Imecha engaksï orhejtsïkujka juchari kúnguarhikuecharhu nóksï ma tumina andasïndi. Sánderu sési, ísï eska na úkuarhienga primeru siglurhu anapu kúnguarhikuecharhu, erakunhasïndiksï máru kʼuiripuecha engaksï sési jorhendakata jarhajka paraksï “jindeeni arhistatspiticha, ka para[k]sï [jorhendani] Diosïri jakajkutichani” (Ukuecha 20:28). I orhejtsïkutichaksï jindesïndi imecha engaksï újka ambe enga Biblia uandajka ka orhekupasïndiksï kúnguarhikuani ka kuidarinksï, no komosieka nema uinhamarhikuapiringa, sino jimbokaksï uékasïnga ísï úni, ka nójtu paraksï andakuekani, sino tsípikua jingoni (1 Pedru 5:1-3). ¿Ambeksï úsïni juchantsïni jimbo?

Kuidarisïndijtsïni ka kuájchakusïndijtsïni. Orhejtsïkutichaksï kuidarisïndi kúnguarhikuani ka kuájchakusïndiksï imecheri jakajkukuani. Mítistiksï eska Jeobasï juramukuajka eskaksï ísï uáka, jimboksïsï no ísï exekuarhijti eska juramuti ma, sánderu sési, sésijtsïni pʼikuastasïndi, ka jarhuatasïndijtsïni parachi tsípikua jingoni irekani (2 Korintu 1:24). Ísï eska karichi eranguti ma na uandanhiajka mándani karichini jimbo, ma orhejtsïkutijtu jánguarhintasïndi mítiani iámindu kúnguarhikuarhu anapu erachichani (Proverbios 27:23).

Jorhendasïndijtsïni úni ambe enga Tata Diosï uékajka. Orhejtsïkutichaksï mándani semana jorhentpesïndi tánguarhikuecharhu, ka i tánguarhikuecha, kánikua uinhaperantasïndi juchari jakajkukuani (Ukuecha 15:32). I erachichaksï kánikua ánchikuarhisïndi, ka orhechipasïndijtsïni eianhperakuarhu, nirasïndiksï juchantsïni jingoni aianhpini ka arhisïndijtsïni nénachi uá sánderu sési aianhpini Bibliaeri ambe.

Uinhaperantasïndijtsïni. Paraka juchari jakajkua no chkeaka, orhejtsïkutichajtsïni pʼorhembisïndi juchari kʼumanchikuarhu ka uandontskuarhisïndiksï juchantsïni jingoni Kʼumanchikua Reinuerirhu. Bibliani jingoni, jarhuatasïndijtsïni ka uinhaperantani (Santiagu 5:14, 15).

Kánikua ánchikuarhitaksï jatsisti kúnguarhikuarhu, ka útasï sáno iámindu orhejtsïkuticha, jatsikuarhestiksï ánchikuarhita ma ka familia ma engaksï jatsika para kuidarini ka kéndaani ambe ma. Uétarhisïndi kánikua respetariauani ini erachichani engaksï xáni uinhamu ánchikuarhijka (1 Tesalonika 5:12, 13).

• ¿Ambeksï úsïni orhejtsïkuticha kúnguarhikuecharhu?

• ¿Nénaksï xarhatasïni eskaksï uandanhiasïnga mándani juchantsïni jimbo?

Biblia uandasïndi eskaksï tsimani grupuecheska engaksï kúnguarhikuani orhekupajka: “orhejtsïkuticha ka orhejtsïkuticheri jarhuajpiricha” (Filipenses 1:1, NM). Mándani kúnguarhikuarhu, jarhasïndiksï máru erachicha engaksï orhejtsïkuticheri jarhuajpiricheka. Peru ¿nénajtsïni jarhuatasïni ícha?

Jarhuatasïndiksï iámindu orhejtsïkutichani. Orhejtsïkuticheri jarhuajpirichaksï kánikua mintsikasïndi Jeobani, mintsinharhikuesïndiksï ka jánguarhintasïndiksï sési ánchikuarhini. Máruksï tumbisïndi ka máteruechaksï jatirisïndia. Íksï uásïndi ánchikuarhitechani engaksï kúnguarhikuarhu uétarhijka, ka jukaparhakuesti ícheri ánchikuarhita. Ícheri ánchikuarhita jimbo, orhejtsïkutichaksï úsïndi úni imecheri ánchikuarhitani enga jindeka jorhentpini ka uinhaperaantani erachichani.

Úsïndiksï máru ambe enga kúnguarhikuarhu uétarhijka. Máru orhejtsïkuticheri jarhuajpiricha, eroaasïndiksï imechani engaksï nirajka tánguarhikuarhu ka jirinhakuasïndiksï nani uaxakani. Máteruechaksï jarhuajpesïndi sonidurhu, takukatechanksï íntspeasïndi, miiuntasïndiksï tuminani ka arhiasïndiksï erachichani nani engaksï eianhpiaka. Ístu, jarhuajpisïndiksï sési jántskantani Kʼumanchikua Reinuerini ka méni, orhejtsïkutichaksï arhiasïndi eskaksï jarhuatauaka imani erachichani engaksï tʼarhepikia. Íksï tsípekua jingoni úsïndi ambe engaksï úranhajka, ka jimboksïsï iámindu erachicha kánikua respetariuajti (1 Timoteo 3:13).

Xarhatasïndiksï eskaksï ambakiti kristianueska. Orhejtsïkuticheri jarhuajpirichaksï erakunhasïndi jimbokaksï ísï irekasïnga eska Biblia na uandajka. Engaksï arhijtsïkperata ma nitamatarajka kúnguarhikuarhu, kánikuaksï uinhaperantasïndi juchari jakajkukuani, engachi exeajka na engaksï tsípekua jingoni nirajka aianhpini, úsïndi eskachi juchajtu tsitiaka aianhpini, ka engachi exeajka eskaksï tsitisïnga jarhuataani orhejtsïkutichani, úsïndi eska jucha sési pʼikuarheraaka ka eskachi jánguarhintaaka sési pájperani iáminduechani jingoni (Efesu 4:16). Sánderu orhepatini, íchajtuksï úsïndi orhejtsïkuti úkuarhini.

• ¿Na jásï kʼuiripuesïnksï orhejtsïkuticheri jarhuajpiricha?

• ¿Ambeksï úsïni orhejtsïkuticheri jarhuajpiricha paraka iámindu ambe sési jauaka kúnguarhikuarhu?

Karakata Griegaechaksï mémichani uandasïndi Bernaberi ambe ka apostuli Pablueri ambe. I orhejtsïkutichaksï pʼorhembiasïrendi kúnguarhikuechani. ¿Andiksïsï inde ambe uáeni? Jimbokaksï uékasïrenga eskaksï kúnguarhikuecha sési japiringa Tata Diosïni jingoni. Pablu uandaspti eska uékasïrenga ménderu pʼorhembiantani erachichani para exeani nénaksï nitamakuarhexapi. Kánikua tsitisïrendi uinhaperantaani erachichani, nájkiruka jatsipiringa para uánikua kilometru xanharani (Ukuecha 15:36). Ka májkuenksï pʼikuarherasïndi iásï, i erachicha engaksï kúnguarhikuechani pʼorhembiajka.

Pʼorhembisïndijtsïni parajtsïni uinhaperantani. Mándani sirkuitueri orhejtsïkuti, beinte kúnguarhikuechani ísï pʼorhembiasïndi tsimani uelta ma uéxurhini jimbo, ka ma semana jarhasïndi mándani kúnguarhikuarhu. Uánikua ambechi uáka jorhenguarhini i erachicheri ka imeri uarhiticheri engaksï tembuchatiika, jimbokaksï ícha, ióni marhuakuskia Jeobani. Íksï jánguarhintasïndi sési mítiani tumbichani ka kʼératichani, ka tsitisïndiksï juchantsïni jingoni nirani aianhpini Jeobaeri ambe, ka nirani pʼorhembiani imechani engachi jorhendaani jaka Bibliaeri ambe. Íksï erachicha nirasïndi kúnguarhikuarhu anapu orhejtsïkutichani jingoni pʼorhembiani máteru erachichani para uinhaperantaani. Ístu parajtsïni uinhaperantani, ambakiti arhijtsïkperatechanksï nitamataraasïndi kúnguarhikuarhu ka kʼéri tánguarhikuecharhu (Ukuecha 15:35).

Uandanhiasïndiksï iáminduechani jimbo. Sirkuitueri orhejtsïkuticha tsitisïndiksï exeni na engaksï marhuakuni jarhajka kúnguarhikuecha Jeobani. Tánguarhintasïndiksï orhejtsïkuticha jingoni ka orhejtsïkuticheri jarhuajpirichani jingoni, paraksï exeni na enga ánchikuarhini jaka kúnguarhikua, ka jarhuajperata íntsaasïndi paraksï sánderu sési ánchikuarhini kúnguarhikuarhu. Jarhuatasïndiksï prekursorichani, paraksï úni sési aianhpini Bibliaeri ambe. Ka kánikuaksï tsitisïndi mítiani imechani engaksï apenasi uénani jarhajka tánguarhini ka engaksï sési jorhenguarhini jaka Bibliaeri ambe. I erachicha, kánikuaksï tsitisïndi ísï ánchikuarhini ka jindesïndiksï ma “jarhuajpiri para [juchantsïni] jingoni” (2 Korintu 8:23). Ju je májkueni mintsikani ka jakajkuni Jeobani eskaksï i erachicha (Ebreu 13:7).

• ¿Andiksïsï pʼorhembiajki kúnguarhikuechani sirkuitueri orhejtsïkuticha?

• ¿Nénaksïni marhuachia engaksïni i erachicha juuaka pʼorhembini?

Enga no sési jásï ambe úkuarhijka ixú echerirhu, Jeobaeri testiguechachi sóntku úsïnga ambe ma parachi jarhuataani juchari erachichani. I ambe xarhatasïndi eskachi kánikua uékperasïnga (Juanu 13:34, 35; 1 Juanu 3:17, 18). ¿Nénachi jarhuataasïni erachichani?

Íntspesïngachi tumina. Ma uelta kʼéri kʼarhingua ma jarhaspti jini Judea, ka Antiokia anapu erachichaksï tumina axakuaspti Judea anapu erachichani paraksï jarhuaatani (Ukuecha 11:27-30). Májkueni eska i erachicha, engachi mítijka eskaksï juchari erachicha ma nani ísï anapu kómu nitamakuarhini jarhasïnga, íntspesïngachi tumina kúnguarhikuarhu paraksï jarhuatanhani i erachicha (2 Korintu 8:13-15).

Jarhuajpisïngachi ambe engachi jingoni uáka jarhuajpini. Orhejtsïkuticha engaksï jima irekajka enga no sési jásï ambe úkuarhijka, sóntkuksï jámasïndi iámindu erachichani jirinhantaani paraksï exeni eskaksï sési jauaka. Jarhasti komite ma enga jarhuajpijka, ka i komite exesïndi eskaksï erachicha intsïnhaaka tʼirekua, itsï, xukuparhakua, eska doktori ma exeauaka ka eskaksï jatsiaka nani pakarani. Máru erachicha engaksï uánikua ambe mítika úni, úrasïndiksï imecheri tuminani paraksï nirani jarhuajpeni uaantani Kʼumanchikuechani Reinueri o kʼumanchikuechani engaksï erachicha irekapka. Iáminduchi sési pájperasïnga ka iónichi márku ánchikuarhiskia, jimbochisï újka sóntku nirani jarhuataani erachichani engaksï no sési nitamakuarhini jarhajka. Orhetachi jarhuataasïnga imechani “engaksï Diosïri kʼumanchikuarhu anapueka”, juchari erachichani, peru engachi újka, ístuchi jarhuataasïnga máteruechani nájkirukaksï no juchari religionirhu anapueuaka (Galasia 6:10).

Jarhuajperatachi íntspesïnga Biblia jingoni ka jarhuajpisïngachi paraksï no xáni kómu pʼikuarherani. Engaksï sánderu uétarhinchajka imecha engaksï no sési nitamakuarhejka, jindesti eska nema uinhaperantauaka. Ka jiánisï Jeoba uinhapikua íntsaajti, jimboka ima jindeska “Diosï enga uinhaperpintajka iámindu ambe jimbo” (2 Korintu 1:3, 4). Jimbochisï arhiajka Biblia jingoni, eska nóteru ióni jimbo Tata Diosïri Reinu uáka eska nóteru jauaka inde no sési jásï ambe engajtsïni xáni no sési pʼikuastajka (Jaŋaskuecha 21:4).

• ¿Andichisï Jeobaeri testiguecha újka sóntku jarhuajpeni enga no sési jásï ambe úkuarhijka?

• ¿Nénachi uinhaperantaasïni imechani engaksï kómu nitamakuarhejka?

Ante de Jesusi uarhini, uandontskuarhispti tʼámu apostulichani jingoni: Pedru, Santiagu, Juanu ka Andresini jingoni. Arhiaspti eska ultimu jurhiatikuechani jimbo úkuarhipiringa ambe ma enga xarhatapiringa eska Jesusi juramuxapkia auandarhu, ka i kurhamarhikua úkuaspti: “¿Nákiski ima jántspiri enga mintsinharhikueka ka mítikuni [“enga jánhastika”, NM], ka enga imeri patroni enkargariaka iámindu imeri kʼumanchikuarhu anapuechani para sési íntsaani tʼirekua ekaksï uétarhinchaaka?” (Mateo 24:3, NM; Mateu 24:45; Markusʌ 13:3, 4). Enga Jesusi uandapka ixú tʼirekua, arhikuekaxapti mítini Tata Diosïri ambe. Jesusi uandaxapti eska ima jindespka patroni ka eska erakupiringa jántspirini ma paraka ultimu jurhiatikuecharhu jorhendaapiringa Tata Diosïri ambe imeri chúxapatichani. ¿Néski i jántspiri?

Grupu sapichu máesti engaksï erakukateka ka Jesusiri chúxapatistiksï. I “jántspiri” jindesti ima Grupu enga Orhejtsïkuajka iámindu kúnguarhikuechani. I jántspiri jorhendaasïndi Biblia jingoni imechani engaksï márku kómarhijka Jeobani ini jántspirini jingoni. Ka jucha ini jántspirini mintsikasïnga parajtsïni “tʼirekua arhuku[cheni]” (Lukasʌ 12:42).

Xanhatatasïndi Tata Diosïri iretani (1 Timoteo 3:15). Jesusi ini jántspirini arhispti eska xanhatatapiringa Jeobaeri kúnguarhikuani ixú echerirhu, i ambe arhikuekasïndi eska i jántspirisï exepiringa iámindu ambe enga Jeobaeri kúnguarhikua jatsikuarhipiringa, eska orhejtsïkupiringa aianhpikuarhu ka eska jorhendaapiringa kúnguarhikuechani. Parachi jatsini ambe engachi uétarhinchajka, i “jántspiri enga mintsinharhikueka ka [enga jánhastika]” jorhendasïndijtsïni Bibliaeri ambe takukatechani jingoni engachi úraajka para nirani aianhpini ka imani ambe jimbo engachi jorhenguarhijka kúnguarhikuecharhu ka kʼéri tánguarhikuecharhu.

I “jántspiri” mintsinharhikuesti jimboka jorhentpesïnga jurhimbikua Bibliaeri ambe ka jimboka eianhpisïnga ambakiti eianhperakua ísï eska Jesusi na uandapka, ka jánhastisti jimboka sési kuidarisïnga ima ambe enga Kristu jatsikuarhika ixú Echerirhu (Ukuecha 10:42). Jeoba újchakuraxati i jántspiriri ánchikuarhitani, jimboka pauani pauani sánderu kʼuiripuechaksï Testigu úkuarhisïnga ka jimbokaksï uánikua publikasionicha jarhaska engajtsïni Bibliaeri ambe jorhendajka (Isaías 60:22; 65:13).

• ¿Néni erakuski Jesusi paraka jorhendaapiringa Bibliaeri ambe imeri jorhenguarhitichani?

• ¿Andiksïsï arhijki eska i “jántspiri” mintsinharhikueska ka eska jánhastiska?

Primeru siglurhu, ma grupu engaksï jindepka “apostulicha ka orhejtsïkuticha” engaksï Jerusaleni japka, jindesptiksï engaksï orhejtsïkuenga kúnguarhikuechani, ka nájkirukaksï uánikua kristianuecha japka engaksï erakukatepka espiritu santu jimbo, i grupusï uandaendi ambesï úkuarhipirini (Hechos 15:2, NM). Paraka i grupu úpiringa i ambe, orheta Tata Diosïri Karakatanksï exesïrendi ka jurajkusïrendiksï eska espiritu santu jarhuataapiringa (Ukuecha 15:25). Iásï anapu Grupu enga Orhejtsïkuajka iámindu kúnguarhikuechani, ístu májkueni úsïndi.

Grupu enga Jeoba úrajka paraka uáka ambe enga ima uékajka. Ima erachicha enga Tata Diosï erakuaka ka enga jindeeka Grupu enga Orhejtsïkuajka iámindu kúnguarhikuechani, kánikuaksï jukaparharasïndi Bibliani, mítistiksï néna úni imecheri ánchikuarhitani ka néna jorhentpini Bibliaeri ambe. Mándani semanaksï tánguarhisïndi paraksï exeni ambe engaksï uétarhinchajka iámindu erachicha. Májkueni eska primeru siglurhu, i erachichaksï exesïndi Bibliani paraksï uandani ambesï úkuarhia, ka aiangusïndijtsïni i ambe, karakata ma jimbo, sirkuitueri orhejtsïkutichani jimbo o ístu máteru erachichani jimbo. Ísïksï úsïndi eska Tata Diosïri ireta, májku ambe uáka ka eska májku ambe eratsiaka iámu parhakpinirhu (Ukuecha 16:4, 5). Ka ístuksï exesïndi eskaksï kʼuiripuecha méntkisï jatsiaka ambe ma paraksï jorhenguarhini Bibliaeri ambe. Ka uinhaperantasïndijtsïni parachi aianhpini Tata Diosïri Reinueri ambe ka exesïndiksï eskaksï sési erakunhaaka ima erachicha engaksï intsïnhaaka kóntperatechani kúnguarhikuarhu.

Úsïndiksï ambe enga Tata Diosïri espiritu uékajka. Grupu enga Orhejtsïkuajka iámindu kúnguarhikuechani, méntkisï úsïndi ambe enga juchari Juramuti Jeoba uéjka ka ístu ambe enga Jesusi, kúnguarhikuarhu anapu Juramuti uékajka (1 Korintu 11:3; Efesu 5:23). I grupu no ísï exekuarhisïndi enajki ima juramukuni jaki Tata Diosïri iretani. Májkueni eska máteru kristianuecha engaksï ístu espiritu santu jimbo erakukateka, “chúxapa[sïndiksï] Karichi sapichuni [Jesusi] naninterkisï enga ima nirajka” (Jaŋaskuecha 14:4). Grupu enga Orhejtsïkuajka iámindu kúnguarhikuechani, kánikua jaiapanhintasïndi enga jucha kómarhijpikuajka.

• ¿Néksï jindespi imecha engaksï orhejtsïkuauenga kúnguarhikuechani primeru siglurhu?

• Grupu enga Orhejtsïkuajka iámindu kúnguarhikuechani, ¿néna jirinhantasïni Tata Diosïri jarhuajperata?

I uandakua Beteli, ebreu jimboesti ka arhikuekasïndi “Tata Diosïri Kʼumanchikua” (Génesis 28:17, 19, nota). I arhinhakua sési pakarakusïndi kʼumanchikuechani engachi Jeobaeri testiguecha iámu parhakpinirhu jatsiaka, jimboka jimini uératinisï uandanhajka néna aianhpinha Bibliaeri ambe. Grupu enga Orhejtsïkuajka iámindu kúnguarhikuechani, imani kʼumanchikua jimbo irekasti enga exejka na engaksï ánchikuarhijka iámindu sukursalicha, ka i jini Nueva York jarhasti (Estados Unidos). Erachicha engaksï Beteli ánchikuarhijka, mítikatestiksï komueska familia Beteli. Ka májkueni eska familia ma, iáminduksï márku tʼiresïndi, márku irekasïndi, márku ánchikuarhisïndi ka márkuksï jorhenguarhisïndi Bibliaeri ambe (Salmo 133:1).

Ambakiti kʼumanchikua ma, nani enga kánikua ánchikuarhinhajka. Mándani Beteli jimbo, marhuasïndiksï erachicha ka pirenchicha engaksï kánikua jakajkujka Jeobani, engaksï pauani pauani ánchikuarhikujka Tata Diosïni ka engaksï jánguarhintajka paraka iápurisï eianhpinhaaka Tata Diosïri Reinueri ambe (Mateu 6:33). No nema meiamunhasïndi, peruksï intsïnhasïndi tʼirekua ka nani engaksï pakaraaka; ka intsïnhasïndiksï sáni tumina para ambe engaksï uétarhinchaaka. Iáminduksï jatsikuarhisti ánchikuarhita ma: ofisinecharhu, kosinarhu o komedorirhu, jima engaksï takukatechani uájka; kuartuechani ambantskantaani, takusïni jupani, o máteru ambe.

Kánikua ánchikuarhinhasïndi paraka iápurisï aianhpinhaaka Tata Diosïri Reinueri ambe. Mándani Beteli ánchikuarhisïndi paraka iápurisï mítinhaaka Tata Diosïri Reinueri ambe. Ka jimbosï únhati i foietu. Grupu enga Orhejtsïkuajka iámindu kúnguarhikuechani exesti eska i foietu sési úkata japiringa, Interneti jimboksï axakuasti imechani engaksï máteru idioma jimbo karantapiringa, tátsekua kʼérati fabrikechanksï jimbo uásti ka axanhaastiksï iámu parhakpinirhu parakaksï jukari sientu diesi mili kúnguarhikuecha jatsipiringa. Familia Betelichaksï kánikua ánchikuarhisïndi paraka úkuarhiaka ima sánderu ambakiti ánchikuarhita enga jatsika para úkuarhini: aianhpinhani Tata Diosïri Reinueri ambe (Markusʌ 13:10).

• ¿Néksï ánchikuarhisïni jima Beteli, ka ambeksï intsïnhasïni jima?

• ¿Nákiski sánderu ambakiti ánchikuarhita enga jatsika para úkuarhini ka enga jimbo Beteli ánchikuarhijka?

Imecha engaksï Beteli marhuajka, mámaru jásï ánchikuarhitaksï úsïndi, máruksï takukatechani uásïndi, máteruechaksï máteru idioma jimbo peentasïndi, ka máteruechaksï audio ka bideu jimboksï uántaasïndi publikasionichani ka uánikua máteru ambe. Ka iámu i ánchikuarhita marhuasïndi paraka ma paisirhu o uánikua paisicharhu eianhpinhaaka Bibliaeri ambe.

Komite enga orhejtsïkujka sukursalini ma, exesïndi na enga ánchikuarhijka sukursali. Mándani sukursalirhu, Grupu enga Orhejtsïkuajka iámindu kúnguarhikuechani jurajkusïndi eska tanimu o sánderu orhejtsïkuticha jauaka, engaksï jánhastika, paraksï exeni ánchikuarhitani enga jima úkuarhijka. I komite aianguni jarhasïndi imani Grupuni enga Orhejtsïkuajka iámindu kúnguarhikuechani na enga nikuani jarhajka aianhpikuarhu imani paisirhu o paisichani jimbo enga ima sukursali exejka, ístu aiangusïndi uandanhiatechani engaksï úpiringa jarhani, i ambe úsïndi eska Grupu enga Orhejtsïkuajka iámindu kúnguarhikuechani, exeaka ambe sési japirini petani publikasionicharhu ka ambe sési japirini jorhenguarhini kúnguarhikuecharhu ka kʼéri tánguarhikuecharhu. Enga sési exejka ima Grupu enga Orhejtsïkuajka iámindu kúnguarhikuechani, axaasïndi máru erachichani paraksï sukursalichani pʼorhembiani, i erachichaksï arhisïndi Komiteni enga orhejtsïkujka Sukursalini ma, ambeksï uá paraksï úni sánderu sési ánchikuarhini (Proverbios 11:14). Enga i erachi pʼorhembini jarhajka sukursalini ma, úkuarhisïndi ambakiti tánguarhikua ma ka i erachi, arhijtsïkperata ma nitamatarasïndi para uinhaperantaani iámindu imani erachichani engaksï jarhuajperata intsïnhajka i sukursaliri.

Jarhuajperata íntskuasïndi kúnguarhikuechani. Sukursalisï sésikua íntspejti paraksï jarhani jimbanhi kúnguarhikuecha. Ka jarhuataasïndi prekursorichani, misioneruechani ka sirkuitueri orhejtsïkutichani paraksï sési úni imecheri ánchikuarhitani. Uandasïndi nani ka nénaksï úkuarhia kʼéri tánguarhikuecha, ístu úrkuarhiasïndi Kʼumanchikua Reinuerichani, ka ixuksï uératini axakuasïndi takukatechani para kúnguarhikuecha. Iámu ánchikuarhita enga sukursalirhu ma úkuarhejka, jindesïndi paraka sési aianhpinhaaka Bibliaeri ambe (1 Korintu 14:33, 40).

• Komite enga orhejtsïkujka sukursalini ma, ¿néna jarhuatasïni imani Grupuni enga Orhejtsïkuajka iámindu kúnguarhikuechani?

• ¿Ambe ánchikuarhita úkuarhisïni sukursali ma jimbo?

Parachi úni aianguani “ambakiti aianhperakuani [...] iámindu nasionicha[ni], ka tribuechani ka tsʼïmani engaksï táchani jásï idioma uandajka”, uaasïngachi takukatechani setesientu idioma jimbo ísï (Jaŋaskuecha 14:6). ¿Nénachi úsïni ini xáni kʼéri ánchikuarhita? Iámu parhakpinirhu, uánikua erachichaksï jarhasti engajtsïni jarhuatajka karani inde ambe enga takukatecharhu uérajka ka tresmili tresientu ísï erachichaksï jarhasti engajtsïni jarhuatajka para máteru idiomechani jimbo peentani.

Publikasionichaksï inglesi jimbo karakuarhisïndi. Grupu enga Orhejtsïkuajka iámindu kúnguarhikuechani, exesïndi na enga ánchikuarhijka Ofisina enga publikasionichani karaajka, i ofisina Nueva York jarhasti, jima enga jaka ima Grupu enga Orhejtsïkuajka iámindu kúnguarhikuechani. I ofisinasï uandajti ambe engaksï jatsika para karani kararicha engaksï Nueva York jaka ka imecha engaksï máteru sukursalichani jimbo jaka. Jatsiani ini kararichani engaksï iápurisï anapueka, úsïndi eska juchari takukatecha iápurisï anapueri ambe uandaaka, ka jimboksïsï marhuajti para iámu parhakpinirhu anapu kʼuiripuecha.

Axakuasïndiksï erachichani engaksï máteru idioma jimbo peentajka. Enga na sési pakarajkia ambe engaksï kararicha karajka ka enga jaiapanhinhantajkia, Interneti jimboksï axaminhasïndi iámu parhakpinirhu ima erachicha engaksï máteru idioma jimbo peentajka, ka i erachichaksï imecheri idioma jimbo karantasïndi. Erachicha engaksï máteru idioma jimbo peentajka takukatechani, jánguarhintasïndiksï jirinhaani “uandakuechani engaksï jurhimbitiuaka” ka engaksï sési terokuntaaka imani jingoni enga inglesi jimbo karanhakia (Eclesiastés 12:10).

Komputadorechaksï úsïndi eskaksï sánderu kókuani uéraaka takukatecha. Komputadora ma no úsïndi úni ima ambe enga karari ma újka, o enga ima erachi újka enga máteru idioma jimbo peentajka takukatechani, peru sánderu kókuani úkuarhisïndi ánchikuarhita, enga ma komputadorani úrajka para diksionariuni ma exeni, libruni ma para informasioni jirinhani o máteru ambe. Ísï jimbo, jucha Jeobaeri testiguecha úska programa ma para komputadorecha enga arhinhajka Sistema Electrónico de Edición Plurilingüe (MEPS, inglesi jimbo), i programa jingoni úsïngachi uánikua idioma jimbo karaani uandakuechani, jatsikuani dibujuechani ka úni eskaksï sési xarharaaka takukatecha ante de únhanksï.

Jarhastiksï máru idiomecha engaksï nóteru káni uandanhajkia, jiájkani, ¿andichisï xáni jánguarhintajki i ánchikuarhitani úni? Jimboka Jeoba uékasïnga “eskaksï iámindu kʼuiripuecha pʼímutantskateaka, ka andajkuarhinksï mítini [ima ambe] enga ísïka” (1 Timoteo 2:3, 4).

• ¿Ambe ánchikuarhita úkuarhisïni paraka karakuarhiaka juchari takukata ma?

• ¿Andichisï xáni uánikua idioma jimbo uaajki takukatechani?

Jeobaeri testiguecha, iámu uéxurhinchi uaasïnga ka etsakuani uánikua Bibliaechani ka máteru takukatechani, ka nochi íntspikuarhiasïnga. Uaasïngachi Kʼumanchikua Reinuerichani ka sukursalichani; jarhuataasïngachi betelitechani ka misioneruechani ka axasïngachi tumina paraksï jarhuatanhani erachicha engaksï no sési nitamakuarhini jarhajka. ¿Nani uérasïni tumina para i ambe?

Nochi kurhajkuarhisïnga diesmu, nichi kobrarpini ka nochi kurhajkuarhisïnga tumina. Nájkiruka kánikua tumina uétarhijka parachi úni Jeobaeri ánchikuarhitani, nochi nemani kurhakusïnga tumina. Jukari sieni uéxurhini ísïstia enga rebista La Atalaya uandaenga eskachi kánikua jakajkusïnga eska Jeobasï xanhatatajka ini ánchikuarhitani engachi újka, ka i mísmu rebista uandaspti: “[Juchari kúnguarhikua] no méni kómu jámaati ka no méni jámaati jarhuajperata kurhakuani kʼuiripuechani”. Ka asta iásï jamberi ísïsti (Mateu 10:8).

I ánchikuarhita úkuarhisïndi imani tumina jingoni engaksï kʼuiripuecha tsípikua jingoni íntspijka. Uánikua kʼuiripu sési exesïndi eskachi jorhentpiaka Bibliaeri ambe, ka jimboksïsï íntspejti tumina paraka i ánchikuarhita no anhaxurhiaka. Ka Jeobaeri testiguechajtuchi íntspesïnga tiempuni, uinhapikuani ka tuminani paraka seguirikuariaka aianhpinhani Bibliaeri ambe iámu Parhakpinirhu (1 Crónicas 29:9). Kʼumanchikuarhu Reinueri ka jima engaksï úkuarhijka juchari kʼéri tánguarhikuecha, jarhasïndiksï máru kajecha nani enga ma uáka jatsirani tumina enga uékaaka. Sáno iámu tuminani, íntspesïndiksï imecha engaksï no káni jatsikuarheka, engaksï ísïka eska ima uarhiti tsïndi enga Jesusi sési exepka, jimboka nájkiruka no ma ambe jatsikuarhipka, tsípekua ka mintsita jingoni íntspespti tumina (Lukasʌ 21:1-4). Chájtujtsï uáka méntkisï tumina sáni patsani parajtsï íntspeni “eskajtsï na eratsikata jatsikia chári mintsitecharhu” (1 Korintu 16:2; 2 Korintu 9:7).

Mítiskachi eska Jeoba manatakuauaka mintsita kʼuiripuechani paraksï íntspini tumina, paraka seguirikuariaka aianhpini Jeobaeri Reinueri ambe ka paraka úkuarhiaka ambe enga Jeoba uékajka (Proverbios 3:9).

• ¿Andisï juchari kúnguarhikua no májkueni eska máteru religionicha?

• ¿Néna úrakuarhisïni tumina engaksï kʼuiripuecha íntspijka?

Jima engachi tánguarhijka, arhisïngachi Kʼumanchikua Reinueri. ¿Andi? Jimboka iámindu ambe engachi jima jorhenguarhijka, jindesïndi Tata Diosïri Reinueri ambe, i amberi enga Jesukristu xáni aianhpienga (Lukasʌ 8:1).

Jimachi tánguarhisïnga parachi kómarhini Tata Diosïni. Jimachi uérasïnga parachi nirani eianhpini Tata Diosïri ambe (Mateu 24:14). Ariskuksï jarhatisti, máruksï kʼératisti ka máruksï sánderu sapiratisti. Mámaruksï jarhatisti; ka uánikuechani jimbo, sánderu de ma kúnguarhikua tánguarhisïndi. Ini uéxurhinicharhu, uánikuachi uaaska (sinku ísï ma jurhiatikua jimbo), jimbokaksï kúnguarhikuecha méntku úndani jarhasïndi uánini. ¿Nénachi úsïni i ambe? (Mateu 19:26.)

Úkuarhisïndiksï tuminani jingoni enga míndakuarhijka para i kʼumanchikuechani uáni. I tumina axanhasïndi imani sukursalini jimbo enga imani paisini jimbo jaka, ka i tumina, sukursali, kúnguarhikuechani kuánetaasïndi paraksï úni úkuarhini Kʼumanchikua Reinueri ma o paraksï sési jájkuntani imani engaksï jatsikia.

Uásïndiksï erachicha engaksï jandiajku aiakukuarhijka ka no nema meiamunhasïndi. Iámu paisicharhu, jarhasïndiksï máru grupuecha engaksï jindeka, Grupuecha engaksï Uájka Kʼumanchikuechani Reinueri. I erachicha, imecheri paisirhu, nirasïndiksï kúnguarhikuarhu ma, ka tátsekuaksï mótsisïndi máteru kúnguarhikuarhu nájkiruka iauaniuaka ka jarhuaatasïndiksï kúnguarhikuarhu anapuechani paraksï úni imecheri Kʼumanchikua Reinuerini. Máteru paisicha jimbo, Jeobaeri testiguecha engaksï mítika i ánchikuarhiteri ambe, axanhasïndiksï para exeni eskaksï sési úkuarhiaka Kʼumanchikuecha Reinueri o eskaksï sési arreglarinhaaka. Nájkirukaksï uánikua erachicha engaksï mítika i ánchikuarhiteri ambe ka engaksï jimajku ísï anapueka aiakukuarhijka para ánchikuarhini, sáno iáminduecha engaksï ánchikuarhijka para Kʼumanchikua Reinueri ma úni, jindesïndiksï imecha engaksï jima tánguarhiaka. Iámindu i ambe úkuarhisïndi, Jeobaeri espiritu santuni jimbo ka Jeobaeri ireteri ánchikuarhitani jimbo (Salmo 127:1; Kolosasi 3:23).

• ¿Andichisï arhiajki Kʼumanchikua Reinueri jima engachi tánguarhijka?

• ¿Nénachi úsïni uáni Kʼumanchikuechani Reinueri iámu parhakpinirhu?

Kʼumanchikuecha Reinueri engaksï Jeobaeri Testiguecha tánguarhijka, pásïndiksï Jeobaeri arhinhakuani, jimboksïsï jatsiti para méntkisï sési xarharani. Úni ini ambe, kʼéri kóntperata máesti, ka ísïchi xarhatasïnga eskachi marhuakuxaka Tata Diosïni. Ka iáminduchi uáka jarhuajpeni.

Enga kʼamaraakia tánguarhikua ju je jarhuajpeni paraka sési xarharaaka Kʼumanchikua Reinueri. Enga kʼamarajkia tánguarhikua ma, erachichaksï sési jántskantasïndi Kʼumanchikua Reinuerini, peru jarhasïdiksï jurhiatikuecha engaksï sánderu sési ambantskantajka ini kʼumanchikuani. Orhejtsïkuti ma o orhejtsïkutiri jarhuajpiri ma, uandasïndi ambe enga úkuarhiaka, ka i ambeksï úsïndi: kʼarhatani, trapiarini, kutsurhiantani siiechani, baniuechani juparhiantani, kutsunharhikuantani bentanechani ka espejuechani, basurani tsïtani ka ekuarhu ísï kʼarhatani. Ka mándani uéxurhini, iámu kúnguarhikua jarhuajpesïndi para sési jántskantani ini kʼumanchikuani. Arhiani sapichani eskaksï jarhuajpiaka, úsïndi eskaksï jorhenguarhiaka respetarini kʼumanchikuani engachi jimbo tánguarhijka para kómarhini Jeobani (Eclesiastés 5:1).

Ju je jarhuajpini enga uétarhiaka arreglarini ambe ma. Mándani uéxurhini, sésichi eraeratasïnga incharini ísï ka uérakua ísï Kʼumanchikua Reinuerini, para exeni enga uétarhiaka arreglarini ambe ma paraka sési xarharaaka, ka para no tátsekua sánderu tumina úrakuarhini jimboka no tiempu jingoni úkuarheska (2 Crónicas 24:13; 34:10). Enga méntkisï sési xarharajka Kʼumanchikua Reinueri, ambakiti kʼumanchikua máesïndi parachi kómarhini Jeobani. Ka engachi jarhuajpiaka, xarhataakachi na engachi xáni jukaparharajka ini kʼumanchikuani ka ístuchi xarhataaka na engachi xáni uékajka Jeobani (Salmo 122:1). Ístu, kʼuiripuechaksï sési uandaati juchari kómarhikueri ambe (2 Korintu 6:3).

• ¿Andisï jatsi para méntkisï sési xarharani Kʼumanchikua Reinueri?

• ¿Ambe úkuarhisïni paraka méntkisï sési xarharaaka Kʼumanchikua Reinueri?

¿Uékapirintsï sánderu jorhenguarhini Bibliaeri ambe? ¿Sánderu mítini ma textueri, ma kʼuiripueri, ma ireteri o máteru ambe enga Biblia uandajka? ¿Uáksïni jarhuatani Biblia parajtsï úni orhepani uérakuani uandanhiatechani? Enga ísïka, sési japirindi eskajtsï nipiringa imani bibliotekarhu enga Kʼumanchikua Reinueri jimbo jaka.

Uánikua ambe jarhasti bibliotekarhu engachi jimbo uáka jorhenguarhini Bibliaeri ambe. Jamberijtsï no jatsiaka iámindu publikasionichani engaksï Jeobaeri testiguecha karantakia chári idioma jimbo; peru bibliotekarhu enga Kʼumanchikua Reinueri jimbo jaka, uánikua publikasionichaksï jarhasti. Ka jamberiksï jati mámaru jásï Bibliaecha, diksionariuecha ka máteru takukatecha engachi jimbo uáka inbestigarini. Ka chájtsï uáka úrani ini bibliotekani ante de uénani tánguarhikua o enga na kʼamaraakia. Enga jaka komputadora ma, jatati programa ma enga arhinhajka Watchtower Library, i programa uánikua juchari publikasionichani jataasti, ka uákajtsï fásili jirinhantaani máru temaechani, uandakuechani o textuechani.

Marhuakuasïndi imechani engaksï jaka Jorhentperakuarhu engajtsïni Jorhendajka néna úni Tata Diosïri Ánchikuarhitani. Engajtsï cha karakuarhikia ini jorhentperakuarhu, uákajtsï ini bibliotekani jimbo prepararini chári arhijtsïkperakuechani. Ima enga exejka bibliotekani, jindesti ima enga orhejtsïkujka ini jorhentperakuani, i exesïndi eskaksï jauaka ima takukatecha engaksï apenasi uéraka ka eskaksï sési peerakata jauaka. I erachi o ima engaksïni jorhendani jaka Bibliaeri ambe, uátiksïni jarhuatani parajtsï úni exentani ambe engajtsï jirinhantani jaka. Peru asï pákuarhia je libruechani; kuidariaua je ka asï kuirunharhikua je.

Biblia uandasïndi eska parachi úni exentani “jurhimbikua Tata Diosïri ambe”, jatsiskachi para ísï jirinhani enajki jinde “tesoru ma enga inchaskukata jaka” (Proverbios 2:1-5). Ka biblioteka enga jaka Kʼumanchikua Reinueri jimbo, jindesti nani engajtsï uáka uénani jirinhantani ini jurhimbikuani.

• ¿Ambe jarhaski para informasioni jirinhantani imani bibliotekarhu enga jaka Kʼumanchikua Reinueri jimbo?

• ¿Néksïni uá jarhuatani informasioni jirinhantani bibliotekarhu?

Jesukristu arhiaspti imeri chúxapatichani: “Jimajkani ísï meremerejkue chári eramarhandikua kʼuiripuechani japarini, parakaksï exeaka chári sési jánguani, ka kʼéri ambe arhinksï chári Taatini enga auandarhu jaka” (Mateu 5:16). Ka para i ambe úkuarhini, úrasïngachi máru ambe enga i parhakpini jatsika, komueska Interneti. I jindesti juchari pájina jw.org/tsz ka ixujtsï uáka exeni ambe engachi Jeobaeri testiguecha újka ka ambe engachi jakajkujka. ¿Ambejtsï exentaa ini pájinarhu?

Mókuntskuecha Biblia jingoni para kurhamarhikuecha enga kʼuiripu úkuarhiajka. Exentaakajtsï mókuntskuechani para kurhamarhikuechani engaksï kʼuiripuecha iónisï úkuarhiakia. Seisi i jarhati kurhamarhikuecha, jarhastiksï ini sïrandarhu enga arhinhajka ¿Cha uékapirini mítini jurhimbikuani?, ka i, jukari kuatrosientu idioma jimbo jarhasti. Ístu jukari sieni idioma jimbo jarhasti Traducción del Nuevo Mundo. Ka jarhastiksï takukatecha engaksïni jarhuataaka jorhenguarhini Bibliaeri ambe, komueska i libru ¿Qué enseña realmente la Biblia?, ka rebistecha La Atalaya ka ¡Despertad! engaksï sánderu jimbanhika. Uánikua i publikasionichani, uákajtsï Internetirhu arhiantani o kurhauani, uákajtsï késkuani parajtsï kurhauani o uákajtsï késkuani PDF jimbo o EPUB jimbo. Engajtsï uékaka, uákajtsï imprimiriani máru pájinechani chári idioma jimbo, parajtsï exeraani nemani enga uékaka mítini Tata Diosïri Reinueri ambe. Ístuksï jarhasti bideuecha uánikua idiomechani jimbo engaksï seniasirika, ka uákajtsï késkuani Bibliarhu anapu arhintskuechani engaksï ísï arhikuarhintajka enajkiksï iásï nitamani jaki, ka Bibliarhu anapu dramecha ka kúskakua parajtsï kurhaani jiáni engajtsï tiempu jatsiaka.

Míti je jurhimbikua Jeobaeri testiguecheri ambe. I pájina jatasti notisiecha ka bideuecha engaksï uandantajka na engachi aianhpini jaka iámu parhakpinirhu, ka notisiecha engaksï uandantajka na enga nikuani jarhajka erachichani máteru nanisï ka na engachi jarhuatajka máteruechani. Ístu, ixú uandasïndi kánchi jatsia kʼéri tánguarhikuechani ka na engajtsïni cha uáka karachini.

Iámindu i ambe jimbo, meremerejkusïndi jurhimbikua Tata Diosïri iámu parhakpinirhu, asta jima jamberi enga sánderu iauanika, ka asta Antártida jamberi. Kómarhisïngachi Jeobani eska imeri “uandakua sóntku etsakuarhiaka iápurisï” paraka Jeoba kʼéri ambe arhinhaaka (2 Tesalonika 3:1).

• ¿Néna marhuasïni i pájina jw.org/tsz paraka sánderu mítinhaaka jurhimbikua Tata Diosïri ambe?

• ¿Ambejtsï uékapirini jirinhantani juchari pájinarhu?