Jeobaeri testiguecheri kúnguarhikuarhu, ¿jarhaskiksï nanakecha engaksï jorhentpijka?

Jo. Jarhastiksï uánikua nanakecha engaksï jorhentpijka ambakiti aianhperakua Tata Diosïri Reinueri ambe. Salmo 68:11 tʼuini uandasptia: “Nanakecha engaksï aianhpijka ambakiti ambe, uánikuestiksï”.

Joperu méntku ménderuenisti ambe engaksï i nanakecha újka imani ambe jingoni engaksï máteru nanakecha újka imeecheri relijionicharhu. ¿Ambe jimbo ménderueniski?

Máteru relijionirhu anapu nanakechaksï jorhentpisïndi ka orhejtsïkuasïndiksï imeecheri iglesiarhu anapuechani, joperu nanakecha engaksï Jeobaeri testigueka, jorhendaasïndiksï iámindu imeechani engaksï no testigueka kʼumanchikuecharhu o nani uéjkisï engaksï jauaka.

Máteru ambe engaksï jimbo ménderuenika, jindeesti eska Jeobaeri testiguecheri kúnguarhikuecharhu tatakechajkuksï arhinhajti para jorhentpini tánguarhikuecharhu. Ísï jimbo, nanaka ma enga Jeobaeri testigueka, no úsïndi jorhentpini tánguarhikuecharhu enga jima jauaka tataka ma enga itsï atakuarhikia (1 Timoteo 3:2; Santiagu 3:1).

Bibliarhu arhisïndi eskaksï tatakechajkusï jatsika para orhejtsïkuni kúnguarhikuani ma. Pori ejemplu, Pablu arhispti Tituni: “Jíkeni jini jurajkuska Kreta parakari [...] erakuapiringa máru orhejtsïkutichani mándani ireta jimbo” (Titu 1:5). Ka seguirispti arhini: “Orhejtsïkuti ma jatsisti para sési jámani paraka kʼuiripu no uaaka no sési ambe uandani imeeri ambe, jatsisti para májku uarhiitinku jatsini” (Titu 1:6). Ka sáno májkueni ambe karakuspti Timoteuni: “Enga tataka ma jánguarhintani jaka orhejtsïkutiini, ambakiti ambesï uékani jati úni. Ísï jimbo, orhejtsïkuti ma jatsisti para sési jámani, paraka kʼuiripu no uaaka no sési ambe uandani imeeri ambe, jatsisti para májku uarhiitinku kámani [...], ka ístu jatsisti para míteni néna jorhentpini” (1 Timoteo 3;1, 2).

Joperu, ¿andiksïsï tatakechajkusï újki orhejtsïkuani kúnguarhikuechani? Pablu ini ambe uandaspti: “Ji no uékasïnga eska nanaka jámaaka jorhentpini ka nijtu eska juramukuaka tatakani; sánderu sési, jatsisti para pínasku jarhani. Jimboka Adáni orheta kueraanhaspka ka tátsekua Eba” (1 Timoteo 2:12, 13). I ambe xarhatasïndi eska Tata Diosï uékasïreenga eskaksï tatakecha orhejtsïkupiringa ka jorhentpini kúnguarhikuarhu.

Jimboka tata Jesukristu jindeeska enga orhejtsïkuajka iámindu Jeobaeri testiguechani, imeechaksï chúxapasïndi imeeri ejempluni. Lukasï enga Jesúsiri chúxapatipka, uandaspti: “Jesúsi niraspti kʼérati iretecharhisï ka ireta sapirhaticharhu para aianhpini ka uandantani ambakiti ambe Tata Diosïri Juramukueri”. Ka Jesúsi arhiaspti imeeri chúxapatichani eskaksï imeechajtu jatsispka para nirani aianhpini, “ísï jimbo, imeechaksï iámu ireta sapirhaticha jimbo niraspti aianhpini ambakiti aianhperakuani” (Lukasʌ 8:1; 9:2-6).

Ka iásï, májkuenksï úsïndi tatakecha ka nanakecha engaksï Jeobaeri testigueka, engaksï kánikua tsípikua jingoni újka ambe enga Mateu 24:14 arhijka. Jimini Jesúsi uandaspti: “Ka ambakiti aianhperakua Tata Diosïri Juramukueri, iámu parhakpinirhu uandanhantaati paraksï iámindu iretecha mítetini jarhani ka jimajkani kʼamaraati i tiempu”.