Exe je ambe engaksï máteruecha sési újka

Andisï úkua jukajki

Kʼéramakuarhini, uáti úni eska ma menusi újpiaka. Kʼuiripu ma enga kʼéramakuarhijka, jukarimindu sési eratsesïndi imeri ambe, sánderu kʼéri ambe exekuarhisïndi ka menusi uásïndi máteru jásï kʼuiripuechani. Né uéjkini uáti niárani ísï eratseni. Encyclopædia Britannica uandasïndi: “Sáno iápurisï anapu kʼuiripuechaksï eratsendi nájkiruka sánisï o kánikua, eska sánderu ambakitiska, na engaksï irekaka, imecheri tʼirekua, na engaksï xukuparhajka, pʼindekuecha, ambe engaksï jakajkujka ka néna engaksï újka ambe ma”. ¿Ambechi uá úni parachi no ísï eratseni?

Bibliaeri karakata

“Sánderu kʼéri ambe exeani máteruechani, ka eska chájkumindu” (FILIPUSɅ 2:3).

¿Ambe arhikuekasïni? Parachi no jámani kʼéramakuarhini, jatsiskachi para kaxumbitini. Engachi kaxumbitiska niáraakachi exeni eskaksï máteruecha sánderu sési ambe úsïnga eska jucha. No nani anapuechaksï sánderu kʼéri ambesti.

Ju je exeni ambe enga úkuarhinchapka Stefan, ima nóteru menusi exeasptia imani kʼuiripuechani engaksï máteru paisirhu anapuepka, uandasïndi: “Péringa para úni iáminduechani májkueni exeani, uétarhisïnga eratseni eskaksï máteruecha sánderu kʼéri ambeska eska jucha. Ji no iámindu ambe míteska ka méntkisï uáka jorhenguarhini máteruecheri ambe”.

Ambe engajtsï uáka úni

Jánguarhi je exeni eskajtsï no iámindu ambe uáka úni, ka eskaksïni ménisï no sési uérachiaka ambe ma. Jiókuarhi je eskaksï máteruecha úsïnga úni ambe ma engajtsï cha no újka úni. Ka asï jáma je uandani eskaksï iáminduecha ma grupuru anapu kʼuiripuecha májkueni jásïiska.

Enbesi de no sési eratseni grupuru anapu kʼuiripueri ma, kurhamarhikuarhi je:

• ¿Meru no sési jarhaski ambe engani no tsitijka inde kʼuiripueri o solu ménderueni úxaki ambe ma?

• ¿Úpirini inde kʼuiripu exeni ambe ma engani ji no sési újka?

• ¿Ambe sánderu sési úsïni inde kʼuiripu ka eska ji?

Engajtsï jurhimbikua jingoni mókuantaska ini kurhamarhikuechani, nóterujtsï menusi újpiakia ka niárakajtsï tsitini ambakiti ambe enga inde kʼuiripu újka.