¿Nénajtsïni aiangusïni juchari Kuerajpiri ambe engajtsïni aiachijka?

Jiáni uératini enga kʼuiripu uénaka irekani, juchari Kuerajpiri úraaspti profetechani ka ánjelichani para kʼuiripuechani aianguani ambe ma. Ístu, karakata jurajkusti ambe enga uéjka eska mítekuarhiaka ka ambe enga xáni aiatspejka. Tata Diosïjtsïni aiachisïndi eskachi tsípikua jingoni irekaaka sánderu orhepani, peru jamberichi kurhamarhikuarhijka: “¿Nénachi uá míteni ambe engajtsïni aiachijka?”.

Tata Diosïri Karakatarhu, uákachi exeni ambe enga ima uéjka eskachi míteaka (2 Timoteo 3:16). ¿Néna úspi Tata Diosï parakaksï profetecha karapiringa ambe enga ima uékenga? Tata Diosï úspti eskaksï imecha karapiringa ambe enga ima eratsetaraapka (2 Pedru 1:21). Por ejemplu: enga patroni ma arhijka imeri jarhuajpirini eska karaaka ambe ma, nóchi eratsesïnga eska jarhuajpiririska ambe enga karakata jaka, sino patroniri. Májkuenisti, nájkiruka Tata Diosï úraaka máru kʼuiripuechani paraksï karani ambe enga ima uékenga, Biblia Tata Diosïristi.

IÁMINDUECHACHI UÁKA MÍTENI TATA DIOSÏRI KARAKATANI

Tata Diosï uékasïndi eskaksï iáminduecha míteaka ka kurhanguaka ambe enga imeri Karakatarhu uandajka jimboka kánikua jukaparhakueska. Iásï, iámindu kʼuiripuecha engaksï jaka ‘nasionicharhisï, ka tribuecharhu ka imecha engaksï táchani jásï idioma uandajka’, uátiksï míteni “ambakiti aianhperakuani enga jindeka para méntkisï” (Jaŋaskuecha 14:6). Tata Diosïri jarhuajperata jingoni, imeri Karakata tradusidu jarhasti iámu o ma parti jukari tresi mili idiomecha jimbo, sánderu eska náki uéjki máteru libru.