¿Jeobaeri testiguechaksï jurhimbiti kristianueski?

Jeobaeri testiguechachi jakajkusïnga eskachi jurhimbiti kristianueska. ¿Andi? Exeakachi nani enga jupindaskuarhijka ima ambe engachi jakajkujka, na engachi arhinhajka, ka na engachi xénchperajka iáminduecha.

1. ¿Naniksï jupindaskuarhisïni Jeobaeri testiguecha ambe engaksï jakajkujka?

Jesúsi arhispti Tata Diosïni: “Chiiti uandakua ísïisti” (Juanu 17:17). Jeobaeri testiguechachi májkueni úsïnga eska Jesúsi: Tata Diosïri Karakatarhuchi jupindaskuarhisïnga ambe engachi jakajkujka. Exe je nénaksï ueenaski jarhani Jeobaeri testiguecha ini jurhiatikuecha jimbo. Uéxurhini 1870 jimbo ísï, máru kʼuiripuechaksï ueenaspti jorhenguarhini Bibliaeri ambe paraksï exeni ambesï meru jorhentpijki Tata Diosïri Karakata. Imani ambeksï jakajkusïrendi ambe enga Biblia uandajka, nájkirukaksï iglesiecha no indeni ambe jorhentpienga. Ka tátsekuaksï ueenaspti máteruechani aianguani imani ambe engaksï Bibliarhu jorhenguarhienga.a

2. ¿Andichisï arhinhajki Jeobaeri testiguecha?

Tata Diosï Jeoba uandasïndi eskaksï imeecha engaksï imantku kómarhijka imeechaksï jindeeska imeeri testiguecha, jimbokaksï jurhimbitku uandantasïnga imeeri ambe (Ebreu 11:4-12:1). Bibliaeri jurhiatikuecha jimbo, Tata Diosï arhispti imeeri iretani: “Chájtsï jindeeska juchiiti testiguecha” (arhinta je Isaías 43:10). Ka Jesúsini arhisïndi “Testigu enga Mintsinharhikueka” (Apocalipsis 1:5, TNM). Jimbochisï 1931 jimbo, ini nombrini erakuka Jeobaeri testiguecha. Kánikuachi sési pʼikuarherasïnga ísï arhinhani.

3. ¿Nénachi xarhatasïni Jeobaeri testiguecha eskachi májkueni uékpisïnga eska Jesúsi?

Jesúsi xáni xénchaasïreendi imeeri chúxapatichani enga ísï exeauenga komueska imeeri familia (arhinta je Markusʌ 3:35). Jeobaeri testiguechajtuchi márku úkuarhintatixaka komu familia ma interu parhakpinirhu. Jimbochisï iáminduecha arhijperajka “erachi” ka “pirenchi” (Filemoni 1, 2). Ka ísïchi úsïnga eska na arhijka i juramukua: ‘Uéa je ermanuechani’ (1 Pedru 2:17). Jeobaeri testiguechachi mámaru ambe jimbo xarhatasïnga eskachi xénchperasïnga, ma jindeesti engachi jarhuataajka interu parhakpini anapu erachichani engaksï no sési ambe nitamakuarhini jarhajka.

JORHENGUARHI JE SÁNDERU AMBE

4. Ambe engachi jakajkujka, Bibliarhuchi jupindaskuarhisïnga

Jeoba uandarhixaptia eska Bibliaeri jurhimbikua niárapiringa sánderu sési kurhangunhani. Arhinta je Daniel 12:4 ka uandontskuarhi je íri ambe:

• Tata Diosïri marhuarhichaksï, ¿ambe niárapirini “sánderu” míteni engaksï na sánderu jorhenguarhini japiringa Bibliaeri ambe?

Exe je na engaksï jorhenguarhienga Tata Diosïri Karakatani máru Bibliaeri jorhenguarhiricha, enga ma jindeepka Charles Russell. Exe je BIDEUNI ka uandontskuarhi je íri ambe:

BIDEU: Niárasïndiksï míteni jurhimbikua ambe Biblieri (7:45)

• Eska na xarharajka bideurhu, ¿nénaksï jorhenguarhisïreeni Tata Diosïri Karakatani Charles Russell ka máteru Bibliaeri jorhenguarhiricha?

¿Mítespijtsï ini ambe?

Ménisïchi mójtakuska ambe ma engachi jakajkuenga. ¿Andi? Jimboka Tata Diosï úsïnga eskachi sánhani arhiaka sánderu sési kurhanguni imeeri Karakatani, májkueni eskachi na újka sánderu sési exeni paisajini ma eska na erandepajka (arhinta je Proverbios 4:18). Nájkiruka Biblia no mójtakurhijka, engachi sánderu sési kurhangujka ambe ma, mójtakusïngachi ambe engachi jakajkujka.

5. Aianhpisïngachi jurhimbikua Tata Diosï Jeobaeri ambe

BIDEU: Nombri ma enga xarhatajka neeskichi (2:40)

• ¿Andisï sési jaki engachi arhinhajka Jeobaeri testiguecha?

¿Andisï Jeoba kʼuiripuechani erakua paraksï imeeri testigueni? Jimboka uánikua chkuanderakua ambe uandanhaskia imeeri ambe, ka íksï kʼuiripuecha jurhimbitku uandantapirindi Jeobaeri ambe, enga jindeeka Tata Diosï jurhimbiti. Ju je exeani máru ini chkuanderakuechani.

Máru relijionicha jorhentpisïndi eska Tata Diosï uékasïnga eskachi imajenichani úrauaka para imani kómarhini. ¿Peru i ambe ísïiski? Arhinta je Levítico 26:1 ka uandontskuarhi je íri ambe:

• Eska na arhijka i tekstu, ¿nákiski jurhimbikua? ¿Ka ambe eratsesïni Tata Diosï imajenicheri ambe?

Máru relijioniri orhejtsïkutichaksï jorhentpisïndi eska Jesúsi jindeeska Tata Diosï. ¿Peru ísïiski i ambe? Arhinta je Juanu 20:17 ka uandontskuarhi je íri ambe:

• Eska na arhijka i tekstu, ¿nákiski jurhimbikua? ¿Májkueniski Tata Diosï ka Jesúsi?

• ¿Chá na pʼikuarherasïni míteni eska Tata Diosï Jeoba axaaska imeeri testiguechani paraksï uandantani jurhimbikua ambe imeeri ambe ka ístu imeeri Uájpeeri ambe?

6. Iáminduechachi xénchperasïnga

Biblia uandasïndi eskaksï kristianuecha májku k’éri jarhaska, ísï eskaksï particha kuerpueri. Arhinta je 1 Korintu 12:25, 26 ka uandontskuarhi je íri ambe:

• ¿Ambeksï jatsiski para úni jurhimbiti kristianuecha engaksï máteru kristianuecha no sési nitamakuarhini jauaka?

• ¿Chá ménisï exeskia eskachi Jeobaeri testiguecha xarhatasïnga eskachi xénchperasïnga?

Engaksï Jeobaeri testiguecha nani no sési nitamakuarhini jarhajka, interu parhakpini anapu erachichaksï sóntku úsïndi ambe ma. Parajtsï exeni ma, exe je BIDEUNI. Tátsekua uandontskuarhi je íri ambe:

BIDEU: Haití anapuechaksï orhepani uérasti enga urakani Matthew no sési úkuapka (5:29)

• Engaksï Jeobaeri testiguecha újka ánchikuarhitani para jarhuajpeni, ¿xarhatanksï jarhasïni eskaksï xénchperasïnga? ¿Andi?

AMBE ENGACHI JORHENGUARHIKA

Jeobaeri testiguechaksï jurhimbiti kristianuesti. Familiachi máeska interu parhakpini anapu kʼuiripuecheri engachi Tata Diosïni kómarhijka. Ambe engachi jakajkujka Bibliarhu jupindaskuarhisïndi ka aianhpisïngachi jurhimbitku ambe Tata Diosï Jeobaeri ambe.

Ambejtsï jorhenguarhiski

• ¿Andichisï eraku arhinhani Jeobaeri testiguecha?

• ¿Nénachi xarhatasïni eskachi xénchperasïnga?

• ¿Chá jakajkusïni eskaksï Jeobaeri testiguecha jurhimbiti kristianueska?

ÍSTU EXE JE INI AMBE

Jorhenguarhi je sánderu Jeobaeri testiguecheri ambe.

Jeobaeri testiguecha: na engaksï xáni mintsikapka Tata Diosïni. Parti 1: Nóteruksï pápkʼandu jarhasptia (1:00:53)

Exe je na engaksï Jeobaeri testiguecha xarhataka eska no ísïiska ambe engaksï máru jorhentpijka.

K’éri ambe arhinhasïndi Tata Diosïri nombri (7:08)

Jirinhantaa je mókuntskuechani engajtsï uéjka míteni Jeobaeri testiguecheri ambe.

“Kurhamarhikuecha engaksï sánderu úkuarhijka Jeobaeri testiguecheri” (Enga jaka jw.org)

Stephen niárasti no sési ambe niátani, jimboka kurhunheasïrenga máteruechani. Exe je ambe enga exepka Stephen Jeobaeri testiguecheri ambe enga jarhuatapka para mójtakurhini.

“Sánhani arhixapka sánderu no sési ambe úni” (Aianhpiri, 1 de juliu de 2015)