JORHENGUARHIKUA 10
Jesusi méntkisï kurhandisti
¿Méntkisï fásilisïni kurhajchani chíti tátichani?... Ménisï úkua jukasïndi, ¿no ísïski? ¿Mítiskiri ambekini jarhuataa parari kurhandini? Jesusiri ejempluni. ¿Mítispiri eska ima méntkisï kurhajchaska Jeobani ka tátembechani?... Ju jorhenguarhini sánderu Jesusiri ambe.
Ante de Jesusi Echerirhu jurhani, auandarhu irekaspti imeri Táti Jeoba jingoni. Peru enga Echerirhu japka, ístu jatsispti tátini ka nándini ma. Íksï Maria ka Jose arhinhasïrendi. ¿Uékapiriniri mítini nénaksï niáraspi i, Jesusiri tátembeni?...
Jeoba milagru ma úspti, paraka Jesusi, Mariaeri matrisirhu kʼuiripepiringa, ísï eskaksï na kʼuiripejka charhakuecha. Ka nuebi kutsï tátsekua, Jesusi andajpenuspti ixú echerirhu. Ka ísï niáraspti Maria, Jesusiri amambeni. Ima ka Jose kʼuiriperasptiksï Jesusini.
Enga Jesusi 12 uéxurhintku jatiripka, xarhataspti eska kánikua uékasïrenga Jeobani, imeri Táti auandarhu anapuni. I ambe úkuarhispti enga Jesusi ka imeri familiaksï nípka Jerusaleni. Nirasptiksï jima paraksï Jeobani kómarhini. Engaksï kʼuanhatsintani japkia, Jose ka Maria exesptiksï eska Jesusi no kʼuanhatsintaxapka imecha jingoni. ¡No nani xarhantasïrendi! ¿Amberi exesïni eskaksï úspka Maria ka Jose?...
¿Andisï Jesusi templurhu japi?
Sóntkuksï kʼuanhatsintaspti Jerusaleni ka úndasptiksï jirinhantani. Iápurisïksï jámaspti jirinhantani tanimu jurhiatikua. ¡Kánikuaksï uandanhiaxapti! Astakaksï exentapka. ¿Mítiskiri nani jarhaspi?... Templurhu jarhaspti. ¿Andisï jima japi? Jimboka jima uánikua ambe úpiringa jorhenguarhini Jeobaeri ambe. Jesusi uékasïrendi Tátembani ka uékasïrendi úni imani ambe enga sési pʼikuastapiringa. Enga Jesusi kʼuiripepkia ka kʼéni, seguiristi kurhajchani Jeobani. Jesusi méntkisï kurhandisti, nájkiruka méni úkua jukaenga, jimboka jarhaspka kʼuiripu enga kánikua no sési kámaenga. ¿Exesïniri eska Jesusijtu méntkisï kurhajchaspka Joseni ka Mariani?... Biblia uandasïndi eska Jo.
¿Exeskiri eska Jesusi méntkisï kurhandiska?... Íjtsïni ambakiti ambe jorhendasïndi: nájkiruka ménisï úkua jukaaka, uétarhisïndi méntkisï kurhajchaani tátini ka nándini. ¿Kurhajchauari tʼujtu?...