KURHAMARHIKUA 9
¿Jatsipirini parani jakajkuni ebolusionini?
¿AMBERI ÚPIRINI TʼU?
Eranhaska arini ambe: Alex nóteru jánhaskasïndia ambe eratsini. Méntkisï jakajkusti eska Tata Diosï kueraaska iámu ambe. Peru imeri maestru enga Biología jorhentpijka, someni uandasïndi eskaksï sientifikuecha exeskia eska iámu ambe ebolusioni jimboeska. Alex no uékasïndi tontueni pakarani ka eratsisïndi: “Enga ísïika eskaksï sientifikuecha na uandajka, eska iámu ambe ebolusioni jimboeska, ¿néski ji parani uandani eska no ísïska?”.
Engari Alexipiringa, ¿jakajkupiriniri ebolusionini nomasi jimbokaksï libruecha uandasïnga eska ísïska?
EROKA KA ERATSINTA
Jarhastiksï kʼuiripuecha engaksï no eratsintaparini uandajka eskaksï jakajkusïnga ebolusionini o eska Tata Diosï kueraaska iámindu ambe, peruksï no úsïndi uandani andiksïsï ísï eratsijki.
Máruksï jakajkusïndi eska Tata Diosï kueraaska iámindu ambe nomasi jimbokaksï ísï jorhendanhaska tiosïu.
Máteruksï ebolusionini jakajkusïndi jimbokaksï ísï jorhenguarhiska eskuela.
SEISI KURHAMARHIKUECHA PARARI ÚKUARHIANI
Ebreu 3:4 uandasïndi: “Jimboka iámindu kʼumanchikuecha úkata jarhasïnga nemani jimbo, peru ima enga kueraaka iámindu ambeni, jindesti Diosï”. ¿Exesïniri eska ísïska ambe enga Biblia arhijka ixú?
Uandani eska no jarhaska Kuerajpiri ma, xáni tontuekuesti eska uandani eska i kʼumanchikua jandiajku úkuarhiska.
AMBE ENGA UANDANHAJKA: Iámindu ambe enga jaka, niárasti jarhani aksidenti ma jimbo, enga kʼéri ma charapka, (Big Bang).
1. ¿Ambe o né úski eska japiringa Big Bang?
2. ¿Ambe sánderu jakajkukuarheski: eska iámindu ambe ísku xarharakuarhiska, o eska nema kueraaska iámindu ambe?
AMBE ENGA UANDANHAJKA: Kʼuiripu animalicharhu uérasti.
3. Engachi kʼuiripuecha animalicharhu uéraka —komueska monuecharhu—, ¿andichisï kánikua sánderu jánhaskatii eska imecha?
4. ¿Andisï ima ambe enga xáni “arisku” xarharajka, xáni sési úkata jaki?
AMBE ENGA UANDANHAJKA: Xarhatanhastia eska ebolusioni ísïska.
5. Kʼuiripu enga ísï uandajka, ¿inbestigariskia eska ísïska?
6. ¿Na xáni uánikuechaksï jakajkusïni ebolusionini nomasi jimbokaksï arhiaska eskaksï jánhaskaticha jakajkusïnga?
“Eranhaska eskari juátarhisï niraxaka ka eskari sési jásï ma kʼumanchikua chkariri exesïnga. Seguru eskari no eratsipiringa: ‘¡Exe! Ixuksï máru anhatapuecha kuarhatseti ka méntkuksï úkuarhierani kʼumanchikua’. No úpirindi ísïini. Ísï jimbo, ¿andichisï jatsipirini para jakajkuni eska iámindu ambe enga jaka ísku xarharakuarhiska?” (Julia).
“Engakini nema arhipiringa eska imprentarhu ma kʼéri ma charaska ka eska tinta iápuru ísï etsakuarhiska ka eska jima uératini diksionariu ma uéraska, ¿jakajkupiriniri?” (Gwen).
¿ANDISÏNI JATSI PARA JAKAJKUNI TATA DIOSÏNI?
Bibliakini pʼímarhisïndi eskari úraaka chíti jánhaskakua (Roma 12: 1, TNM). O eska chíti jakajkukua no jatsiska para jupindaskata jarhani arini ambe jimbojku:
PʼIKUARHINHIKUA MA: “Ísï pʼikuarherasïnga enajki jaki ambe ma enga kánikua sánderu uinhapika”.
AMBE ENGAKSÏ JAKAJKUJKA MÁTERUECHA: “Nani engani irekaka, kʼuiripu jakajkusïndi Tata Diosïni”.
AMBE ENGA NEMA UÉJKA ESKARI JAKAJKUAKA: “Juchiniu arhinhasïnga eskani jatsiska para jakajkuni Tata Diosïni”.
Nori jatsipiringa para iámindu ambe jakajkuni, sánderu sési, jatsipiringari para mítini andirisï ísï jakajkujki.
“Enga maestru jorhentpini jarhajka klaserhu néna enga ánchikuarhijka kuerpu, sánderuni seguru pʼikuarherasïnga eska Tata Diosï jarhaska. Mándani parti, nájkiruka arisku jásïka, marhuasïndi. Sáno méntkisïchi no kuenta íntskukuarhisïnga ambe enga úkuarhijka juchari kuerpurhu. ¡Ískujtsïni pakatasïndi!” (Teresa).
“Engani exejka kʼéri ma edifisiu, barkuni ma o karruni ma, kurhamarhikuarhisïnga: ‘¿Né ú?’. Ejemplu ma, uétarhisïndi nema enga kánikua jánhaskatiuaka para karruni ma úni, jimboka uánikua piesa sapirhatichani jukaaska, ka iáminduksï jatsisti para jatanhentani ka sési marhuani. Ísï jimbo, enga karru ma úkata jaka nema jimbo, kʼuiripujtu úkata jarhasti nema jimbo” (Richard).
“Engani sánderu jorhenguarhienga siensiaeri ambe, menosi jakajkusïrenga ebolusionini. [...] Eratsisïnga eska sánderu úkua jukaska ebolusionini jakajkuni ka eska jakajkuni eska jarhaska Kueraajpiri ma” (Anthony).
ERATSI ARINI AMBE
Nájkirukaksï sientifikuecha ióni inbestigarikia, útasïksï no májkueni ambe jakajkusïndi ebolusioniri ambe. Engaksï ni imecha újka pakatperani ini ambe jimbo —ka seguni imaksïsï jorhenati—, jimajkani ¿no sési japirini eskari tʼu kurhanguarhipiringa íri ambe?