Sapichu ambe enga iurhirirhu petanhajka, ka enga uétarhiaka operasioni ma

Sapichu ambe enga iurhirirhu petanhajka. Sapichu ambe enga iurhirirhu petanhajka, petanhasïndi ima amberhu enga uérajka enga primeru arhukunhajka iurhiri, arhiksï jindesti: glóbulos rojos, glóbulos blancos, plaquetas ka plasma. Sapichu ambe enga glóbulos rojos jimbo petanhajka jindesti proteina ma enga arhinhajka hemoglobina. Hemoglobina jingoni, sea kʼuiripueri o animaliri, úkuarhisïndiksï máru medisinecha para jarhuaatani imechani engaksï uinhamu pʼamenchani jarhajka anemia ka engaksï kánikua iurhiri tsïtajka.

Máteru sapichu ambe enga iurhirirhu petanhajka, plasma jimbo petanhasïndi, plasma 90% itsïisti, ka ístu jatasti uánikua hormona, sales inorgánicas, enzimas ka nutrientes, máru engaksï jindeka minerales ka azúcares. Plasma ístu jatasti ambe ma enga újka eska iurhiri kuajarikuarhiaka, proteinecha komueska albúmina, ka antikuerpuecha engaksï újka eskachi no xáni pʼamenchaaka. Ísï jimbo, enga kʼuiripu ma pʼamenchajka máru pʼamenchakuechani, arhisïndiksï eska jukaaka indiksionicha gammaglobulinaeri, gammaglobulina sapichu ambesti iurhiriri enga uánikua antikuerpuechani kaajka ka enga plasma jimbo petanhajka ima kʼuiripuecheri engaksï únhaka eskaksï no xáni pʼamenchapiringa. Glóbulos blancos jimbo ístu petanhasïndi máteru sapichu ambe engaksï jindeka interferones ka interleuquinas, engaksï úrakuarhijka para imecha engaksï virus ma jimbo pʼamenchajka o engaksï kánseri pʼamenchajka.

¿Uá kristianu ma jiókuarhini tsinakuarhini úraparini sapichu ambe enga iurhirirhu petanhajka? Biblia no uandasïndi meru íri ambe, ísï jimbo mándani kristianu jatsisti para jandiajku erakuni ambe úni Tata Diosïni japarini ka eska na arhiaka imeri konsiensia. Máruksï no ma i sapichu ambe jiókuarhisïndi, uandaparini eska enga Tata Diosï íntsaapka Leichani israelitechani, uandaspka eska iurhiri animalicheri engaksï uándikuapiringa, jatsispka para “echerirhu” tsïtanhani (Deuteronomio 12:22-24). Peru jarhastiksï máteruecha, engaksï ístu no jiókuarhijka iurhiri jatantani, ka ni ima ambe enga orheta uérajka enga iurhiri arhukunhajka, peru engaksï kʼóru jiókuarhijka ima sapichu ambe enga petanhajka iurhirirhu, jimbokaksï uandasïnga eska ima sapichu ambe, nóteru jindeskia tsípikua ima kʼuiripueri o animaliri nani enga petanhaka.

Ante de eratsinchi ambe ma úni, uétarhisïndi kurhamarhikuarhini: “¿Kurhangusïni eska engani no jiókuarhiska imani sapichu ambe enga iurhirirhu petanhajka, no jiókuarhixaka iámindu medisina enga sánisï ima ambe jataaka, ka engaksï marhuajka para máru pʼamenchakuecha o para pʼínguni iurhirini parani no xáni tsïtani o para úni kuajarikuarhini? ¿Úpirini arhini doktorini ma andisïni no jiókuarhiajki o andisïni jiókuarhiajki ma o máru imani sapichu amberi enga iurhirirhu petanhajka?”.

Enga uétarhiaka operasioni ma. Enga uétarhiaka operasioni ma, doktorichaksï mámaru ambe úsïndi úni para ma no xáni iurhiri tsïtani. Imaksï úsïndi liquidu ambe jatsikuni iurhirini (hemodilución). Úsïndiksï eska iurhiri pʼamenchatiiri bolsecharhu máru jataaka ka liquiduksï jatsirasïndi imani iurhirini enga pakarajka kuerpurhu para sánderu kánikua úkuarhintani. Ka engaksï operarini jarhajka o engaksï na kʼamarajkia, iurhiri engaksï úpka eska bolsecharhu jatapiringa ménderuksï kuerpurhu jatsirantasïndi. Ka recuperación de sangre, ambe enga úkuarhijka ini jimbo, jindesti, enga nema operarinhani jarhajka, tánantasïndiksï iurhirini jima uératini enga uérani jarhajka, juparhenhantasïndi o filtrarinhani ka tátsekua ménderu pʼamenchatinksï jatsirantasïndi. Mítiparini eskaksï i tsimani ambe, nóksï iámindu doktoricha májkueni úsïnga, kristianu jatsisti para kurhamarhini doktorini, ima néna uá ini ambe pʼamenchatini jingoni.

Engachi jámaaka erakuni ambe úni enga i ambe uétarhiaka engachi uandakia, jatsiskachi para kurhamarhikuarhini: “Engaksï úpiringa eska juchiti iurhiri uérapiringa juchiti kuerpurhu o astaksï úni eska anhaxurhitini pakaraaka ma tiempu, ¿uandapirini juchiti konsiensia enga jorhendakata jaka Biblia jimbo, eska ima iurhiri útasï juchitiska, ka eskaksï no jatsiska para tsïtani ‘echerirhu’?” (Deuteronomio 12:23, 24). “¿Sési pʼikuarherapirini juchiti konsiensia engajtsïni operasioni ma jimbo pʼitapiringa ma parti iurhiri, engaksï juparhentapiringa ka ménderujtsïni jatsirantani?” “¿Jánhaskasïni eska engani no ma i jásï ambe jiókuarhiska nani enga úrakuarhiaka juchiti iurhiri, eskani no jiókuarhixaka inde jásï ambe enga jindeka komueska análisis de sangre, hemodiálisis ka eskaksï úraaka bomba de circulación extracorpórea?”

Mándani kristianu jatsisti para erakuni na enga jurajkuaka eska úrakuarhiaka operasioni ma jimbo imeri iurhiri. Ka májkueni úkuarhisïndi enga úrakuarhiaka imeri iurhiri para prueba ambe únhani ka para terapia ambe nani engaksï pʼitajka ka jatsirantani ménderu sánititu iurhiri, ménisï engaksï modifikarijkia.