¿Preparadujtsï jarhaskia parajtsï ʻintsïnhani Echeriniʼ?
IÁMINDUECHACHI uékaxakaia eska úkuarhiaka i ambe enga Jesúsi aiatspeka: “Tsípisïndiksï imeecha engaksï kaxumbitiika, jimbokaksï intsïnhaaka echerini” (Mat. 5:5, TNM). Kristianu erakukateechaksï intsïnhaati Echerini engaksï auandarhu juramuni jauaka Jesúsi jingoni (Jaŋ. 5:10; 20:6). Sáno iámindu kristianuechaksï uékaxatiia eskaksï intsïnhaaka Echerini paraksï jima irekani para méntkisï. Perfektueuatiksï, sésiksï pʼikuarheraati ka pínandikua jingonksï irekaati. Paraka úkuarhika ísï eskaksï na erokuarhini jaka, jatsiatiksï para úni máru ambe enga kánikua jukaparhakueka. Ini jorhenguarhikua jimbo, exeni jauakachi arini tanimu ambe: jarhuajpeni paraka Echeri paraisu máeuaka, jarhuataani imeechani engaksï tsíntaaka ka jorhendaani Tata Diosïiri ambe. Ístuchi exeni jauaka ambe engachi uaaka úni iásï, parachi xarhatani eskachi uékasïnga indeni ánchikuarhiteechani uaani jimbanhi parhakpinirhu.
¿PREPARADUJTSÏ JARHASKIA PARAJTSÏ JARHUAJPENI PARAKA ECHERI PARAISU MÁEUAKA?
Enga Tata Diosï Jeoba arhiapka primeru kʼuiripuechani “uinira je echerini ka ánchita je”, arhikuekaxapti eska ma jurhiani, iámu Echeri paraisu máepiringa (Gén. 1:28). Ka imeecha engaksï paraisurhu irekaaka para méntkisï, jatsiatiksï para ísï úni eska Tata Diosï Jeoba na uandapka. Ka enga na nitamakia Armajedoni, ueenani, Echerirhu no nani paraisu máeuati, jimboka ióni nitamaskia enga jardini de Edéni nóteru jakaia. Jatsiakachi para sési jájkuantani imani lugarichani enga kʼuiripu no sési jájkuaka. ¡Kʼéri ánchikuarhita máeuati!
Israeliteechaksï sáno májkueni ambe úspti engaksï Babilonia uératini kʼuanhatsentapka imeecheeri echerini jimbo enga 70 uéxurhini no nema irekapka. Isaíasi uandaspti eska Tata Diosïiri jarhuajperata jingoni, Israeliteechaksï úpiringa úni eska imeecheeri echeri ménderu sési jándentapiringa, ima uandaspti: “Uaati eska imeeri desiertu ísïiuaka eska Edéni ka imeeri pákua enga no ma ambe újka tsikini ísï eska Tata Diosï Jeobaeri jardini” (Is. 51:3). Ka ísï úkuarhispti. Israeliteechaksï úspti úni eska imeecheri echeri sési jásï ma lugari máepiringa. Ka májkueni úkuarhiati imeechani jingoni engaksï Echerirhu irekaaka, Tata Diosï Jeobaeri jarhuajperata jingoni uaatiksï úni eska Echeri paraisu máeuaka. Ka jarhasti máru ambe engajtsï chá desde iásï uaaka úni parajtsï xarhatani eskajtsï uékasïnga jarhuajpeni ini ánchikuarhitarhu.
Ma ambe engajtsï uaaka úni, jindeesti limpiu jatsini chaari kʼumanchikuani ka iámu ambe sési jatsini jimeesïsï. Chájtsï uaaka ísï úni nájkirukaksï chaari besinuecha no pʼindeka ísï úni. Ístujtsï uaaka jarhuajpeni limpiarini o arreglarintani ambe ma Kʼumanchikua Reinuerirhu ka jima engachi Kʼérati Tánguarhikuechani jatsiajka. Ka engajtsï uaaka ísï úni, uaakajtsï aiakukuarheni parajtsï jarhuajpeni jima enga no sési ambe úkuarhijka. Engajtsï ísï úska, xarhatani jauakajtsï eskajtsï uékasïnga jarhuataani imeechani engaksï uétarhinchani jarhajka. Kurhamarhikuarhi je: “¿Úpirini jorhenguarhini máru ambe engareni marhuacheaka jimbanhi Parhakpinirhu engareni Tata Diosï Jeoba sésikua íntskuska parani jima jarhani?”.
¿PREPARADUJTSÏ JARHASKI PARAJTSÏ JARHUATAANI IMEECHANI ENGAKSÏ TSÍNTAAKA?
Ísï tátsekua enga Jesúsi tsítantapka Jairueri nanaka sapichuni, uandaspti eskaksï tʼirerapiringa (Mar. 5:42, 43). Fásiliipti tʼirerani ini nanaka sapichuni enga 12 jatiripka. Peru sánderu kánikua ánchikuarhita jauati jiáni enga Jesúsi uaaka i ambe enga aiatspeka: “Iámindu imeecha engaksï inchatsikurhini jaka, kurha[uatiksï] imeeri uandakuani” ka tsíntaatiksï (Juanu 5:28, 29). Nájkiruka Biblia no kánikua ambe uandajka imeecheeri ambe engaksï tsíntaaka uétarhinchaatiksï tʼirekua, xukuparhakua ka kʼumanchikua ma. Ísï jimbo, ¿uaajtsï desde iásï xarhatani eskajtsï uékasïnga jarhuataani imeechani engaksï tsíntaaka? Jimajkani eratseanta je arini kurhamarhikuechani.
¿Ambejtsï uaa úni iásï parajtsï xarhatani eskajtsï preparadu jarhaskia parajtsï intsïnhani Echerini?
Enga chaari kúnguarhikuarhu aianhpinhaaka eskaksïni pʼorhembiaka sirkuitueri orhejtsïkuti, ¿aiakukuarhesïntsï parajtsï tʼirerani? Jamberi erachi ma enga Beteli marhuauenga arhinhati eska máteru naniisï niuaka marhuani o eska sirkuitueri orhejtsïkuti ma nóteru uaakia ísï marhuani. ¿Úpirintsï jarhuataani paraksï kʼumanchikua ma exentani nani engaksï uaaka irekani? O enga kʼéri tánguarhikua rejioniiri ma úkuarhiaka o kʼéri tánguarhikua espesiali ma jima enga chá irekaka, ¿úpirintsï aiakukuarheni parajtsï jarhuajpeni antesi o enga na kʼamakurhiakia kʼéri tánguarhikua o parajtsï sési eroani imeechani engaksï máteru paisirhu uératini jurhajka?
¿PREPARADUJTSÏ JARHASKIA PARAJTSÏ JORHENDAANI IMEECHANI ENGAKSÏ TSÍNTAAKA?
Míteskachi eskaksï uánikua kʼuiripuecha tsíntaaka imani ambe jimbo enga Hechos 24:15, TNM uandajka. Uánikua ima kʼuiripuecheeri nóksï ústi míteni Tata Diosï Jeobani ante deksï uarhini, peru jimbanhi parhakpinirhuksï kʼóru uaati jorhenguarhini imeeri ambe.a Ka Tata Diosï Jeobaeri marhuariicha engaksï no méni jurajkuka ka engaksï ióni marhuakukia imani, jarhuajpeatiksï paraksï ini kʼuiripuechani jorhendaani (Is. 11:9). Pirenchi Charlotte enga Europa, Sudamérica ka África ísï jámapka aianhpini, uékaxatiia eska niáraaka ima jurhiatikua. Ka kánikua tsípiparini uandasïndi: “Uékaxakaia jorhendaani imeechani engaksï tsíntaaka. Engani arhintajka nemeeri enga ióntki irekaka, méminduni eratsentasïnga: ʻEnga inde kʼuiripu mítepiringa Tata Diosï Jeobani, kánikua ménderueni irekapirindiʼ. Uékaxakaia jorhendaani Tata Diosï Jeobaeri ambe imeechani engaksï tsíntaaka ka arhiani na engaksï xáni sési irekaaka engaksï marhuakuaka imani”.
Ambakiti Tata Diosï Jeobaeri marhuariicha engaksï irekaka ante de Jesúsi Echerirhu jurhani, ístuksï jatsiati para kánikua ambe jorhenguarhini. Kánikuachi sési pʼikuarheraaka ka kʼéri kóntperata máeuati aianguni Danielini néna engaksï kumplirikuarhika profesiecha enga ima karaapka ka enga no kurhanguapka (Dan. 12:8). Ístu, kánikua ambakiti ambeuati jarhuatani Rutini ka Noemíni jorhenguarhini eska imeecheri desendienti ma jindeespka Mesíasi. Kánikua ambakiti ambeuati jorhendaani kʼuiripuechani iámu parhakpinirhu ka nóteruchi jatsiauakia uandanhiateechani ka ni ójkutakuechani engaksï ini parhakpinirhu jaka.
¿Ambejtsï uaa úni parajtsï xarhatani eskajtsï uékasïnga jorhendaani imeechani engaksï tsíntaaka? Ma ambe engajtsï uaaka úni jindeesti, jánguarhintani sánderu sési jorhentpini ka ístu uérani aianhpini (Mat. 24:14). Ka nájkirukajtsï iásï no uaaka kánikua ambe úni jimbokajtsï jatiriiskia o máteru ambe jimbo, engajtsï jánguarhintaska xáni eskajtsï xáni uaaka, xarhatani jauakajtsï eskajtsï uékasïnga jorhendaani imeechani engaksï tsíntaaka.
¿Joperujtsï meru uékasïni Echerirhu irekani para méntkisï? ¿Uékaxakijtsï jarhuajpeni paraka Echeri paraisu máeuaka? ¿Uékaxakijtsï jarhuataani imeechani engaksï tsíntaaka ka jorhendaani Tata Diosïiri ambe? Xarhatantsï jauaka eskajtsï preparadu jarhaskia parajtsï Echerirhu irekani, engajtsï jánguarhintaska iásï ima jásï ambe úni engajtsï jimbanhi parhakpinirhu uaaka.
a Exe je jorhenguarhikuani “Uánikuechaksï pánhasïndi jurhimbikuarhu”, enga uéraka rebistarhu Aianhpiri septiembri de 2022.