Ambe enga kurhanguarhijka ima enga arhintajka

¿Andiksïsï Jeobaeri testiguecha patsïntsï xarhatajki dibujuecharhu apostuli Pabluni o sánititu jauiri jingontku?

Ísïsti, no nema uáti mítini iásï námindu jáxespi Pablu. Pablueri dibujuecha engaksï juchari publikasionicharhu jaka, jindestiksï para eranhaskani néna jáxespi, nóksï imajenichesti engaksï arkeolojiarhu pʼitakateka.

Peru jarhasti máru ambe enga xarhatajka néna jáxespi Pablu. Por ejemplu, i rebista 1 de marsueri de 1902, arhisïrendi eska libru Hechos de Pablo y Tecla, enga uéxurhini 150 jimbo ísï karakuarhipka, jindespka enga sánderu sési uandantenga na enga jáxepka Pablu ka eska na eranhaskanhapkia iónisï: “Achamasï ma enga no iójtarhaka, patsïntsï, chakuajtarha, uiuinhasï, kánikua seja jukari ka kʼéri ma úrhi”.

Diksionariu ma arhisïndi eska informasioni de Hechos de Pablo y Tecla, úpiringa ísïini (The Oxford Dictionary of the Christian Church [edición de 1997]). I libru kánikua respetarinhasïrendi primeru sigluecharhisï despuesi de Jesusi, ísïksï xarhatasïndi 80 karakatecha engaksï griegu jimbo jaka ka enga máteru idiomecha jimbo tradusirikuarhipka. Ísï jimbo, juchari dibujuechaksï terokuntasïndi ambe enga ióntki mítikuarhipka de na enga jáxepka Pablu.

Peru uétarhisïndi miáni eska jarhaska sánderu jukaparhakua ambe eska mítini néna jáxespi Pablu. Enga ima eianhpini jámani jarhenga, máruksï arhinchasïrendi uandaparini: “Enga jarhajka juchantsïni jingoni, ima no sáni xarharasïndi eska uinhapitiiska, ka imeri uandakuecha jamberi no sáni kurhandinhchakuarhisti” (2 Kor. 10:10). Ka nochi mirikurhiaka eska kristianu úkuarhespka jimboka Jesusi milagru ma jimbo xarhakuspka. Ístuchi uáka eratsintani ambe enga xáni úpka para Jesusiri ambe mítitarpini iretecharhu (Uku. 9:3-5, 15; 22:6-8). Ka na engajtsïni xáni marhuachijka Bibliarhu anapu karakatecha enga ima Jeobaeri jarhuajperata jimbo karaapka.

Pablu no méni uandaspti na enga jáxepka, ni kʼéramakuarhipi imani ambe jimbo enga úpka ante de kristianueni (Uku. 26:4, 5; Filip. 3:4-6). Uandaspti: “Ji sánderu sapichitu ambeska ka eska iámindu apostulicha engani no jukanchaka arhinhani ma apostuli” (1 Kor. 15:9). Ka tátsekua karaspti: “Jindendinisï kóndintati ini uinhapikuani, engani sánderu sapichitu ambeka ka eska iámindu imeri míndakatecha, para eskani ji eianguauaka no Israeli anapuechani ambe enga jindeka Kristueri jatsikuarhikua enga no nema újka jamberi jánhaskani na enga xáni kʼéri ambeka” (Efes. 3:8). Sési jimbo, i mensaji sánderu jukaparhakuesti ka eska na enga jáxepka Pablu.