Libru ma enga uétarhijka arhintani
Biblia, libru máesti enga iónisï sánderu etsakurhikia. Iónistia, enga iápuri isï anapu kʼuiripuecha sésiksï irekani jakaia, exentastiksïa sési pʼikuarherakua ma, ka erokuarhikuaksï ma jatsistia, úparini ambe enga jima uandajka. ¿Cha arhintaskia ini ambakiti libruni? Joperu, útasï uánikua kʼuiripuecha jarhasti engaksï nótki arhintani jaka, —jakajkuticha o nombe— ka uékapirindiksï sánderu sési mítini i libruni. Enga cha uéjka isï úni, i takukataksïni jarhuauati.
ANTE de cha uénani arhintani Bibliani, uétarhisïndi eskajtsï mítiaka máru ambe. Biblia, ístu mítikuarhesti eska Pímbinhasï Karakata, ka jukanharhiasti 66 libruecha. Orheta libru jindesti Génesis ka ultimu jindesti Jaŋaskuecha, o Apokalipsisi.
¿Né kararkuarhiski Bibliani? Ambakiti kurhamarhikua máesti. Kuarenta isï achaticha karantasptiksï inde 66 libruechani ka mili seisientusi uéxurhini jimbo isï kʼamakustiksï karantani. Joperu imaksï engaksï karaka, nóksï méni uandaspti eska imecherispka i karakata. Sánderu sési, ma uandaspti: “Iámindu Diosïri karakata, Diosïni jimboesti” (2 Timoteo 3:16). Ka máteru uandaspti: “Jeobaeri espirituespti enga uandapka jíndeni jimbo, ka imeri uandakuecha juchiti penchumikua jimbo jarhasptiksï” (2 Samuel 23:2). Eskachi na exekia, ima kararicha uandasptiksï eska Jeoba, sánderu Kʼéri Juramuti iámindu amberi, imasï Kararkuarhika Bibliani. Ka jimintsïni arhisïndi eskajtsïni ima íntskuska Bibliani, para jucha úni mítini imani.
Jukaparhakuesti mítini ambesï sánderu uandajki Biblia. Orhepatini exentsï jauaka eska, Génesis uératini asta Jaŋaskuecharhu, iámindu Biblia i ambe uandasïnga, eska: Tata Diosï uaxastaka juramukua ma auandarhu, paraka janhanharhinhaka ka paraka mítinhaka eska imajku jindeska enga sésikua jatsika para kʼuiripuechani juramukuani.
Pʼimarhisïngaksïni parajtsï ini ambe eratsini engajtsï arhintani jauaka Bibliani, inde libruni enga xáni jukaparhakueka.
a Mámaru jásï jarhasti para uandani fechechani. Joperu i takukatani jimbo, úrani jauakachi (a. de J.) ante de Jesusi, uánikua kʼuiripu isï mítisti para arhikuekani ante de juchari jurhiatikuecha, joperu Jesusi andajpenusti uéxurhini 2 jimbo isï ante de uéxurhini 1 juchari jurhiatikuecharhu. Ka enga cha exeaka (d. de J.) jindesti despuesi de Jesusi. Mándani pájinarhu, kétsekua raia ma jauati, ka jimintsï abrebiadu exeaka.