¿Jaiapanhentasïni Tata Diosï na engachi kómarhijka?

Eskachi na exeka máteru jorhenguarhikua jimbo, Tata Diosï no iámindu relijionichani jaiapanhiantasïndi. Peruchi uaaka ísï kómarhini juchaari Kuerajpirini eska ima na uéjka ka ísïchi sési pʼikuastaaka. ¿Néna uékasïni Tata Diosï eskachi kómarhiaka o náki relijionini jaiapanhentasïni? (Santiago 1:27; nota, TNM). Ju je exeni ambe enga Biblia uandajka.

1. ¿Nani arhisïni nénachi uaa kómarhini Tata Diosïni?

Bibliajtsïni aiangusïndi na engachi jatsika para kómarhini Tata Diosïni. Jesúsi arhispti Tata Diosïni: “Chiiti uandakua ísïisti” (Juanu 17:17). Máru relijionichaksï no ísï úsïndi eska na arhijka Tata Diosïri Karakata, sánderu sési imani ambeksï úsïndi engaksï kʼuiripuecha jorhentpijka ka imeecheri pʼindekuechani. Ka Tata Diosï Jeoba no tsitisïndi engaksï máru ‘ísku erataajka Tata Diosïri mandamientuechani’ (arhinta je Markusʌ 7:9). Máteru ambe, sésichi pʼikuastasïnga Tata Diosïni engachi ísï újka eska na arhijka Biblia ka engachi kurhajchaajka imeeri konsejuechani.

2. ¿Nénachi jatsiski para kómarhini Tata Diosï Jeobani?

Jatsiskachi para Tata Diosï Jeobantku marhuakuni, jimboka ima jindeeska juchaari Kueraajpiri (Jaŋaskuecha 4:11). I ambe arhikuekasïndi eskachi jatsiska para xénchani ka imantku kómarhini no ma diosï úkatani úraparini ni santuni ma o máteru ambeni (arhinta je Isaías 42:8).

Na engachi kómarhijka Tata Diosï Jeobani, jatsisti para “pímbinhasïini ka enga [Tata] Diosï jaiapanhentajka” (Roma 12:1). I ambe arhikuekasïndi eskachi jatsiska para kurhajchaani Tata Diosïri juramukuechani engaksï jángueri ambe uandajka. Pori ejemplu, imeecha engaksï xénchajka Jeobani, jukaparharasïndiksï ka kurhajchaasïndiksï juramukuechani engaksï temungurhirikueri ambe uandajka. Ístuksï no úsïndi imani ambe enga no sési úkuauaka komu droga ambe úrani, itsutani o kauini.a

3. Parachi kómarhini Tata Diosï Jeobani, ¿andichisï jatsi para tánguarhini imeecha jingoni engaksï kurhajchajka?

Juchaari tánguarhikuecha jimbo engachi mándani semana jatsiajka, úsïngachi k’éri ambe arhini “Jeobani [...] kúnguarhikuarhu” (Salmo 111:1, 2). Ma jindeesti engachi pirejka para k’éri ambe arhini Tata Diosïni (arhinta je Salmo 104:33). Tata Diosï Jeobajtsïni arhisïndi eskachi tánguarhiaka jimbokajtsïni uékasïnga ka mítesti eskajtsïni tánguarhikuecha jarhuataaka parachi tsípikua jingoni irekani para méntkisï. Engachi tánguarhijka iáminduechachi uinhaperperantasïnga.

JORHENGUARHI JE SÁNDERU AMBE

4. No sési jarhasti imajenichani úraani para Tata Diosïni kómarhini

BIDEU: ¿Uékasïni Tata Diosï eskachi imajenichani úrauaka parachi kómarhini? (3:26)

• ¿Ambe úkuarhispi ióntki engaksï máru Tata Diosïri iretarhu anapuecha imajenini ma úrapka para Tata Diosï Jeobani kómarhini?

Máru kʼuiripuechaksï imajenichani úraasïndi para Tata Diosïni kómarhini, jimbokaksï ísï pʼikuarherasïnga eskaksï ísï sánderu andarhierasïnga imani. Peru engaksï ísï úni jarhajka, ¿nóksï menusi úni jarhasïni Tata Diosïni? Arhinta je Éxodo 20:4-6 ka Salmo 106:35, 36, ka uandontskuarhi je íri ambe:

• ¿Ambeksï úrasïni kʼuiripuecha para Tata Diosïni kómarhini o náki imajenichanksï úraasïni?

• ¿Na exesïni Tata Diosï Jeoba engaksï imajenichani úraajka?

• ¿Chá na exesïni engaksï imajenichani úraajka?

5. Engachi Tata Diosï Jeobantku kómarhiska nóteruchi jakajkuakia no jurhimbiti jakajkukuechani

BIDEU: Jurhimbikua ústi eskani nóteru ísï japiringia eska jupikakata (5:16)

Arhinta je Salmo 91:14 ka uandontskuarhi je íri ambe:

• Engachi xarhatakuska Tata Diosï Jeobani eskachi xénchasïnga ka eskachi imantku kómarhisïnga, ¿ambejtsïni aiachisïni ima eska uaaka juchantsïni jimbo?

6. Kómarhisïngachi Tata Diosïni tánguarhikuecharhu

Engachi pirejka ka komentarini tánguarhikuecharhu, k’éri ambechi arhini jarhasïnga Tata Diosï Jeobani ka uinhaperperantasïngachi. Arhinta je Salmo 22:22 ka uandontskuarhi je íri ambe:

• ¿Sésijtsï pʼikuarherasïni enga tánguarhikuecharhu komentarinhajka?

• ¿Tsitipirintsï prepararini komentariu ma parajtsï komentarini tánguarhikuecharhu?

7. Tata Diosï Jeoba sési pʼikuarherasïndi engachi aianguajka máteruechani ambe engachi jorhenguarhijka

Mámaru jásï jarhasti engachi uaaka uandontskuarhekuani máteruechani Bibliaeri ambe. Arhinta je Salmo 9:1 ka 34:1, ka uandontskuarhi je íri ambe:

• Iámindu ambe engajtsï xáni jorhenguarhikia Bibliarhu, ¿ambejtsï uékapirini aianguani máteruechani?

AMBE ENGACHI JORHENGUARHIKA

Juchaari Kueraajpiri tsípisïndi engachi imantku kómarhijka, engachi k’éri ambe arhijka tánguarhikuecharhu ka engachi aianguajka máteruechani ambe engachi jorhenguarhijka.

Ambejtsï jorhenguarhiski

• ¿Nani arhisïni néna uékasïni Tata Diosï eskachi kómarhiaka?

• ¿Andichisï jatsi parachi Tata Diosï Jeobantku kómarhini?

• Parachi kómarhini Tata Diosïni, ¿andichisï jatsi para tánguarhini imeecha jingoni engaksï uéjka kurhajchani?

ÍSTU EXE JE INI AMBE

Exe je andisï uarhiiti ma sési pʼikuarherapi enga nóteru kómarhiapkia diosï úkatechani eksperiensiarhu “Nóteruni marhuakuasïngia diosï úkatechani”.

“Biblia jarhuataasti mójtakuni irekua” (Aianhpiri, 1 de juliu de 2011)

Exe je máru ambe engaksïni jarhuataaka komentarini tánguarhikuecharhu.

“Ju je k’éri ambe arhini Jeobani kúnguarhikuarhu” (Aianhpiri, eneru de 2019)

Ju je exeni na engaksï tánguarhikuecha jarhuatapka tumbini ma nájkiruka úkua jukanchenga nirani.

Tata Diosï Jeoba pendienti pásïndi jíndeni jimbo (3:07)

Uánikua kʼuiripuechaksï uandasïndi eskaksï kristianuecha krusini úrasïnga, ¿peruchi jatsiski para úrani para Tata Diosïni kómarhini?

“¿Andiksïsï Jeobaeri testiguecha no úrajki krusini?” (Artikulu ma enga jw.org jimbo jaka)