-
Chájtsï uaaka Jeobaeri amigueni¡Méntkisï tsípikua jingoni ireka je! Bibliaksïni uáti jarhuatani
-
-
5. Ambe enga Jeoba uéjka eskaksï uaaka imeeri amiguecha
Sáno méntkisï uékasïngachi eskaksï juchaari amiguecha uaaka ambe ma juchantsïni jimbo.
¿Chá ambe erokuarhisïni eskaksï uaaka chaari amiguecha chánksïni jimbo?
Arhinta je 1 Juanu 5:3 ka uandontskuarhi je íri ambe:
¿Ambe uékasïni Jeoba eskaksï uaaka imeeri amiguecha?
Parachi kurhajchani Jeobani, jamberichi jatsiaka para mójtakuni máru ambe engachi újka o na engachi jásïika. Arhinta je Isaías 48:17, 18 ka uandontskuarhi je íri ambe:
¿Andisï Jeoba arhiajki imeeri amiguechani eskaksï mójtakurhiaka?
Ambakiti amigu ma, miátantasïndijtsïni ambe engachi jatsika para úni parachi no no sési jásï ambe úkuarhinchani ka parajtsïni sési nicheni. Jeoba májkueni úsïndi imeeri amiguecha jingoni.
-
-
¿Nénachi uaa xarhatakuni Jeobani eskachi xénchasïnga?¡Méntkisï tsípikua jingoni ireka je! Bibliaksïni uáti jarhuatani
-
-
JORHENGUARHIKA 34
¿Nénachi uaa xarhatakuni Jeobani eskachi xénchasïnga?
¿Exesïntsï eskajtsï sánderu xénchasïngia Tata Diosïni desde engajtsï ueenaka Bibliaeri ambe jorhenguarhini? ¿Tsitipirintsï sánderu ambakiti pájperakua ma jatsini Tata Diosï jingoni? Enga ísïika, miá je eska enga Tata Diosï exejka eskajtsï sánhani arixaka sánderu xénchani, imajtuksïni sánderu xénchaati ka kuidarini. ¿Nénajtsï uaa xarhatakuni eskajtsï xénchasïnga?
1. ¿Nénachi xarhatakusïni Tata Diosï Jeobani eskachi xénchasïnga?
Engachi újka ambe enga Tata Diosï uékajka, xarhatakusïngachi eskachi xénchasïnga (arhinta je 1 Juanu 5:3). Peru ima no afuersa úsïndi eska nema kurhajchaaka. Sánderu sési, imajtsïni jurajkusïndi parachi erakukuarhini sinchi kurhajchaa o nómbe. ¿Andi? Jimboka Tata Diosï Jeoba uékasïnga eskachi ‘mintsita jingoni janhanharhiaka’ (Roma 6:17). I ambe arhikuekasïndi eska ima uékasïnga eskajtsï chá kurhajchaaka jimbokajtsï xénchasïnga ka no afuersa. Particha 3 ka 4 i librueri, úkataksï jarhasti paraksïni jarhuatani xarhatakuni Tata Diosï Jeobani eskajtsï xénchasïnga, arhini ambe jingoni: imani ambe úparini enga ima uéjka ka no úni imani ambe enga ima no uéjka.
2. ¿Andisï úpirini úkua jukani xarhatakuni Tata Diosï Jeobani eskachi xénchasïnga?
“Uánikua ambe jimbo no sési nitamakuarhisïndi ima enga jurhimbitku jámajka” (Salmo 34:19). Iáminduechachi úkua jukanchasïnga ambakiti ambe úni jimbokachi kʼamanharintstiska. Ka ístu, jamberichi uandanhiatechani jatsiajka sentabu jimbo, jimbokachi no sési kánhasïnga ka máteru jásï uandanhiata ambe jimbo. Engachi no sési nitamakuarhini jarhajka, jamberi sánderu úkua jukajti imani ambe úni enga Tata Diosï Jeoba uékajka, jimboka sánderu fásiliska no kurhajchani Tata Diosïni. Peru engajtsï chá jánguarhintajka imani ambe úni enga Tata Diosï Jeoba uékajka, xarhatakuntsï jarhasïnga eskajtsï xénchasïnga sánderu eska ambe uéjkini. Ka ístujtsï xarhatakuni jarhasïnga eskajtsï no méni jurajkuaka ka imajtuksïni no méni jurajkuati (arhinta je Salmo 4:3).
JORHENGUARHI JE SÁNDERU AMBE
Ju je exeni andisï kurhajchani Tata Diosï Jeobani jukaparhakue para ima ka ambe engaksïni uaaka jarhuatani parajtsï no méni jurajkuni imani.
3. Satanasi no sési ambe uandasïndi chaari ambe
Bibliarhu, Jobueri libru jimbo, uandasïndi eska Satanasi no sési ambe uandaspka Jobueri ambe ka ístu iámindu kʼuiripuecheri engaksï uéjka Tata Diosï Jeobani marhuakuni. Arhinta je Job 1:1 ka 1:6–2:10, ka uandontskuarhi je íri ambe:
Eska na uandapka Satanasi, ¿ambe jimbonhasï marhuakueni Jobu Tata Diosï Jeobani? (Exe je Job 1:9-11).
¿Ambe no sési ambe uandasïni Satanasi iámindu kʼuiripuecheri ka chaari ambe? (Exe je Job 2:4).
Arhinta je Job 27:5b ka uandontskuarhi je íri ambe:
¿Néna xarhataspi Jobu eska meru xénchasïreenga Tata Diosï Jeobani?
Jobu xarhataspti eska xénchasïreenga Tata Diosï Jeobani jimboka no méni jurajkuspka.
Engachi no méni jurajkujka Tata Diosï Jeobani, xarhatasïngachi eskachi xénchasïnga.
4. Sési pʼikuasta je Tata Diosï Jeobaeri mintsitani
Arhinta je Proverbios 27:11 ka uandontskuarhi je íri ambe:
¿Néna pʼikuarherasïni Tata Diosï Jeoba engajtsï chá kurhajchajka ka engajtsï ambakiti ambe erakujka úni? ¿Andi?
5. Chájtsï uaaka no méni jurajkuni Tata Diosï Jeobani
Jimbokachi xénchasïnga Tata Diosï Jeobani, aianguasïngachi máteruechani imeeri ambe. Ka jimbokachi no méni uékasïnga jurajkuni imani, aianhpisïngachi nájkirukachi úkua jukanchajka. Exe je BIDEUNI ka uandontskuarhi je íri ambe:
¿Úkua jukanchasïntsï uandontskuarhekuani máteruechani Tata Diosï Jeobaeri ambe?
Eska na xarharajka bideurhu, ¿néna úspi Grayson orhepani uérani imani ambe jingoni enga chéenga?
Sánderu fásiliisti no méni jurajkuni Tata Diosï Jeobani engachi xénchajka ambe enga ima xénchajka ka engachi kurhunhijka ambe enga ima kurhunhijka. Arhinta je Salmo 97:10 ka uandontskuarhi je íri ambe:
Miáparini ambe engajtsï chá jorhenguarhikia asta iásï jamberi, ¿nákiski máru ambe enga Tata Diosï Jeoba xénchajka ka máru ambe enga kurhunhijka?
¿Nénajtsï uaa niárani xénchani ambe enga sési jaka ka kurhunhini ambe enga no sési jaka?
6. Sésijtsïni nichesïndi engachi kurhajchajka Tata Diosï Jeobani
Kurhajchani Tata Diosï Jeobani méntkisï sánderu sésiisïndi. Arhinta je Isaías 48:17, 18 ka uandontskuarhi je íri ambe:
¿Exesïntsï eska Tata Diosï Jeoba meru míteska ambe sánderu sésiiski para jucha? ¿Andijtsïsï ísï eratsejki?
¿Nénaksïni jarhuataskia asta iásï jamberi Bibliaeri ambe jorhenguarhini ka sánderu sési míteni Jeobani, enga Tata Diosï jurhimbitiika?
MÁRUKSÏ I AMBE UANDASÏNDI: “Tata Diosï no uandanhiasïndi imani ambe jimbo engani ji újka”.
¿Náki Bibliarhu anapu tekstuntsï úrapirini parajtsï xarhatani eskaksï juchaari úkuecha uaaka sési o no sési pʼikuastani Tata Diosï Jeobani?
AMBE ENGACHI JORHENGUARHIKA
Chájtsï xarhatani jarhasïnga eskajtsï xénchasïnga Tata Diosï Jeobani engajtsï kurhajchajka ka engajtsï no jurajkujka nájkirukajtsï uandanhiatechani jatsiajka.
Ambejtsï jorhenguarhiski
¿Ambeksïni jorhendaski Jobueri ejemplu?
¿Nénajtsï xarhataa eskajtsï xénchasïnga Tata Diosï Jeobani?
¿Ambeksïni jarhuataa parajtsï no méni jurajkuni Tata Diosï Jeobani?
ÍSTU EXE JE INI AMBE
Exe je na engajtsï uaaka méntkisï marhuakuni Tata Diosï Jeobani ka no méni jurajkuni kúnguarhikuani.
“Ima engakeni no méni jurajkuaka tʼujturi no méni jurajkuaka” (16:49)
Míti je sánderu ambe ima no sési amberi enga Satanasi uandapka.
“Jobu no méni jurajkusïndi Tata Diosïni” (Biblia ka ambe engajtsïni aiangujka, arhukukata 6)
Exe je eskaksï asta sapiicha uaaka xarhatani eskaksï xénchasïnga Tata Diosï Jeobani.
¿Nénaksï uaa tumbiicha úni imani ambe enga Tata Diosï uéjka, nájkirukaksï máteru tumbiicha uékaaka eskaksï no sési ambe uaaka?
Asï jurajkutakuarhi paraksïni máteruecha arhini ambe úni (4:00)
-
-
Néna sési erakuni úni ambe ma¡Méntkisï tsípikua jingoni ireka je! Bibliaksïni uáti jarhuatani
-
-
JORHENGUARHIKUA 35
¿Nénachi uaa ambakiti ambe erakuni úni?
Iáminduechachi jatsisïnga para erakuni úni ambe ma. Máru ambe engachi erakujka úni uaati sési jarhani o no sési jarhani ka ístu uaati úni eskachi seguiriuaka sési pájperani Tata Diosï Jeobani jingoni, ochi nóteru sési pájperania imani jingoni. Pori ejemplu, jamberichi jatsiaka para erakuni nani irekani, ambe ánchikuarhini ka sinchi uambuchaa o tembuchaa o nómbe. Engachi ambakiti ambe erakuska úni, uaakachi sési irekani ka sési pʼikuastani Tata Diosï Jeobani.
1. ¿Nénaksïni uaa jarhuatani Biblia parajtsï ambakiti ambe erakuni úni?
Ante dejtsï erakuni úni ambe ma, kurhaku je Tata Diosï Jeobani eskaksïni jarhuataaka ka jánguarhinta je exeni Bibliarhu ambe enga ima eratsejka indeeri ambe (arhinta je Proverbios 2:3-6). Ménisïjtsï exeaka eska Tata Diosï Jeoba uandasïnga ambe engachi meru jatsika para úni. Enga i ambe úkuarhiaka, sánderu sésiuati eskajtsï kurhajchaaka imani.
Peru ¿ambejtsï uaa enga Biblia no uandaaka ambe engachi meru jatsika para úni? Jeobaksïni jarhuataati parajtsï míteni ‘nani engajtsï ísï jatsika para xanharani’ (Isaías 48:17). ¿Néna uaa i ambe? Bibliaeri prinsipiuecha jingoni. Bibliaeri prinsipiuechaksï jindeesti jurhimbikuecha engaksï kánikua jukaparhakueka ka engajtsïni jarhuatajka kurhanguni ambe enga Tata Diosï Jeoba eratsejka ka pʼikuarherani. Ka engachi arhintajka Bibliani, úsïngachi exeni ambe enga eratsejka Tata Diosï ka na enga pʼikuarherajka. Míteni ambe enga Tata Diosï Jeoba eratsejka, jarhuatasïndijtsïni parachi imani ambe erakuni úni enga ima uékajka.
2. ¿Ambejtsï jatsipirini para miáni ante dejtsï erakuni úni ambe ma?
Biblia uandasïndi eska ‘ima enga jánhaskatiika jingontku exesïnga ambe’ (Proverbios 14:15). I ambe arhikuekasïndi eskachi ante de erakuni úni ambe ma, jatsiskachi para eratsentani ambe ka ambechi úpirini úni. Engachi exeaka ambe ka ambechi úpirini úni, ju je kurhamarhikuarhini: “¿Náki Bibliaeri prinsipiuechaksï uandasïni íri ambe? ¿Nákini erakua parani agustu pʼikuarherani? Ambe engani erakuaka úni, ¿néna uaa sési úkuni o no sési úkuni máteruechani? Ka sánderu jukaparhakua ambe, ¿ambe engani erakuaka úni sési pʼikuastaa Tata Diosï Jeobani?” (Deuteronomio 32:29).
Tata Diosïjtsïni úsïndi arhini ambe enga sési jaka ka ambe enga no sési jaka. Engachi sánderu sési míteajka imeeri leichani ka prinsipiuechani ka engachi erakujka kurhajchani, ambakiti konsiensiachi ma jatsisïnga. Konsiensia ima ambeesti engajtsïni arhijka ambe enga sési jaka ka ambe enga no sési jaka (Roma 2:14, 15). Konsiensia ma enga sési jorhendakata jaka jarhuatasïndijtsïni parachi ambakiti ambe erakuni úni.
JORHENGUARHI JE SÁNDERU AMBE
Ju je sánderu jorhenguarhini na engajtsïni Bibliaeri prinsipiuecha ka juchaari konsiensia jarhuataaka engachi erakuni jámaaka úni ambe ma.
3. Jurajku je eskaksïni Biblia jarhuataaka
¿Nénajtsïni jarhuatasïni Bibliarhu anapu prinsipiuecha engachi erakuni jámajka úni ambe ma? Exe je BIDEUNI ka uandontskuarhi je íri ambe:
¿Ambeeski libre albedriu?
¿Andijtsïnisï Tata Diosï Jeoba íntsku libre albedriu?
¿Ambejtsïnisï íntsku Tata Diosï parajtsïni jarhuatani sési úrani libre albedriuni?
Ju je exeni Bibliaeri prinsipiu ma, arhinta je Efesu 5:15, 16. Tátsekua exe je nénajtsï uaa “no xáni ísku tiempu tsïtani” jarhani parajtsï úni...
... pauani pauani Bibliani arhintani.
... sánderu ambakiti uámbeeni, témbeeni, taatiini o naandiini, o uájpeeni.
... tánguarhikuecharhu nirani.
4. Sési jorhenda je chaari konsiensiani parajtsï erakuni ambakiti ambe úni
Enga Bibliarhu jaka juramukua ma engajtsïni arhijka ambe úni, sánderu fásiliisïndi imani ambe úni enga sési jaka. Peru ¿enga no jauaka ambe ma engajtsïni meru arhiaka ambe úni? Exe je BIDEUNI ka uandontskuarhi je íri ambe:
Eska na xarharajka bideurhu, ¿ambe úspi pirenchi para sési jorhendani imeeri konsiensiani ka imani ambe erakuni úni enga Tata Diosï Jeoba jaiapanhintajka?
¿Andichisï no jatsipirini para nemani arhini eskajtsïni arhiaka ambe úni? Arhinta je Ebreu 5:14 ka uandontskuarhi je íri ambe:
Nájkiruka sánderu fásiliipiringa arhini nemani eskajtsïni arhiaka ambe úni, ¿andichisï jatsi para sési jorhenguarhini exeni ambe enga sési jaka?
¿Náki jarhuajperatechaksï jarhaski engajtsïni uaaka jarhuatani parachi sési jorhendani juchaari konsiensiani ka parachi ambakiti ambe erakuni úni?
Mapajtsïni ma arhisïndi naniisïchi niua, ka konsiensia ísïisti komueska mapa ma, jimbokajtsïni arhisïnga ambe úni juchaari tsípikua jingoni.
5. Kuenta ú je máteruecheri konsiensiani
Jimbokachi iáminduecha ménderueniska, nóchi iáminduecha májkueni ambe erakusïnga úni. ¿Nénachi uaa xarhatani eskachi kuenta úsïnga máteruecheri konsiensiani? Ju je exeani tsimani ejempluechani.
Ejemplu 1: Pirenchi ma enga tsitijka atanharhintani, kúnguarhikuarhu ma niárasïndi nani engaksï pirenchicha no sesi exejka eska nema atanharhintaaka.
Arhinta je Roma 15:1 ka 1 Korintu 10:23, 24, ka uandontskuarhi je íri ambe:
Eskaksï na arhijka i tekstuecha, ¿ambe jatsipirini para úni i pirenchi enga tsitijka atanharhintani? Ka chá, ¿ambejtsï úpirini enga máteru nemeeri konsiensia no jurajkujka úni ambe ma, peru engaksïni chaari konsiensia arhijka eska no no sési jarhaska?
Ejemplu 2: Erachi ma mítesti eska Biblia uandasïnga eska no no sési jarhaska alkoli sáni arhani; peru ima no arhasïndi. Ka ma jurhiatikuaksï pʼímarhisïndi nirani sáni tsípikuarhini ka exesïndi eskaksï máru erachicha alkoli sáni arhaxaka.
Arhinta je Eclesiastés 7:16 ka Roma 14:1, 10, ka uandontskuarhi je íri ambe:
Eskaksï na arhijka i tekstuecha, ¿ambe úpirini ima erachi? Ka ¿ambejtsï úpirini chá engajtsï exepiringa nemani imani ambe úni jarhani engaksïni chaari konsiensia no jurajkujka?
¿Ambejtsï jatsiski para úni parajtsï erakuni ambakiti ambe úni?
1. Kurhaku je Tata Diosï Jeobani eskaksïni jarhuataaka míteni ambe úni (Santiagu 1:5).
2. Jirinha je informasioni Bibliarhu ka publikasionicharhu engaksï Bibliarhu pʼitakata jaka parajtsï exeani prinsipiuechani engaksï íri ambe uandajka. Ístujtsï uaaka kurhamarhiani erachichani engaksï sési míteka Bibliaeri ambe.
3. Eratsi je na enga pʼikuastaaka chaari konsiensiani ka ístu máteruecherini ima ambe engajtsï uaaka.
MÁRUKSÏ I AMBE UANDASÏNDI: “Tʼuri uaaka úni ambe engari uékaaka úni. ¡No arhiati ambe engaksï kʼuiripuecha eratseaka!”.
¿Andichisï jatsipirini para exeni na enga p’ikuarheraaka Tata Diosï ka máteru kʼuiripuecha?
AMBE ENGACHI JORHENGUARHIKA
Ambakiti ambechi erakusïnga úni engachi exejka ambe eratsesïni Tata Diosï Jeoba ambe máeri ka engachi exejka sinchi jarhuataua o no sési pʼikuastaua máteruechani imani ambe jimbo engachi uaaka.
Ambejtsï jorhenguarhiski
¿Nénajtsï uaa ambakiti ambe erakuni úni enga Tata Diosï Jeoba jaiapanhentaaka?
¿Ambejtsï uaa úni parajtsï sési jorhendani chaari konsiensiani?
¿Nénajtsï uaa xarhatani eskajtsï kuenta úsïnga máteruecheri konsiensiani?
ÍSTU EXE JE INI AMBE
¿Nénajtsï uaa ambakiti ambe erakuni úni parajtsï sánderu sési pájperani Tata Diosï jingoni?
Ju je sánderu sési kurhanguni na engajtsïni arhistachijka Tata Diosï Jeoba.
Exe je ambe jarhuataspi acheetini ma erakuni úni ambe ma enga kánikua úkua jukapka.
Ju je sánderu ambe exeni nénajtsï uaa sési pʼikuastani Tata Diosï Jeobani jiáni engajtsïni no meru arhiaka ambechi jatsiski para úni.
-