti kʼuiripuecha engaksï Tata Diosï Jeobani kómarhiaka para méntkisï.

Ambejtsï jorhenguarhiski

• ¿Ambe uaa Tata Diosïri Reinu para pímbinhajkuntani Tata Diosï Jeobaeri nombrini?

• ¿Andichisï seguru jaki eska Tata Diosïri Reinu uaaka ambe engajtsïni Biblia aiachini jaka?

• Iámindu amberi enga Tata Diosïri Reinu uaaka, ¿nákintsï sánderu uékapirini exeni?

ÍSTU EXE JE INI AMBE

Jorhenguarhi je ambeeski Armajedoni.

“¿Ambeeski Armajedoni?” (Artikulu ma enga jw.org jimbo jaka)

Exe je ambe enga uandapka Jesúsi imani jurhiatikuecheeri enga kánikua no sési nitamakuarhinhaaka.

“¿Ambe arhikuekasïni ima jurhiatikuecha enga kánikua no sési nitamakuarhinhaaka?” (Artikulu ma enga jw.org jimbo jaka)

¿Nénaksï uaa familiecha eranhaskani eskaksï tsípikua jingoni irekaxakaia imani ambe jingoni enga úkuarhiaka Tata Diosïri Reinu jimbo?

Paraisurhu exekuarhi (1:50)

Arhinta je eksperiensiani “Uánikua ambe kurhamarhikuarhisïreenga” parajtsï exeni na enga acheeti ma enga politikarisï jámeenga exeantapka mókuntskuechani ima amberi enga kurhamarhikuarhienga.

“Biblia jarhuataasti mójtakuni irekua” (Aianhpiri, 1 de eneru de 2012)