Uánikuechaksï nóteru tánguarhisïndia imecheri religionichani jingoni, jimbokaksï exesïnga eskaksï jima no jorhenguarhisïnga na enga Biblia jarhuatauaka sési irekani ka jimbokaksï exesïnga eska no nema uandanhiasïnga imechani jimbo. Jiájkani, ¿andijtsïsï jatsi para Jeobaeri testiguechani jingoni tánguarhini? ¿Ambejtsï andaa engajtsï imechani jingoni tánguarhiska?

Sésijtsï pʼikuarheraaka imechani jingoni jarhani engaksïni sési kámaaka ka engaksïni sési uandajpaaka. Primeru siglurhu anapu kristianuecha, grupu jimboksï tánguarhintasïrendi para kómarhini Jeobani, para jorhenguarhini Bibliaeri ambe ka para uinhaperperantani (Ebreu 10:24, 25). I erachicha kánikua uékperasïrendi, jimboksïsï sési pʼikuarheraendi márku jarhani (2 Tesalonika 1:3; 3 Juanu 14, 15). Juchajtuchi májkueni úsïnga eska imecha, jimbochisï májkueni sési pʼikuarherajka.

Jorhenguarhiakajtsï úni ambe enga Biblia uandajka. Iásï, achaticha, uarhiticha ka sapiicha márkuchi tánguarhintasïnga parachi kurhajchaani imani erachichani engaksï kánikua mítika Bibliaeri ambe ka engajtsïni jorhendajka néna pauani pauani úni ambe enga Biblia jorhentpejka, ka ísïchi úsïnga, jimbokaksï ísï úsïrenga ióntki anapu kʼuiripuecha engaksï marhuakuenga Jeobani (Deuteronomio 31:12; Nehemías 8:8). Ini tánguarhikuecharhu, iáminduchi úsïnga mókuntskuechani íntspiani enga erachi ma kurhamarhikua ma uáka, ka pireasïngachi kántikuechani, parachi xarhatani na engachi xáni mintsikajka Tata Diosïni (Ebreu 10:23).

Jorhenguarhiakajtsï sánderu jakajkuni Tata Diosïni. Ma uelta apostuli Pablu karakuaspti máru kristianuechani: “Jimbokaksïni xáni exenchaxaka, [...] para eska jíjtuni uinhaperanhantaaka májku jásï chánksïni jingoni indeni jimbo engaksï májku jásï mintsikani jaka Kristuni cha ka ístu ji” (Roma 1:11, 12). Tánguarhini erachichani jingoni, úsïndi eskachi sánderu jakajkuaka Tata Diosïni ka eskachi jánguarhintaaka ísï irekani eska Biblia na uandajka.

¿Uékasïntsï exeni eska i ambe ísïska? Jiájkani tánguarhi je juchantsïni jingoni. Sésiksïni erokaaka engajtsï niáraka. Nóksïni ma tumina kurhachiaka inchani jámani ka ni engajtsï incharini jauakia.

• ¿Nénaksï úkuarhisïni juchari tánguarhikuecha ka andiksïsï ísï úkuarhijki?

• ¿Nénajtsïni marhuachisïni tánguarhikuecha?

Jeobaeri testiguecha, nochi méni kueratasïnga tánguarhikuecharhu nájkiruka uétarhiaka juátarhu ísï xanharani o nájkiruka uinhamu janini jauaka. ¿Andichisï xáni jánguarhintajki tánguarhini juchari erachichani jingoni nájkirukachi no sési nitamakuarhini jauaka, o nájkirukachi kuataratini jauaka jimbokachi chúskutaska ánchikuarhini?

Sésichi pʼikuarherasïnga. Apostuli Pablu uandaspti eska uétarhisïrenga nirani tánguarhikuecharhu, jimbosï karapti: “Ka jaue jirinhatsperantani modu nani engaksï na uáka jarhuajperani” (Ebreu 10:24). Jirinhatsperantani, arhikuekasïndi “kánikua sési exeni ambe ma”. Ixú apostuli Pablu uandaxapti eskachi jánguarhintapiringa sési mítperani ka eskachi uandanhiapiringa máteruechani jimbo. Engachi mítiajka máteru erachichani, mítisïngachi eskajtsïni uáka jarhuatani parachi úni orhepani uérakuani uandanhiatechani, jimbokaksï imechajtu ménichanisï no sési nitamakuarhisïnga ísï eska jucha.

Úsïndi eskachi ambarhati amiguechani jatsiauaka. Iámindu engachi nirajka tánguarhikuecharhu, ambakiti amigueskachi. Ménichanisïjtuchi tánguarhisïnga para máteru ambe úni engajtsïni ístu sési pʼikuastajka. ¿Nénajtsïni marhuachisïni ísï tánguarhini? Jarhuatasïndijtsïni parachi jukaparharaani erachichani, ka parachi sánderu uékperani. Ka engaksï juchari erachicha no sési nitamakuarhini jarhajka, sóntkuchi nirasïnga jarhuataani jimbokaksï juchari amigueska (Proverbios 17:17). Enga jucha jánguarhintajka sési pájperani erachichani jingoni, xarhatasïngachi eskachi uékasïnga jarhuajperani iáminduechani jingoni (1 Korintu 12:25, 26).

Pʼímarhisïngaksïni parajtsï erakuani amiguechani engaksï úni jaka ambe enga Tata Diosï uékajka. Jeobaeri testiguechaksï i jarhati amiguesti. Asï jurajku je eskaksïni ambe ma ójkutaaka para cha no úni tánguarhini juchantsïni jingoni.

• ¿Andisï xáni jukaparhakue tánguarhini juchari erachichani jingoni?

• ¿Kántsï uékapirini mítini juchari kúnguarhikuani?

Primeru siglurhu anapu kristianecha, tánguarhintasïrendi paraksï pirekuni ka kómarhini Tata Diosïni, paraksï arhintani ka jorhenguarhini Bibliaeri ambe (1 Korintu 14:26). Engajtsï cha niuaka juchari tánguarhikuecharhu, exeakajtsï eska juchajtu inde ambejkusï újka.

Ambakiti ambechi jorhenguarhisïnga enga Bibliarhu pʼitakatejka. Kúnguarhikuechaksï tánguarhisïndi sábadu o domingu paraksï kurhaani arhijtsïkperata ma enga Bibliarhu pʼitakatejka ka i media ora jimbo nitamakuarhisïndi, i arhijtsïkperatajtsïni jarhuatasïndi parachi kurhanguni nénajtsïni jarhuatasïni Biblia juchari irekuarhu ka parachi kurhanguni ambe tiempuchi jimbo irekaxaki. Ka ixú, uákachi arhiantani Bibliarhu, textuechani engaksï jima arhinhantajka. Tátsekua uénasïndi Jorhenguarhikua ma La Atalaya jingoni, i ma ora jimbo nitamakuarhisïndi, ini jorhenguarhikuarhu, exesïngachi tema ma enga rebista La Atalaya jimbo pʼitakatejka ka ixú iáminduksï úsïndi mókuntskuechani íntspiani. Jorhenguarhisïngachi néna úni juchari irekuarhu ambe engajtsïni Biblia arhijka. Jukari sientu diesi mili kúnguarhikuechaksï jarhasti iámu parhakpinirhu, ka iáminduchi májku ambe jorhenguarhisïnga.

Jarhuatasïndijtsïni parachi sánderu sési jorhentpini Bibliaeri ambe. Ístuchi tánguarhisïnga máteru jurhiatikua enga no sábadu o dominguejka, i tánguarhikua tanimu parti jimbo úkuarhisïndi. Primeru parti media ora jimbo nitamakuarhisïndi, ka i arhinhasïndi Bibliaeri Jorhenguarhikua Kúnguarhikua jingoni, ixuchi sánderu sési jorhenguarhisïnga Jeobaeri juramukuechani ka Bibliarhu anapu profesiechani, ixú, erachi ma kurhamarhikuechani uásïndi ka jucha mókuntskuechani íntspiasïnga. Tátsekua uénasïndi Jorhentperakua engajtsïni Jorhendajka néna úni Tata Diosïri Ánchikuarhitani, i media ora jimbo nitamakuarhisïndi. Ixuchi úsïnga uandani ambe engachi jorhenguarhika Bibliarhu ima semana engachi arhintaka Bibliani. Tátsekua erachicha engaksï karakuarhitini jaka ini jorhentperakuarhu, nitamataraasïndiksï sapirati arhijtsïkperakuechani, engaksï na nitamatarajkia, erachi ma arhiasïndi nénaksï uá sánderu sési arhintani ka sánderu sési nitamataraani arhijtsïkperakuechani (1 Timoteo 4:13). Ultimu, jarhasïndi Tánguarhikua Serbisiueri, i, media ora jimbo nitamakuarhisïndi, ixú, arhijtsïkperatechani jimbo, xarhatakuechani jimbo ka entrebistechani jimbo, jorhendasïndijtsïni néna úni sánderu sési jorhentpini Bibliaeri ambe.

Engajtsï tánguarhiska juchantsïni jingoni, ískujtsï pakaraaka exerini na engachi kánikua ambe jorhenguarhijka Bibliaeri ambe (Isaías 54:13).

• ¿Ambejtsï jorhenguarhia Jeobaeri testiguecheri tánguarhikuecharhu?

• ¿Náki tánguarhikuarhujtsï uékapirini nirani?

¿Exeskijtsïa ini fotuechani jimbo na engachi xáni sési mórhekuarhitini nirajka Jeobaeri testiguecha juchari tánguarhikuecharhu? ¿Andichisï xáni sési pímbinharhati nirajki?

Para respetu xarhatakuni juchari Tata Diosïni. Ísïsti, Tata Diosï no jusgarpisïndi seguni eska ma na xarharaaka (1 Samuel 16:7). Peru engachi tánguarhijka para Jeobani kómarhini, uékasïngachi respetu xarhatakuni imani ka ístu juchari erachichani. Enga jucha nipiringa juesini ma exeni, uékapiringachi sési jásï nirani para respetu xarhatakuni jimboka juramuti máeska, ¿no ísïski? Ísï jimbo, enga jucha nirajka tánguarhikuecharhu, sési jásïchi nirasïnga jimbokachi uékasïnga respetu xarhatakuni Jeobani, imani enga jindeka “iámu parhakpinirhu anapu Juesi”, ka ístuchi uékasïnga respetu xarhatakuni kʼumanchikuani engachi jimbo tánguarhijka, jimbokachi jimasï kómarhijka Jeobani (Génesis 18:25).

Para xarhatani eskachi úxaka ambe enga Biblia uandajka. Biblia uandasïndi eskaksï kristianuecha jatsiska para “sési xukuparha[ni] [...] para eskaksï xarhataaka eskaksï ambakiti eratsikua jukaska” (1 Timoteo 2:9, 10). “Sési xukuparhani” arhikuekasïndi no jukani imani takusïni engachi jimbo kʼéri ambe exenhaaka, o enga ma jukari márhekuarhiaka o jukari katsikatsisïni o no iójtarani o máteru ambe. Ka enga uandajka “eskaksï xarhataaka eskaksï ambakiti eratsikua jukaska”, arhikuekasïndi eska ma jatsiska para sési xukuparhani, ma no jatsisti para jáxetini jámani o karukarupasï. Ini textuechani úraparini, uákachi erakuni nénachi xukuparhaa, seguni eskachi na tsitiaka, peru méntkisï sési eratsiparini. Engachi sési xukuparhaaka, sésichi xarharaaka ka i ambe uáti “eska juchari Diosï [...] iámindu ambe jimbo sési arhikateaka”, nájkirukachi no ma ambe uandaaka (Titu 2:10; 1 Pedru 2:12). Engachi sési mórhekuarhitini nirajka tánguarhikuecharhu, úsïndi eska kʼuiripu sési jásï ambe uandaaka Jeobaeri ireteri ambe.

Parachi sési xarharani ka pímbinharhati jarhani, no uétarhisïndi ima xukuparhakua jukani enga kánikua jukaparhaaka. Ísï jimbo, ju je juchari tánguarhikuecharhu nájkirukajtsï no jatsiaka inde jásï xukuparhakua enga jucha úrajka.

• ¿Andisï xáni jukaparhakue sési xukuparhani engachi nirajka kómarhini Jeobani?

• ¿Náki textuechajtsïni uá jarhuatani engachi uékaaka mítini néna xukuparhani?

Engajtsï jorhenguarhini jaka Bibliaeri ambe Jeobaeri testiguni ma jingoni, seguruchi jarhaska eskajtsï sési prepararikuarisïnga imani ambe jingoni engajtsï mándani semani exejka. Parajtsï sánderu kókuani mítini ambe enga Biblia uandajka, ístu uétarhisïndi májkueni úni tánguarhikuechani jingoni. Peru parajtsï úni méntkisï sési prepararikuarini, uétarhisïndi programa ma jatsini.

Eratsinta je nani ka na jatintsï uá prepararikuarini. ¿Na jatintsï uá sánderu sési prepararikuarini? ¿Xarhintku, ante de uénantsï ánchikuarhini, o chúrikua, engaksï chári sapicha kʼuíakia? Engajtsï no kánikua tiempu jatsiaka, uákajtsï eratsintani na xántsï tiempu úra parajtsï prepararikuarini, ka asï jurajku je eskaksïni ambe ma ójkutaaka parajtsï no prepararikuarini. Jirinha je nani engajtsï uáka sési prepararikuarini, páta je radiuni, telebisionini ka telefununi. Engajtsï uénaaka prepararikuarini, kómarhi je Jeobani parajtsï mirikurhiani uandanhiatechani ka parajtsï Tata Diosïri Karakatanku eratsini jarhani (Filipusʌ 4:6, 7).

Kuirunharhikua je uandakuechani engaksï sánderu jukaparhakueka ka listu ja je parajtsï mókuntskua ma íntspini. Exe je orheta ambesï jorhentpejki iámu tema. Exe je títuluni, exe je na engaksï subtemecha újka eskachi kurhanguaka temani, exea je dibujuechani, ka arhianta je kurhamarhikuechani engaksï jindeka para miántskua ma úni, jimbokaksï i jindeska engajtsïni arhijka ambechisï jorhenguarhia indeni tema jimbo. Tátsekua, arhianta je párrafuechani, ka jánguarhi je exeantani mándani párrafurhu anapu mókuntskuechani. Jirinhaanta je Bibliarhu textuechani, ka jánguarhinta je exeni nénaksï xarhatasïni inde textuecha eska Bibliarhu pʼitakateska tema engajtsï jorhenguarhini jaka (Ukuecha 17:11). Engajtsï exentaakia mókuntskuani, kuirunharhiku je o ístu kuirunharhikua je uandakuechani engaksïni jarhuataaka miántani mókuntskuani. Ka tánguarhikuarhu, uákajtsï jájki tarhatani ka mókuntskua ma íntspeni chári uandakuechani jingoni.

Exeparini ambe engajtsï jorhenguarhiaka mándani semana tánguarhikuecharhu, uákajtsï sánderu jánhaskani ambe enga Biblia jorhentpejka (Mateu 13:51, 52).

• ¿Nénajtsï uá programa ma úni, parajtsï sési prepararikuarini tánguarhikuechani jingoni?

• ¿Nénajtsï uá prepararikuarini parajtsï mókuntskua ma íntspeni tánguarhikuecharhu?

Ísï eska ióntki, Jeoba uékasïndi eskaksï familiecha arhutaka tiempuni paraksï márku jarhani, paraksï sánderu andarherani Tata Diosïni ka paraksï sánderu uékperani (Deuteronomio 6:6, 7). Jimbochisï Jeobaeri testiguecha arhutajka tiempuni mándani semana parachi iámu familia márku kómarhini Tata Diosïni. Úraparini Bibliani, jorhenguarhisïngachi imani ambe enga mándani familia uétarhinchajka. Imecha jamberi engaksï jandiajku irekajka, uátiksï sési úrani ini tiempuni enga jindeka para Tata Diosïni kómarhini, engaksï jorhenguarhiska Bibliarhu, tema ma engaksï imecha tsitiaka.

Tiempu ma parachi sánderu andarherani Jeobani. “Andarhiera je Diosïni, ka imajtuksïni andarhieraati chánksïni.” (Santiagu 4:8.) Sánderuchi mítisïnga Jeobani engachi jorhenguarhijka imeri Karakatarhu, nénaeski ima ka ambe enga újka. ¿Nénachi uá familieri jorhenguarhikuani? Uákachi arhintani Bibliani ka uákachi imani arhintskuani arhintani engachi mándani semana jatsijka Jorhentperakuani jimbo engajtsïni Jorhendajka néna úni Tata Diosïri Ánchikuarhitani. Iáminduchi uáka ma parti arhintani Bibliani ka tátsekuachi iámindu uáka uandani ambechisï jorhenguarhi.

Tiempu ma parachi sánderu uékperani familia jingoni. Ma familia sánderu uékperasïndi engaksï márku jorhenguarhijka Bibliaeri ambe. I tiempu engajtsï tánguarhiaka, jatsisti para iáminduechani sési ka agustu pʼikuastaani. Ka jatsisti paraksï iáminduecha erokuarhini jarhani ini jurhiatikuani. Tátichaksï uáti ambakiti temaechani pʼitaani rebistechani jimbo engaksï jindeka La Atalaya ka ¡Despertad!, o juchari pájina jw.org Internetirhu, uátiksï ima temaechani pʼitaani engaksï jarhuatauaka sapiichani paraksï orhepani uérakuani uandanhiatechani engaksï eskuelarhu jatsiauaka ka seguni eskaksï na xáni jatiriuaka. Ka ístuksï uáti kántikuechani pireani engaksï tánguarhikuarhu pirenhaaka ka engaksï na kʼamaraakia, uátiksï ambe ma arhani.

I tiempu engachi úrajka mándani semana parachi márku kómarhini Jeobani, úsïndi eska iámu familia kánikua tsitiaka jorhenguarhini Bibliaeri ambe, ka engachi ísï úska, Jeoba kánikua újchakuraati juchari familiani (Salmo 1:1-3).

• ¿Andichisï arhutajki tiempu parachi iámu familia kómarhini Tata Diosïni?

• ¿Ambeksï uá táticha paraka iámu familia tsitiaka ini jorhenguarhikuani?

¿Exeskijtsïa na engaksï xáni tsípikua jingoni xarharajka i kʼuiripuecha? Kʼéri tánguarhikuarhuksï ma jarhasti. Ióntki anapu kʼuiripu enga marhuakuenga Tata Diosïni, arhinhaspti eska ma uéxurhini jimbo, tanimu ueltaksï tánguarhintapiringa, ka juchajtu iásï kánikua sési pʼikuarherasïnga kʼérati tánguarhikuechani jatsiani (Deuteronomio 16:16). Mándani uéxurhini, tanimu ueltachi jatsiasïnga kʼérati tánguarhikuechani: tsimani kʼéri tánguarhikua sirkuitueri ma jurhiatikueri, ka kʼéri tánguarhikua rejioniri, tanimu jurhiatikueri. ¿Nénajtsïni marhuachisïni i tánguarhikuecha?

Úsïndiksï eskachi sánderu uékperaaka. Israelitechaksï sési pʼikuarherasïrendi kómarhini Jeobani “engaksï tánguarhintaenga máteruechani jingoni”, ka juchajtuchi sési pʼikuarherasïnga engachi tánguarhintajka juchari erachichani jingoni kʼéri tánguarhikuecharhu parachi kómarhini Jeobani (Salmo 26:12; 111:1). Ini kʼérati tánguarhikuecharhu, úsïngachi mítiani erachichani máteru kúnguarhikuarhu anapuechani ka asta máteru paisi anapuechani. Teruxutinchi márku tʼiresïnga jima engachi tánguarhijka, i ambe úsïndi eskachi sánderu sési mítperaaka erachichani jingoni (Ukuecha 2:42). Ini kʼéri tánguarhikuecharhu, úsïngachi exeni na engachi xáni uékperajka iámu parhakpinirhu anapu erachichani jingoni (1 Pedru 2:17).

Úsïndiksï eskachi sánderu jakajkuaka Jeobani. Israelitechaksï kánikua jukaparharasïrendi “[kurhanguni] uandakuechani” engaksï jorhenguarhienga Tata Diosïri Karakatarhu (Nehemías 8:8, 12). Juchajtuchi kánikua jukaparharasïnga ambe engachi kʼérati tánguarhikuecharhu jorhenguarhijka. Ini kʼéri tánguarhikuecharhu, jorhenguarhisïngachi tema ma enga Bibliarhu pʼitakatejka. Arhijtsïkperakuechani jimbo ka máteru ambe jimbo enga jima jorhentpinhajka, jorhenguarhisïngachi úni ambe enga Tata Diosï uandajka. Kánikuajtsïni uinhaperantasïndi kurhajchaani imani erachichani engaksï jánguarhintani jaka marhuakuni Jeobani ini jurhiatikuechani jimbo enga xáni no sési jánhaskuarheni jaka. Kʼéri tánguarhikuarhu tanimu jurhiatikueri, nitamasïndiksï Bibliarhu anapu dramecha, xukuparhakua jingoni engaksï jiánisï jukanhaenga ka i dramecha, uánikua ambejtsïni jorhendasïndi. Ini kʼéri tánguarhikuechani jimbo, ístuksï itsï atakuarhisïndi máru erachicha, paraksï xarhatani eskaksï aiakukuarhiskia Tata Diosïni.

• ¿Andichisï xáni sési pʼikuarherajki kʼéri tánguarhikuecharhu jarhani?

• ¿Nénaksïni marhuachia nirani juchari kʼéri tánguarhikuecharhu?

Jesusi ante de uarhini, uandaspti: “I ambakiti eianhperakua Diosïri juramukueri, aianhpinhaati iápurhu parhakpinirhu paraka iápurhu anapu kʼuiripuecha mítitinksï jauaka, ka jimajkani kʼamaraati i tiempu” (Mateu 24:14). ¿Néna úkuarhipirini iámu parhakpinirhu i eianhperakua? Ísï eska Jesusi na úpka enga ixú Parhakpinirhu japka (Lukasʌ 8:1).

Pʼorhembisïngachi kʼuiripuni imecheri kʼumanchikuarhu. Jesusi jorhendaaspti imeri chúxapatichani eskaksï nipiringa eianhpini Tata Diosïri ambe mándani kʼumanchikuarhu (Mateu 10:11-13; Ukuecha 5:42; 20:20). I jorhenguarhitichaksï arhinhaspti nani engaksï jamberi niárapiringa aianhpini (Mateu 10:5, 6; 2 Korintu 10:13). Ka juchajtu mítiskia néna eianhpini, ísï jimbosï mándani kúnguarhikua jatsikuarhetia nani enga jamberi eianhpiaka. Ísïchi úsïnga kʼuiripuni sánderu “sési aianguni” Tata Diosïri ambe, ísï eskajtsïni Jesusi na juramuchika (Hechos 10:42, NM).

Jánguarhintasïngachi jirinhantaani kʼuiripuechani. Jesusijtsïni jorhendasti nani engachi eianhpipiringa, ima eianhpisti nani engaksï uánikuecha jarhaenga, marirhu uanamukuni ísï, ka jima engaksï kʼuiripuecha itsï pʼitaenga (Markusʌ 4:1; Juanu 4:5-15). Juchajtu májkueni úsïnga, uandontskuarhikusïngachi kʼuiripuni Bibliaeri ambe nani uéjkisï engaksï jauaka: xanharu jimbo, tiendecharhu, plasecharhu ka asta telefunu jimbo. Eianguasïngachi Jeobaeri ambe juchari besinuechani, imechani engachi jingoni ánchikuarhijka, engachi jingoni eskuela jámajka ka parientichani. I ambesï úni jati eskaksï miioni jimbo kʼuiripuecha iámu parhakpinirhu kurhaauaka “ambakiti eianhperakuani enga uáka eskaksï pʼímutantskateuaka” (Salmo 96:2).

Eratsinta je néntsï tsitipirini eianguni ini ambakiti ambe ka exe je néna marhuakua i ambe. Asï chájku míti je i xáni ambakiti ambe. Asï iónda je eianguani máteruechani i ambe engajtsï mítikia cha.

• ¿Ambe “ambakiti eianhperakua” jatsiskichi para eianhpini?

• Jeobaeri testiguecha, ¿nénachi májkueni úsïni eska Jesusi, engachi nirajka eianhpini?

I uandakua prekursori, májkuenisti eska uandani orheta ka úrakuarhisïndi para ima kʼuiripu enga xanharu ma mítajka jimesïsï enga nótki nema nitamajka, parakaksï máteruechajtu uáka nitamani. Úpiringachi uandani eska Jesusi prekursori máespka, jimboka axanhaspka Parhakpinirhu para aianhpini Tata Diosïri Reinueri ambe ka para xanharu ma mítani parachi pʼímutantskataeni (Mateu 20:28). Iásïjtu jucha májkueni jámasïnga eska Jesusi ka kánikua tiempuchi arhutasïnga parachi nirani disipulu uáni (Mateu 28:19, 20). Máruksï niárastia prekursori úkuarhini.

Nema enga sáno pauani pauani nirajka aianhpini. Iámindu Jeobaeri testiguechaksï aianhpisïndi Tata Diosïri Reinueri ambe. Peru jarhastiksï máru engaksï sési eratsekuntakia, ka úsïndiksï prekursori regulari úkuarhini, íksï setenta ora eianhpesïndi mándani kutsï. Paraksï úni ini ambe, máru jurhiatikuajkuksï ánchikuarhisïndi. Jarhastiksï máteruecha engaksï intsïnhajka sésikua paraksï prekursori espesialini ka íksï axanhasïndi nani enga sánderu uétarhijka aianhpini; íksï mándani kutsï siento treinta ora o sánderu aianhpisïndi. Prekursorichaksï no jatsikuarhesïndi kánikua ambe, peru mintsikasïndiksï eska Jeoba íntsauaka ambe engaksï uétarhinchaaka (Mateu 6:31-33; 1 Timoteo 6:6-8). Imecha engaksï no újka prekursori regulari o prekursori espesiali úkuarhini, úsïndiksï prekursori auxiliarini, íksï ma kutsï jimbo, treinta o sinkuenta oraksï aianhpisïndi.

Prekursori úsïndi i ambe, jimboka uékasïnga Jeobani ka kʼuiripuni. Májkueni eska Jesusi, juchajtu exesïnga eska kʼuiripu méntku no ma ambe mítiska Jeobaeri ambe (Markusʌ 6:34). Peruchi mítiska eska Biblia uáka sési pʼikuastaani, jimboka aianguasïnga eska sánderu orhepani jauaka ambakiti irekua ma. Prekursori kánikua uékasïndi kʼuiripuni, jimbosï úrajti imeri tiempuni ka imeri uinhapikuani para jarhuataani máteruechani parakaksï mítiaka Tata Diosïni (Mateu 22:39; 1 Tesalonika 2:8). I ambe kánikua sési pʼikuastasïndi, imeri jakajkukua sánderu uinhapintasïndi ka sánderu andarherasïndi Jeobani (Ukuecha 20:35).

• ¿Néski prekursori ma?

• ¿Andiksïsï máru testiguecha prekursori regulari o prekursori espesiali úkuarhijki?

Desde ióntki ma ambe engaksï Jeobaeri testiguecha újka jindesti Jeobaeri ambe jorhenguarhini. Imecha engaksï sáno pauani pauani nirajka aianhpini Tata Diosïri Reinueri ambe ambakiti ambeksï jorhendanhasïndi, parakaksï uáka sési úni ‘indeni ambe engaksï enkargarinhaka para úni’ (2 Timoteo 4:5).

Jorhentperakua para Prekursoricha. Enga prekursori regulari ma andangutaakia ma uéxurhini komueska prekursori, kararkuarhinhasïndi jorhentperakuarhu ma enga seisi jurhiatikua durarijka ka enga Kʼumanchikua Reinuerirhu ma jimbo úkuarhijka enga no xáni iauani pakarakujka. I jorhentperakua jarhuatasïndi prekursorini para sánderu andarherani Jeobani, para sánderu sési úni imeri ánchikuarhitani ka para méntkisï seguirini eianhpini Jeobaeri ambe.

Jorhentperakua para Eianhpiricha Reinueri. I jorhentperakua tsimani kutsï durarisïndi ka jindesti para jorhendaani prekursorichani engaksï uékajka jurajkuni imecheri kʼumanchikua para marhuani máteru nani enga uétarhijka. Májkueni eska sánderu kʼéri Eianhpiri enga marhuaka ixú parhakpinirhu, Jesukristu, imaksï uandasïndi: “¡Ixú jarhaska ji! Jíndini axa” (Isaías 6:8; Juan 7:29, NM). Nirani máteru nani ísï marhuani, úpirindi arhikuekani jorhenguarhini ménderueni irekani, máteru ambe tʼireni, ménderueni xukuparhani, máteru pʼindekuechani jatsiani ka ménichanisï máteru idioma jorhenguarhini. I jorhentperakua jarhuataasïndi paraksï ísï irekani eska Biblia na uandajka, jimbokaksï uétarhinchaaka jima engaksï marhuani jauaka ka ístuksï jorhenguarhisïndi uánikua ambe enga jarhuatauaka para Jeoba ka imeri kúnguarhikua sánderu sési úraani. Ka i jorhentperakua jindesti para imecha engaksï 23 a 65 uéxurhini jatirika, engaksï tembuperatini jakaia ka ístu para uátsïcha ka tumbicha.

Bibliaeri Jorhenguarhikua Galaadiri enga Watchtoweririka. Galaadi, ebreu jimbo arhikuekasïndi “tsakapu tánantskatecha enga marhuajka para uandantani ambe ma”. Desde 1943 enga uénaka Galaadi, jukari ocho mili misioneruechaksï uérastia i eskuelarhu uératini ka axanhastiksï para nirani eianhpini “asta jima enga sánderu iauaniika parhakpinirhu” ka sési nikuasïndi (Ukuecha 13:47). Engaksï primeru misioneruecha Perú niárapka, no ma kúnguarhikua jarhaspti; peru iásï jukari mili kúnguarhikuechaksï jarhastia. Engaksï juchari misioneruecha Japón niárapka, nóksï jamberi diesi Jeobaeri testiguecha jarhaspti; ka iásï jukari dosientusi mili testiguechaksï jarhastia. I jorhentperakua iúmu kutsï durarisïndi ka jorhentpesïndi sánderu sési mítini Bibliani. Ima engaksï marhuani jaka komueska prekursori espesialicha, misioneruecha engaksï nótki nirajka Galaadi, engaksï sukursali ma jimbo jaka o engaksï sirkuitueri orhejtsïkutiika, pʼímarhinhasïndiksï ini jorhentperakuarhu paraksï sési jorhendakata jarhani ka ísïksï úni jarhuajpeni para sési uaxastani ka para seguirini úkuarhini ánchikuarhita enga úkuarhejka iámu parhakpinirhu.

• ¿Para ambe marhuasïni Jorhentperakua para Prekursoricha?

• ¿Néchaksï úsïni nirani Jorhentperakuarhu para Eianhpiricha Reinueri?