¿Nénaksïni uá jarhuatani kómarhikua?

Pamela uinhamu pʼamenchaxapti ka niraspti doktori jingoni. Joperu ístu kómarhispti Tata Diosïni ka kurhakuspti uinhapikua para tekaantani enga xáni no sési nitamakuarhini japka. ¿Jarhuataspi kómarhini Tata Diosïni?

Ima uandasïndi: “Engani tratamientu intsïnhani japka kánseri jimbo, kánikua chésïrenga. Joperu engani kómarhienga Jeobani, sési pʼikuarherantasïrenga ka úsïrenga sési eratseni ambe úni. Útasïni kánikua no sési pʼikuarherasïnga kánseri jimbo, joperurini kómarhikua jarhuatasïndi parani ambakiti ambe eratseni jarhani. Engajtsïni kurhamarhijka, ¿nári jarhaski? Ji arhiasïnga: ‘No xáni sési, peruni tsípixaka’”.

Ísïsti, no uétarhisïndi eskachi no sési ambe nitamakuarhiaka parachi kómarhini Tata Diosïni. Iáminduechachi jatsiasïnga uandanhiatechani kʼérati o sapirhati ka uétarhinchasïngachi jarhuajperata parachi úni orhepani uérani. ¿Marhuasïni kómarhikua úni?

Biblia uandasïndi: “Jeobani jurajkuku chíti uandanhiata, ka imakeni jarhuataati. No méni jurajkuati eska kʼuiripu jurhimbiti ma no sési nitamakuarhiaka” (Salmo 55:22). ¡Xáni engajtsïni uinhaperantajka i uandakuecha! Jiájkani, ¿nénajtsïni jarhuatasïni kómarhini Tata Diosïni? Engachi ísï kómarhijka Tata Diosïni eska ima na jaiapanhentajka, imajtsïni íntskuati ambe engachi uétarhinchaaka parachi orhepani uérakuani uandanhiatechani (exe je rekuadruni “Na engajtsïni marhuachijka kómarhikua úni”).

Na engajtsïni marhuachijka kómarhikua úni

Pínandikua jatsini

Kurhaku je “ambe engajtsï uétarhinchajka, [...] ka ísï Diosïri pínandikua enga no nema újka jánhaskani, kuájpiauati chári mintsitechani ka chári eratsekuechani Kristu Jesusini jimbo” (Filipusʌ 4:6, 7). Engachi aiangukuarhiska Tata Diosïni ambe engajtsïni uandanhiatajka, nájkirukachi kánikua uandanhiani jauaka, imajtsïni jarhuataati no xáni no sési pʼikuarherani ka parachi imani ambe úni enga sési jaka.

Jánhaskakua jatsini

“Enga nema kueratajka jánhaskani ambe, kómarhie Diosïni eska jánhastaaka ka ima ísï uáti, jimboka ima tsípikua jingoni jánhastaasïnga iáminduechani ka no nemani ikiakuni” (Santiagu 1:5). Engachi kánikua uandanhiani jarhajka, ménisïchi imani ambe úsïnga enga no sési jaka. Joperu engachi kurhakuska Tata Diosïni eskajtsïni jarhuataaka sési eratseni, imajtsïni jarhuataati parachi miántaani ambakiti konsejuechani engaksï Bibliarhu jaka.

Sésijtsïni pʼikuastantaati ka uinhaperantani

“Uinhapikua enga xáni kʼéri ambeka, [...] Diosïris[ti]” (2 Korintu 4:7). Jimboka Jeoba jindesti Tata Diosï enga iámindu ambe újka úni, uinhaperantaatijtsïni parachi úni orhepani uérakuani uandanhiatechani o parachi úni tekaantani engachi tsʼéjkukuechani jatsiauaka (Isaías 40:29). Biblia ístu arhisïndi eska Jeoba jindeeska Tata “Diosï enga uinhaperpintajka iámindu ambe jimbo”, engajtsïni sési pʼikuastantajka “iámindu juchari uandanhiatechani jimbo” (2 Korintu 1:3, 4).

KÓMARHIKUAKSÏNI ÍSTU UÁTI JARHUATANI

Ísïsti, Jeobaksïni no arhisïndi eskajtsï meru jatsiska para kómarhini, joperuksïni uékperakua jingoni pʼímarhisïndi parajtsï ísï úni (Jeremías 29:11, 12). ¿Ka engajtsï ióntkisï kómarhikia Tata Diosïni ka ísïjtsï pʼikuarherani eskaksïni no méni mókuchintaska? Asï kuatanta je ni no sési pʼikuarherani. Táticha engaksï uandanhiajka uájpecha jimbo, nóksï méntkisï ísï jarhuataasïndi ni jiáni engaksï imecha uékani jarhajka. Jamberiksï táticha ménderueni eratseni jarhajti jarhuataani. Joperu táticha engaksï xénchpitiika méntkisïksï jarhuataasïndi uájpechani.

Tata Diosï Jeoba, Táti enga sánderu xénchpitiika, ístuksïni uékasïndi jarhuatani chánksïni. Engajtsï sési eratseantaska Bibliaeri karakatechani engachi exeakia ka jánguarhintantsï ísï úni, Tata Diosïksïni mókuchiantauati chári kómarhikuechani eska ima na sánderu sési exeaka (Salmo 34:15; Mateu 7:7-11).