¿Andiksïsï Jeobaeri testiguecha no inchamukujki politikarhisï?
Jeobaeri testiguechachi no inchamukusïnga politikarhisï, relijioniri ambe jimbo enga Bibliarhu pʼitakateka. Nochi jindeska grupu ma enga inchaakujka politikarhisï para afuersa intsïnhani ambe ma, nochi ma partidu jimbo botarisïnga o nema jimbo, nochi nirasïnga enga botarinhani jámaaka parachi intsïnhani ánchikuarhita ma ka nochi ma ambe úsïnga para mójtakuani gobiernuechani. Exentaskachi Bibliarhu ambakiti ambe engachi jimbo no inchamukujka politikarhisï. Ariksï jindesti:
Jatsiskachi para májkueni úni eska Jesusi, enga no jiókuarhipka ánchikuarhita ma politikarhu (Juanu 6:15). Jesusi uandaspti eskaksï imeri jorhenguarhiticha no jatsispka para ‘parhakpinirhu anapueni’, jimboksïsï no ma partiduni jatsipti para apoiarini (Juanu 17:14, 16; 18:36; Markusʌ 12:13-17).
Jatsiskachi para sési apoiarini Tata Diosïri Reinuni, imani gobiernuni enga Jesusi arhikuekani japka arini uandakuecha jingoni: “I ambakiti eianhperakua Diosïri juramukueri, eianhpinhaati iápuru parhakpinirhu” (Mateu 24:14). Jimbokachi Tata Diosïri Reinuni jingoniiska, nochi inchamukusïnga politikarhisï no ma paisi jingoni, ni jima anapu jingoni engachi irekaka (2 Korintu 5:20; Efesu 6:20).
Engachi no inchamukuaka politikarhisï uákachi eianguani Tata Diosïri Reinueri ambe iáminduechani, no arhiparini ambe engaksï eratsijka politikaeri ambe. Juchari úkuecha ka uandakuecha jingoni, jánguarhisïngachi xarhatani eskachi mintsikasïnga eska Tata Diosïri Reinu jindeska gobiernu enga sési péntauaka parhakpini anapu problemechani (Salmo 56:11).
Engachi inchamukupiringa politikarhisï, nóteruchi májku kʼéri úkuarhintstini japiringia juchari erachicha jingoni interu parhakpini (Kolosasi 3:14; 1 Pedru 2:17). Relijionicha engaksï inchamukujka politikarhisï nóksï májku kʼéri úkuarhintatixati (1 Korintu 1:10).
Respetariuasïngachi gobiernuechani. Nájkirukachi no inchamukujka politikarhisï, respetarisïngachi juramukuani imecheri engaksï gobernarijka. Ka ísï, úsïngachi eska na uandajka Biblia ixú Roma 13:1: “Janhanharhia je imechani engaksï juramukua jatsika”. Úsïngachi ambe engaksï leicha uandajka, meiampisïngachi impuestuechani ka úsïngachi eska gobiernu na uandajka para kʼuiripu sési jarhani. Enbesi de uékani úni ambe ma para kʼamajkuni gobiernuni; úsïngachi ambe engajtsïni Biblia arhijka, kómarhijpikuani “reichani ka iámindu juramutichani”, sánderu jiáni engaksï jatsiaka para erakuni úni ambe ma enga uáka eska kʼuiripu nóteru uákia jatsini relijioni ma (1 Timoteo 2:1, 2).
Ístuchi respetarisïnga sésikua enga mándani kʼuiripu jatsika para eratsikuarhini politikaeri ambe. Ejemplu ma, nochi jámasïnga ójkutpini enga botarinhani jámaaka ka ístuchi no nemani inchaakukusïnga enga eratsiaka botarini.
¿Jimbanhi ambeski no inchamukuni politikarhisï? Nómbe. Apostulicha ka máteru kristianuecha primeru siglurhu anapuecha májkuenksï úspti, nóksï inchamukuspti politikarhisï. Libru ma enga íri ambe uandajka arhisïndi: “Nájkirukaksï jakajkuenga eskaksï jatsispka para respetariani gobiernuechani, primeru kristianuechaksï exesïrendi eskaksï no jatsispka para inchamukuni politikarhisï” (Beyond Good Intentions—A Biblical View of Politics [Más que buenas intenciones. La visión bíblica de la política]). Ístu, teólogu Orígenes enga irekapka siglurhu II ka III, karaspti: “Kristianuechaksï no jiókuarhisïndi ánchikuarhita ma politikarhu”.
¿Peligru máeski para kʼuiripuecha engachi no inchamukujka politikarhisï? Nómbe. Gobiernuechaksï no jatsisti para chéni, jimbokachi kʼuiripuecheska engachi pínandikua jirinhajka. Ju je exeni ejemplu ma, ambe enga uandaenga informi ma enga 2001 jimbo petapka Academia Nacional de Ciencias de Ucrania. Arini ambe uandaspti engachi no inchamukujka politikarhisï: “Uáti eskaksï no iáminduecha sési exeaka engaksï Jeobaeri testiguecha no inchamukujka politikarhisï. Ka ini ambe jimbominduksïsï ónhatarkuarhiapti gobiernuecha nasi ka komunista”. Informi seguirisïndi uandani eska nájkirukaksï Testiguecha no sési kánhaenga gobiernu jimbo Unión Soviética anapu “méntkisïksï respetariuaspti leichani”, eskaksï “no ma ambe sïpasïrenga ánchikuarhitarhu ka eskaksï jarhuajpesïrenga granjecharhu ka fabrikecharhu” ka eskaksï “no méni niáraspka peligru máeni para gobiernu komunista”. Informi kʼamarasïndi uandaparini eskaksï jakajkukuecha ka úkuecha iásï anapu Jeobaeri testiguecheri “no úsïnga eska paisi ma no sési irekaaka ni eska no májku kʼéri jauaka”.