¿Uaarini Biblia jarhuatani engani nóteruni uékajkia irekani ka eratseni jarhani uándikukuarhini?

Ambe enga Biblia uandajka

Jo, uaatiksïni jarhuatani, jimboka Tata Diosïri Karakateska ka ima sési pʼikuatantaasïndi imeechani engaksï kómu pʼikuarherani jarhajka (2 Korintu 7:6). Nájkiruka Biblia no libru máeka para jarhuataani imeechani engaksï éjpurhu pʼamenchani jaka, uánikua kʼuiripuechani jarhuataastia engaksï eratseni japka uándikukuarhini. Biblieri konsejuecha engaksï kánikua marhuajka, chánksïntuksïni uaati jarhuatani.

• ¿Nákiskiksï Biblieri konsejuecha engaksï kánikua marhuajka?

• ¿Biblia uandasïni ima kʼuiripuecheri engaksï uékeenga uarhini?

• ¿Náki Biblieri tekstuechaksïni uaa jarhuatani engajtsï ma repentku eratseni jauaka uándikukuarhini?

• ¿Ambechi uaa íni engajtsïni amigu ma arhiaka eska nóteru uékasïngia irekani?

• ¿Ka engani ménisï jámakia uékani uándikukuarhini?

¿Nakiskiksï Biblieri konsejuecha engaksï kánikua marhuajka?

• ● Aiangukuarhi je nemani ma engajtsï pʼikuarherani jaka.

  Ambe enga Biblia uandajka: “Ambakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17).

  Ambe enga arhikuekajka: Engachi imani ambe eratseni jarhajka engajtsïni uandanhiatajka, uétarhinchanchi jarhasïnga eskajtsïni jarhuataaka.

  Engajtsïni no nemani aianguska na engajtsï pʼikuarherani jaka, úkua jukaati parajtsï úni orhepani uérani. Joperu engajtsï aiangukuarhiaka nemani na engajtsï pʼikuarherani jaka, nóterujtsï xáni no sési pʼikuarheraakia ka ménderuentsï exeuakia chaari uandanhiatechani.

  

  Uaakajtsï ini ambe úni: Iásï mismu uandontskuarhi je nemani jingoni, chaari parienti o amigu ma jingoni engajtsï chá mintsikajka.a Ístujtsï uaaka karani na engajtsï pʼikuarherani jaka.

• ● Ni je doktori jingoni.

  Ambe enga Biblia uandajka: “Imeecha engaksï sési jámani jaka nóksï uétarhinchasïndi doktorini, joperu pʼamenchatichaksï kʼóru jo” (Mateu 9:12).

  Ambe enga arhikuekajka: Engachi pʼamenchani jarhajka, jatsisïngachi para doktori jingoni nirani.

  Enga ma eratseni jarhajka uándikukuarhini, xarhatani jarhasïndi eska pʼamenchani jarhasïnga éjpurhu o pʼikuarhinhikuecharhu. Ísï eskachi na no kʼuratsejka engachi pʼamenchani jarhajka, ístuchi no jatsiska para kʼuratseni engachi pʼamenchani jauaka éjpurhu o pʼikuarhinhikuecharhu, jimbokachi uaaka tsinakuarhini.

  Uaakajtsï ini ambe úni: Sóntku jirinha je doktorini ma enga sési mítekuka iiri ambe.

• ● Miá je eskaksïni Tata Diosï kánikua jukaparharasïnga.

  Ambe enga Biblia uandajka: “Sinko pájaruechaksï íntspikuarhinhasïndi sántku sentabu jimbo, ¿no ísïiski? Joperu Tata Diosï méntku no ma mirikurhisïndi. [...] Asï ché je. Chájtsï sánderu jukaparhaska eska uánikua pájaruecha” (Lukasʌ 12:6, 7).

  Ambe enga arhikuekajka: Chájtsï kánikua jukaparhakueska para Tata Diosï.

  Jamberijtsï chá jandiajku pʼikuarherajka, joperujtsï no jandiajku jarhaska. Tata Diosï mítesti ambe engajtsï nitamakuarhini jaka. Ka nájkirukajtsï ísï pʼikuarherajka eskajtsï nóteru uékasïngia irekani Tata Diosï uandanhiasïndi chánksïni jimbo. Salmo 51:17 uandasïndi eska Tata Diosï no jurajkua ‘mintsitani ma enga kánikua no sési pʼikuarherani jaka ka enga nóteru jatsijkia uinhapikua’. I ambe xarhatasïndi eskaksïni Tata Diosï xénchasïnga ka eska uékasïnga eskajtsï chá seguiriuaka irekani.

  Uaakajtsï ini ambe úni: Jirinhanta je Bibliarhu nani enga uandajka eskaksïni Tata Diosï xénchasïnga. Por ejemplu, uaakajtsï exeantani máru librurhu Acerquémonos a Jehová kapitulu 24 jimbo.

• ● Kómarhi je Tata Diosïni.

  Ambe enga Biblia uandajka: “Jurajkua je iámindu chaari pendientichani imani jingoni, jimboka ima pendienti pásïnga chánksïni jimbo” (1 Pedru 5:7).

  Ambe enga arhikuekajka: Tata Diosï uékasïndi eskajtsï aiangukuarhiaka imani na engajtsï pʼikuarherani jaka ka ambe engaksïni uandanhiatajka.

  Tata Diosïksïni uaati íntskuni pínandikua ka uinhapikua paraka úni orhepani uérani (Filipusʌ 4:6, 7, 13). Ísïsï jarhuataajti Tata Diosï imeechani engaksï andarhierajka imani (Salmo 55:22).

  

  Uaakajtsï ini ambe úni: Kómarhi je Tata Diosïni iásï. Úra je imeeri nombrini Jeoba, ka aiangukuarhi je na engajtsï pʼikuarherani jaka (Salmo 83:18). Arhi je eskajtsï jarhuataaka orhepani uérani.

• ● Eratsenta je ambe engaksïni Biblia aiachijka para sánderu orhepani.

  Ambe enga Biblia uandajka: “Ka i ambe enga jucha erokani jaka” ísï jarhasti komueska ankla ma juchaari irekuarhu (Ebreu 6:19).

  Ambe enga arhikuekajka: Uaakajtsï ísï pʼikuarherajka enajkiksïni axuani ka axuani pájki uandanhiatecha, ísï eska kʼéri janikua ma na pájka barkuni ma. Joperu engajtsï miáni jauaka ambe engajtsïni Biblia aiachijka, jarhuataatiksïni parajtsï ísï jarhani komueska ankla ma, no sáni manakuarhini.

  I erokuarhikua no ísku ambeesti, Tata Diosïsï aiatspeni jati ka uandasïndi eska kénditaaka iámu ambe engajtsïni uandanhiatajka (Jaŋaskuecha 21:4).

  Uaakajtsï ini ambe úni: Arhinta je foietuni Ambakiti ambe enga Tata Diosïrika pájina 5, parajtsï míteni sánderu ambe engajtsïni Biblia aiachijka.

• ● Ú je imani ambe engajtsï tsitijka.

  Ambe enga Biblia uandajka: “Mintsita ma enga tsípini pʼikuarherajka ísïisti eska ambakiti medisina” (Proverbios 17:22).

  Ambe enga arhikuekajka: Imani ambe úni engachi tsitijka, jarhuatasïndijtsïni parachi sési pʼikuarherantani engachi pʼamenchani jarhajka éjpurhu o pʼikuarhinhikuecharhu.

  

  Uaakajtsï ini ambe úni: Imani ambe ú je engajtsï míteka eskajtsï tsitisïnga. Por ejemplu, kurhaa je imani kústakuani engaksïni sési pʼikuastajka, arhinta je imani ambe engaksïni uinhaperantajka o máteru ambe. Ístujtsï sánderu tsípini pʼikuarheraaka engajtsï jarhuataaska máteruechani, nájkiruka sapichitu ambe jingoniuaka. (Ukuecha 20:35).

• ● Kuidarikuarhi je parajtsï no pʼamenchani.

  Ambe enga Biblia uandajka: “Marhuasïndi ejersisiu úni” (1 Timoteo 4:8).

  Ambe enga arhikuekajka: Kánikuaksïni marhuacheati engajtsï uaaka ejersisiu, sési kʼuíni ka imani ambe jingoni tʼireni engaksïni sési úchiaka.

  Uaakajtsï ini ambe úni: Ni je xanharani, joperu sáni uinhamu, nájkiruka solu kinse minutu ísïiuaka.

• ● Miá je eskaksï pʼikuarhinhikuecha mójtakurhisïnga ísï eska máteru ambe.

  Ambe enga Biblia uandajka: “Nójtsï míteska ambe enga úkuarhiaka pauani” (Santiagu 4:14).

  Ambe enga arhikuekajka: Problemecha engajtsïni no sési pʼikuastajka, asta imeecha engachi eratsejka eskachi uaaka sési peuantani, tiempu jingonksï uaati nóteru jarhania.

  Na uéjkijtsïi xáni kʼéri uandanhiata ma jatsini iásï, pauani uaati mójtakurhini, Ísï jimbo, asï kuatanta je (2 Korintu 4:8). Problemecha engaksïni uandanhiatajka, tiempu jingonksï uaati mójtakurhini, joperu enga kʼuiripu ma uándikukuarhijka, inde ambe kʼóru nóteru úsïndi mójtakurhini.

  Uaakajtsï ini ambe úni: Arhinta je Bibliarhu imani kʼuiripuecheri engaksï no sési pʼikuarherani japka ka engaksï jamberi uékengia uarhini. Exe je na engaksï sési pʼikuarherantapka ka ménichani nóksï jamberi kuenta íntskukuarhespti nena enga úkuarhipka inde ambe. Ju je exeani máru ejempluechani.

¿Biblia uandasïni ima kʼuiripuecheri engaksï uékeenga uarhini?

Jo. Biblia uandaasïndi máru kʼuiripuecheri engaksï uékeenga uarhini. Tata Diosï no ikiaspti imeecha jingoni, sánderu sési arhiaspti eska jarhuataapiringa. Ima uaati májkueni úni chánksïni jingoni.

Elíasi

• ● ¿Neespi Elíasi? Profeta ma enga kánikua balori jukapka, peru niáraspti ménisï kómu pʼikuarherani. Santiagu 5:17 uandasïndi eska ‘Elíasi jindeespka achamasï ma enga májku jásïipka eska jucha’.

• ● ¿Andisï uékeni uarhini? Elíasi ménisï jandiajku pʼikuarherasïreendi, chéni ka niáraspti eratseni eska no ma ambe marhuasïreenga. Ísï jimbo, kómarhispti Tata Diosïni: “Oh Jeoba, euantarini tsípikua” (1 Reyes 19:4).

• ● Ambe jarhuataspi? Elíasi uénhekuarhispti Tata Diosï jingoni ka aianguspti na enga pʼikuarherani japka. ¿Néna uinhaperantaspi Tata Jeoba? Xarhatakuspti eska uandanhiasïreenga imani jimbo ka xarhatakuspti na enga xáni uinhapitika. Ístu arhispti eska kʼuiripu máespka enga kánikua jukaparhakuepka ka axakuspti jarhuajpirini ma enga úpiringa sési kuidarini.

• ▸ Arhinta je Elíasiri ambe: 1 Reyes 19:2-18.

Jobu

• ● ¿Neespi jobu? Achamasï ma enga rikuepka, enga kʼéri familiani ma jatsipka ka enga sési marhuakuni japka Tata Diosï jurhimbitini.

• ● ¿Andisï uékeni uarhini? Mátirku uánikua uandanhiatechani jatsiaspti. Tsïtaspti iámindu ambe enga jatsikuarhekua, iámindu imeeri uájpeechaksï uarhispti enga no sési ambe úkuarhipka ka no sési jásï pʼamenchakua ma pʼiraspti. Ka sánderu no sési ambe, máru kʼuiripuechaksï arhispti eska imeeri kulpespka enga imani ambe nitamakuarhini japka, nájkiruka no ísïipka. Jobu kuatantasptia ísï irekani, jimbosï uandapti: “Nóteruni uékasïngia irekani” (Job 7:16).

• ● ¿Ambe jarhuataspi? Jobu kómarhispti Tata Diosïni ka ístu uandontskuarhespti máteruecha jingoni (Job 10:1-3). Kánikua uinhaperantaspti Eliu enga kurhangutspitipka ka jarhuataspti paraka ménderueni exeapiringa imeeri problemechani. Joperu sánderu jukaparhakua ambe, jindeespti eska Jobu jiókuarhispka eska Tata Diosï arhistakupiringa ka jarhuatani.

• ▸ Arhinta je Jobueri ambe: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisési

• ● ¿Neespi Moisési? Orhejtsïkuti ma ióntki anapu Israeliri ka ambakiti profeta ma.

• ● ¿Andisï uékeni uarhini? Moisési kánikua ánchikuarhita jatsispti ka méntkuksï arhinchani jarhasïreendi jimbosï niáraspti kuatantani. Ka arhipti Tata Diosïni: “Jimboetakua, mátirkurini uándiku” (Números 11:11, 15).

• ● ¿Ambe jarhuataspi? Moisési aianguspti Tata Diosïni na enga pʼikuarherani japka. Ka ima úspti eska nóteru xáni ánchikuarhita jatsipiringia para nóteru xáni no sési pʼikuarherania.

• ▸ Arhinta je Moisésiri ambe: Números 11:4-6, 10-17.