¿Káni kʼamakurhia i parhakpini?

Ambe enga Biblia uandajka

Parachi úni míteni káni kʼamakurhia i parhakpini, uétarhisïndi míteni ambe enga xáni arhikuekajka enga Biblia úrajka uandakuani “parhakpini”. Uandakua griegu kósmos, enga sáno méntkisï tradusirikuarhijka “parhakpini”, someni kʼuiripuechani arhikuekasïndi, ka sánderu imeechani engaksï jarharitini jaka Tata Diosïni ka engaksï no újka ambe enga ima uékajka (Juanu 15:18, 19; 2 Pedru 2:5). Ístu, ménichani úrakuarhesïndi uandakua kósmos para imani ambe arhikuekani engaksï kʼuiripuecha xáni újka (1 Korintu 7:31; 1 Juanu 2:15, 16).a

¿Ambeeski “kʼamakurhini i parhakpini”?

I uandakua “kʼamakurhini i parhakpini”, enga uánikua Bibliechani jimbo úrakuarhejka, ístu arhikuekasïndi “kʼamakurhini i tiempu” o eska “kʼamarhukuxakaia i jurhiatikuecha” (Mateu 24:3). No arhikuekasïndi eska iámu kʼuiripuecha o eska Echeri kʼamajkunhaaka, sino, imani ambe enga kʼuiripuecha xáni úni jaka (1 Juanu 2:17).

Biblia uandasïndi eska “no sési úrichaksï kʼamajkunhaaka” paraka imeecha engaksï ambarhati kʼuiripueka uaaka sési irekani Echerirhu (Salmo 37:9-11). I kʼamajkukua jiáni úkuarhiati enga ʻkánikua no sési nitamakuarhinhaaniʼ jauaka ka Armajedonirhu kʼamarhukuati (Mateu 24:21, 22; Jaŋaskuecha 16:14, 16).

¿Káni kʼamakurhia i parhakpini?

Jesúsi uandaspti: “Joperu no nema mítesti na jatini ka na jandora úkuarhia i ambe, ánjelichajtuksï no mítesti engaksï auandarhu jaka, nijtu Uájpa, Taatijkusï míteti” (Mateu 24:36, 42). Ístu uandaspti eska repentkupirhinga, ʻima jandora juuati engajtsï chá no jamberi erokuarhini jauakaʼ (Mateu 24:44).

Nájkirukachi no míteka ambe jurhiatikua ka ni ambe jándu oreua, Jesúsi uandaspti máru ambeeri enga úkuarhini japiringa ka enga jindeepiringa seniali para úni míteni eska tiempueskia para kʼamarani i parhakpini (Mateu 24:3, 7-14). Para íni tiempuni arhini Biblia úrasïndi “últimu jurhiatikuecha”, “últimu jurhiatikuecharhu” ka “últimu jurhiatikuecha jimbo” (Daniel 12:4; 2 Timoteo 3:1-5).

¿Útasï pakara ambe ma enga nitamaakia parhakpini kʼamarhukua?

Jo. Echeri seguirini jauati jarhani, jimboka Biblia uandasïnga: “No méni manatanhaati jima jauati para méntkisï” (Salmo 104:5). Ístu, Biblia aiatspesïndi: “Echeri jurhimbiticheriuati, ka jimaksï irekaati para méntkisï” (Salmo 37:29). Tata Diosï uaati eska ísï úkuarhiaka eska ima na aiatspipka desde uénakuarhutki:

• Echeri paraisu máeuati (Isaías 35:1; Lukasʌ 23:43).

• Seguru irekanhaati ka no ma ambe kueratanchanhaani (Miqueas 4:4).

• Iáminduechaksï ambakiti ánchikuarhita ma jatsikuarheati ka sési pʼikuastauati (Isaías 65:21-23).

• Nóteru pʼamenchanhaatia ni tʼarepenhaani (Job 33:25; Isaías 33:24).