¿Néminduni jindeski ji?

¿AMBERI ÚPIRINI TʼU?

Eranhaska arini ambe: Kareni diesi minutu ísï páxatiia kʼuínchikuarhu ma ka ma repentku kurhaasïndi eska nema arhisïnga:

Enga Kareni tátsepani ísï erajka, exesïndi eska Jessica tsimani serbesechani jupikapuaxaka. Aiakusïndi ma ka arhisïndi: “Nóteruri nanaka sapichu máeskia. Uákari tsípikuarhini sáni, o ¿nómbe?”.

Kareni no uékasïndi arhani serbesa, peru Jessica imeri amigaesti. Ka Kareni no uékasïndi eska imeri amiga eratsiaka eska ima no sáni uékasïnga tsípikuarhini. Ístu, Jessica ambakiti uátsï máesti. Enga inde arhajka, no xáni no sési jati. Eratsisïndi: “Serbesa májkuesti. No ísïsti eska droga ambe úrani”.

¿Amberi úpirini engari Karenipiringa?

EROKA KA ERATSINTA

Parari ambakiti ambe erakuni úni enga i ambe jauaka, uétarhinchaakari mítini néminduri jindeski. I ambe arhikuekasïndi sési mítini ambe engari jakajkujka ka miáni imani ambakiti ambe engari jorhendanhaka. Sési mítitini jarhani ini ambe, kuájchakusïndikini ka jarhuatasïndikini parari tʼu erakuni ambe úni chíti tsípikua jingoni, enbesi de máteruechaksïni arhini ambe úni (1 Korintu 9:26, 27).

¿Nénari uá jatsini indeni uinhapikuani? Para uénani, exepariani kurhamarhikuechani engaksï orhepani jaka.

1. ¿AMBE KA AMBE NO ÚKUA JUKANCHASÏNI?

Engari mítiska amberi jorhenaski sési úni ka náki kualidadichandi jatsiaski, uákari sánderu seguru pʼikuarherani.

EJEMPLU BÍBLIKU. Apostuli Pablu karaspti: “Nájkirukani juchiti uandakua jimbo kueratajka sési uandajtsïkpini, no ma ambe kueratasïngani mítini” (2 Korintu 11:6). Jimboka sési mítispka Bibliani, no chketakuarhispti engaksï arhinchapka. No jurajkuspti eska ima ambe engaksï arhipka, úpiringa eska nóteru seguru pʼikuarherapiringia (2 Korintu 10:10; 11:5).

EXEKUARHI. Kara amberi jorhenaski sési úni.

Iásï, kara chíti sánderu ambakiti kualidadi ma (komu ari, pʼamojpiti, intsïmpiti, mintsinharhikua o puntuali).

2. ¿AMBE KA AMBE ÚKUA JUKANCHASÏNI?

Ísï eska sïndari ma na katsïkurhijka jimboka nani iámu jiánguarhispkia, tʼujturi uáka ma repentku mirikurhini ambe engari jorhendanhaka ka chíti jakajkukuechani, engari jurajkutakuarhiska imani ambe jimbo engari úkua jukanchajka.

EJEMPLU BÍBLIKU. Pablu mítispti ambe ka ambe úkua jukanchasïreni. Jimbosï karapti: “Jimboka juchiti mintsita meru jeiapanhintasïnga Diosïri leini, peru ji exexaka máteru ambe juchiti kuerpurhu enga no janhanharhijka juchiti mintsita jimbanhini ka enga újka eskani ji sánderu janhanharhiaka pekaduni enga juchiti kuerpurhu jaka” (Roma 7:22, 23).

EXEKUARHI. ¿Amberi uétarhinchasïni jorhenguarhini sési úni engari úkua jukanchajka?

3. ¿AMBE UÉKASÏNI ÚNI?

¿Jatapiriniri taxini ma ka arhindi choferini eska ma mansana jimbojku jámani japiringa astaka kʼamanhapiringa gasolina? Inde ambe tontuepirindi, ¿a no? Ka ístukini kánikua jukaparhakua uérachepirindi.

¿Ambechi jorhenguarhisïni? Engari eratsintaska ambe engari uéjka úni, nori ísku no nani máru jámani jauaka. Mítiakari naniasïri niraxaki ka néna niárani.

EJEMPLU BÍBLIKU. Pablu karaspti: “Ji uiriaxaka, peru no komueska ima enga no mítika nani enga niáraaka” (1 Korintu 9:26). Enbesi de ísku no nani máru jámani, Pablu eratsintaspti ambe enga uékaenga úni ka jánguarhintaspti ísï úni (Filipusʌ 3:12-14).

EXEKUARHI. Kara tanimu ambe engari uékapiringa úni ini uéxurhini.

4. ¿JI AMBE JAKAJKUSÏNI?

Engari no seguru jaka ambe engari jakajkujka, kʼuiripu máeuakari enga no mítiaka ambe úni. Méntkuri mójtakurhini jauaka parari terokukuani chíti amiguechani, ísï eska kamaleoni ma na mójtakurhijka kolori para ísï xarharani eska ima ambe enga uirhipandajka. Ima enga ísï újka, no seguru jarhasïndi imeri jakajkukuecheri ni ambe enga jorhendanhaka.

Peru engari no jurajkuaska chíti jakajkukuechani —ambe uéjkiksï úni máteruecha—, xarhataakari eskari seguru jarhaska chíti jakajkukuecheri ka ambe engari jorhendanhaka.

EJEMPLU BÍBLIKU. Jamberi Danieli tumbi sapichu máepti engaksï jarharitapka imeri familiani. Peru ima útasï “mintsitarhu pʼikuarhinhisïrendi” uékani kurhajchaani Tata Diosïri leichani (Daniel 1:8). No uékaspti jurajkuani imeri jakajkukuechani ni imani ambe enga jorhendanhapka, ka méntkisï úspti ambe enga jakajkuenga.

EXEKUARHI. ¿Amberi jakajkusïni? Ejemplu ma: ¿Jakajkusïniri Tata Diosïni? ¿Andi? ¿Ambe úski eskari jakajkupiringa eska meru jarhaska?

¿Exesïniri eskaksïni Tata Diosïri juramukuecha marhuachisïnga? ¿Andi?

Exeparini ini ambe, ¿amberi uékasïni jindeni: chkurhi ma enga tarhiata pákuarhijka, o anhatapu ma engaksï ni sánderu kʼérati janikuecha kuaskujka? Engari uéjka ísïni eska anhatapu, jánguarhi seguru jarhani chíti jakajkukuecheri ka imani ambakiti amberi engari jorhendanhaka. I ambekini jarhuataati mókuntani kurhamarhikuani: ¿Néminduni jindeski ji?