“Jingontku ja je” para Tata Diosï Jeobaeri jurhiatikua

1. ¿Ambechi jatsiski para úni parachi tsípiti pakarani Tata Diosï Jeobaeri jurhiatikua jimbo?

ENGA Biblia úraajka uandakuechani “Tata Diosï Jeobaeri jurhiatikua” imani tiempuni arhikuekasïndi enga ima kʼamajkuajka imeeri enemiguechani ka pʼímutantani imeeri iretani. Ka ísï úkuarhistia ióntki, jiáni enga Tata Diosï Jeoba kastigariuapka imeeri enemiguechani (Is. 13:1, 6; Ezeq. 13:5; Sof. 1:8). “Tata Diosï Jeobaeri jurhiatikua” nóteru ióni kuerataxatiia para niárani ka ueenakuarhiati enga Kʼéri Babilonia kʼamajkunhaaka ka Armajedoniiri uarhiperakua jingoni kʼamakurhiati. Ka parachi úni tsípiti pakarani indeni “jurhiatikua” jimbo, jatsiskachi para desde iásï ueenani preparadu jarhani. Asta Jesúsi jorhentpispti eskachi jatsiska para “jingontku jarhani” para jiáni enga “kʼéri mískuarhita úkuarhiaka”, ísï jimbo inde ambe arhikuekasïndi eskachi méntku jánguarhintani jauaka prepararikuarhini (Luk. 12:40; Mat. 24:21).

2. ¿Andisï sési jaki eskachi jorhenguarhiaka ambe enga arhijka Primeru Karakata para Tesalonika anapuecha?

² Primeru Karakatarhu para Tesalonika anapuecha, apostoli Pablu uandaaspti máru ejempluechani para jarhuataani kristianuechani paraksï preparadu jarhani para Tata Diosï Jeobaeri jurhiatikua. Pablu mítespti eska kánikua kuerataxapka paraka niárapiringa inde jurhiatikua (2 Tes. 2:1-3). Joperu, uandaspi eska kánikua jukaparhakueska preparadu jarhani ísï komu sienga axuterku japiringia. Ka juchajtuchi uaaka májkueni úni. Ju je exeni ambe enga uandapka iiri ambe: 1) néna enga juuaka Tata Diosï Jeobaeri jurhiatikua, 2) neechaksï no tsípiti pakaraa ka 3) ambechi uaa úni parachi prepararikuarhini.

¿NÉNA JUUA TATA DIOSÏ JEOBAERI JURHIATIKUA?

3. ¿Andisï Tata Diosï Jeobaeri jurhiatikua ísï juua komueska ima enga chúrikuechani jámajka sïpani? (Ístu exea je imajeniichani).

³ “Komueska ma kuarhukpiti enga chúrikua jimbo inchatspijka” (1 Tes. 5:2). I jindeesti primeru ejemplu ima tanimu ejempluecheeri enga Pablu úraajka para uandani néna enga juuaka Tata Diosï Jeobaeri jurhiatikua. Imeecha engaksï sïpani jámajka sóntkuksï sïpasïndi ka chúrikuechanksï jámasïndi, jiáni enga no nema erokaani jarhajka. Sáno májkueni, Tata Diosï Jeobaeri jurhiatikua no ióndaati janoni ka sáno iámindu kʼuiripuechaksï no erokuarhini jauati. Asta jurhimbiti kristianuechachi jamberi ísku pakaraaka exeni na enga xáni sóntku úkuarhiaka iámindu ambe. Peru juchachi no kʼamajkunhaaka; no sési úriichaksïsï kʼamajkunhaati.

4. ¿Andisï Tata Diosï Jeobaeri jurhiatikua ísï juua komueska enga uarhiiti ma sapini kánguarhini jarhajka?

⁴ “Ísïiuati komueska na úkuarhijka ma uarhiiti jingoni enga sapini kánguarhini jarhajka” (1 Tes. 5:3). Uarhiiti ma enga sapini ma erokuarhini jarhajka no mítesti káni enga andajpenuaka sapi. Joperu segura jarhasti eska inde jurhiatikua niáraaka, ka sáno méntkisï ma repentku niárakusïndi, ka uarhiiti kánikua no sési pʼikuarherasïndi ka no nema úsïndi úni eska no niáraaka inde jurhiatikua. Sáno májkueni, nájkirukachi no míteka jurhiatikua ni ora enga ueenakuarhiaka Tata Diosï Jeobaeri jurhiatikua, seguruchi jarhaska eska juuaka. Míteskachi eska ima ma repentku kʼamajkuauaka imeeri enemiguechani ka eskaksï imeecha no uaaka sïpakuarhini.

5. ¿Andisï kʼéri miskuarhita ísïi komueska eramarandikua?

⁵ Komueska eramarandikua. Terseru ejemplurhu enga Pablu uandapka, ménderu ueenaspti uandani imeecheeri engaksï chúrikuechani sïpani jámajka, joperu iásï terukutantaspti eramarandikuani Tata Diosï Jeobaeri jurhiatikua jingoni (1 Tes. 5:4). Jamberi imeecha engaksï sïpani jámajka nóksï jamberi kuenta íntskukuarhejti eska erandexakaia, jimbokaksï masï arhini jarhasïnga sïpani ka jimboka erajkarani jarhasïngia úpirindiksï pʼiáranhani. Kʼéri mískuarhitarhu sáno májkueni jásï ambe úkuarhiati. Ima kʼuiripuecha engaksï chúrikuechani újka ambe, ísï eska imeecha engaksï sïpani jámajka, ka engaksï méntku úni jarhajka imani ambe enga Tata Diosï no tsitijka pʼiáranhaatiksï. Peru juchachi no ísïiska eska imeecha, sánderu sési, xarhatasïngachi eskachi preparadu jarhaskia para Tata Diosï Jeobaeri jurhiatikua. ¿Néna? Engachi no újka ambe enga Tata Diosï Jeoba no sési exejka ka engachi jánguarhintajka para seguiriini “ambakiti ambe úni ka jurhimbitku jámani ka jurhimbitku uandani” (Efes. 5:8-12). Tátsekua, Pablu ístu úraaspti máteru tsimani ejempluechani engaksï uandajka imeecheri engaksï no tsípiti pakaraaka Tata Diosï Jeobaeri jurhiatikua jimbo.

¿NEECHAKSÏ NO TSÍPITI PAKARAA TATA DIOSÏ JEOBAERI JURHIATIKUA JIMBO?

6. ¿Andiksïsï sáno iámindu kʼuiripuecha pori ísï arhini kʼuíni jaki? (1 Tesalonika 5:6, 7).

⁶ “Imeecha engaksï kʼuíjka” (arhinta je 1 Tesalonika 5:6, 7). Pablu uandaspti eskaksï no tsípiti pakaraaka Tata Diosï Jeobaeri jurhiatikuarhu imeecha engaksï ísïika komueska ima kʼuiripuecha engaksï kʼuíni jarhajka. Enga kʼuiripu ma kʼuíni jarhajka, no kuenta íntskukuarhesïndi ambe enga xáni úkuarhini jarhajka jimeesïsï ni na enga xáni tiempu nitamajka. Ístu no mítesti andisï úkuarhijki ambe ma ka ístu no jánhaskasïndi ambe úni. Iásïjtu, pori ísï arhini, sáno iámindu kʼuiripuechaksï kʼuíxati (Rom. 11:8). Nóksï kasu uaasïndi pruebechani engaksï xarhatajka eskachi “últimu jurhiatikuechani jimbo” irekaxaka ka eska kʼéri miskuarhita axuterku jarhaskia. Enga parhakpinirhu kʼéri ambe úkuarhijka, pori ísï arhini, éskantasïndiksï ka uékasïndiksï jorhenguarhini Tata Diosïiri Reinueri ambe. Joperu uánikuechaksï jurajkusïndi ka i ambe ísïisïndi enajkiksï ménderu ueenapirini kʼuíni. Ka máru kʼuiripuechaksï niárasïndi jakajkuni eska Tata Diosï jusgarpiaka, peruksï ísï exesïndi enajki útasï kánikua kueratani jaki paraka inde jurhiatikua niáraaka (2 Ped. 3:3, 4). Joperu, juchachi míteska eska kánikua jukaparhakueska konseju enga uandajka eskachi jatsiska para pauani pauani tsínharhitini jarhani.

7. ¿Andiksïsï ima kʼuiripuecha enga Tata Diosï kʼamajkuauaka ísïi komueska kauicheecha?

⁷ “Imeecha engaksï kauijka”. Apostoli Pablu terukutantaaspti imani kʼuiripuechani enga Tata Diosï kʼamajkuauaka kauicheecha jingoni. Kauicha ma nóteru úsïndia sési eratseni ka imani ambe úsïndi enga no sési jaka. Sáno májkueni, no sési úriichaksï no kasu úsïndi ambe enga Tata Diosï uandajka eskaksï úkuarhinchaaka ka imani ambeksï úsïndi enga uaaka eskaksï kʼamajkunhaaka. Peru apostoli Pablu arhiasïndi kristianuechani eskaksï méntkisï sési eratsentaaka, eskaksï miákua jingoni jámaaka ka no kauirini (1 Tes. 5:6). Kʼuiripu ma enga Biblieri ambe mítekuka uandasïndi eska miákua jingoni jámani arhikuekasïnga “no jukari uandanhiani jarhani níjtu xáni chéni ka sési eratsentani para imani ambe úni enga sési jaka”. Peru ¿andichisï jatsi para iámindu ambe sési eratsentani? Jimboka engachi no ísï úska sánderu fásiliuati eskachi ueenaaka inchamukuni politikarhisï ka uandanhiani parhakpini anapu problemeecha jimbo. Ístu, enga na niárani jauaka Tata Diosï Jeobaeri jurhiatikua, sánderuchi arhinhaaka parachi jiminiisï inchamukuni. Peru nóchi jatsiska para uandanhiani ambe engachi uandaaka, jimboka Tata Diosïiri espiritu uaaka eskachi iámindu ambe sési eratsentaaka ka eskachi no chéaka ka ístujtsïni jarhuataati parachi ambakiti ambe erakuni úni (Luk. 12:11, 12).

¿NÉNACHI UAA PREPARARIKUARHINI PARA TATA DIOSÏ JEOBAERI JURHIATIKUA?

8. Ísï eska na arhijka 1 Tesalonika 5:8, ¿ambechi uétarhinchasïni parachi tsínharhitini jarhani ka sési eratsentani iámu ambe? (Ístu exe je imajenini).

⁸ Ju je jukantani kamisa o inchanhikua tiámueri ka kájtsïkua tiámueri. Apostoli Pablujtsïni terukutantaspti sondaduechani jingoni engaksï jingontku jarhajka para uarhipeni ka engaksï jukarini jaka imeecheri xukuparhakua para uarhipeni (arhinta je 1 Tesalonika 5:8). Enga guerra ma úkuarhini jarhajka sondadu ma jatsisti para méntkisï listu jarhani para uarhipeni. Májkueni ambe úkuarhisïndi juchantsïni jingoni. Xarhatasïngachi eskachi listu jarhaska para Tata Diosï Jeobaeri jurhiatikua, engachi mintsikaska Tata Diosïni ka xénchpeni enga ísïika komu inchanhikua tiámueri jukantani, ka engachi seguiriiska mintsikani ambe enga úkuarhiaka sánderu orhepatini enga ísïika komu kájtsïkua tiámueri jukantani. I kualidadichajtsïni kánikua jarhuataati.

9. ¿Nénajtsïni kuájchakusïni mintsikani Tata Diosïni?

⁹ Ísï eska inchanhikua tiámueri na kuájchakuenga sondadueri mintsitani, mintsikani Tata Diosïni ka xénchpetiini kuájchakusïndi juchaari mintsitani. I kualidadichajtsïni jarhuatasïni parachi seguiriini marhuakuni Tata Diosï Jeobani ka májkueni jámani eska Jesúsi. Engachi mintsikaska Tata Diosïni, seguruchi jarhaska eska Tata Diosï Jeoba maiamuantasïnga imeechani engaksï no méni jurajkujka (Ebr. 11:6). Ístu, mintsikani Tata Diosïni úsïndi eskachi no méni jurajkuaka Jesúsini, enga juchaari Orhejtsïkutiika, nájkirukachi no sési nitamakuarhini jauaka. Parachi sánderu mintsikani Tata Diosïni ka únchi orhepani uérakuani uandanhiateechani, ju je exeni néna engaksï erachiicha úkia no jurajkuni Tata Diosïni nájkirukaksï no sési kánhani jaka oksï problemeechani jatsiani sentabu ambe jimbo. Ka parachi no jukari uékani jatsikuarheni, uaakachi májkueni úni eska imeecha engaksï arisku sáni irekajka ka engaksï orhetku peerajka Tata Diosïiri Reinueri ambe.b

10. ¿Nénajtsïni jarhuatasïni xénchani Tata Diosïni ka kʼuiripuechani?

¹⁰ Parachi tsínharhitini jarhani ka sési eratsentani iámu ambe, ístuchi jatsiska para xénchpeni (Mat. 22:37-39). Pori ejemplu, xénchani Tata Diosïni jarhuatasïndijtsïni parachi seguiriini aianhpini nájkirukachi problemechani jatsiauaka indeni ambe jimbo (2 Tim. 1:7, 8). Ístu, jimbokachi xénchaasïnga kʼuiripuechani engaksï no májkueni ambe jakajkujka eska jucha, jánguarhintasïngachi xáni eskachi xáni újka parachi aianguani ambe engachi jakajkujka, ka ísïchi úsïnga telefunu jimbo o karta jimbo. Nóchi eratsesïnga eskaksï no méni uaaka mójtakurhini. Sánderu sési, erokuarhisïngachi eskaksï mójtakurhiaka ma jurhiani ka eskaksï imani ambe uaaka enga sési jaka (Ezeq. 18:27, 28).

11. ¿Nénajtsïni jarhuatasïni xénchaani juchaari erachiichani? (1 Tesalonika 5:11).

¹¹ Ístuchi xénchaasïnga juchaari erachiichani ka xarhatasïngachi indeni ambe engachi sési ambe arhijperajka ka engachi uinhaperpentajka (arhinta je 1 Tesalonika 5:11). Sondaduecha engaksï kompanieruejka jarhuajperasïndiksï. Joperu, engaksï uarhipeni jarhajkia, úpirindiksï atani imeecheri kompanieruni ma, joperuksï no uékantku ísï úpirindi. Májkueni, juchachi no méni uékantku no sési úkuapiringa juchaari erachiichani, ka engajtsïni no sési ambe úchipiringa nóchi májkueni úkuantapiringa (1 Tes. 5:13, 15). Máteru ambe engachi uaaka úni parachi xarhatani eskachi xénchaasïnga erachiichani, jindeesti janhanharhiani imeechani engaksï orhejtsïkujka kúnguarhikuani (1 Tes. 5:12). Ju je eratsentani ambe enga úkuarhipka Tesalonika anapu kúnguarhikuarhu. Enga Pablu karakuapka ini kartani, i kúnguarhikua nótki andangutaxapti ni ma uéxurhini enga ueenapka jarhani. Jamberi jima anapu orhejtsïkutiichaksï no kánikua eksperiensia jatsipti ka nóksï ueendi sési úni iámindu ambe, peruksï jatsipirindi para janhanharhiani. Jamberichi juchajtu jatsiaka para sánderu mintsikaani kúnguarhikuarhu anapu orhejtsïkutiichani enga na sánderu axuterku jauakia kʼéri miskuarhita, jimbokachi jamberi nóteru uaakia míteni ambeksï uandaa ima erachiicha engaksï Beteli jaka nani enga Jeobaeri testiguecheeri ánchikuarhita exenhajka ka ístu ima erachiicha engaksï Beteli jaka. Ísï jimbo, kánikua jukaparhakuesti eskachi iásï jorhenguarhiaka xénchaani ka janhanharhiani juchaari kúnguarhikuarhu anapu orhejtsïkutiichani. Ambe uéjki úkuarhini, ju je sési eratsentani iámindu ambe ka no imani ambejku exeni engaksï orhejtsïkutiicha no újka sési úni. Sánderu sési, ju je miáni eska Tata Diosï Jeoba, tata Jesukristuni peeraska para orhekupaani ini xáni ambakiti achamasïichani.

12. Ambe engachi erokuarhini jaka, ¿néna kuájchakusïni juchaari eratsekuani?

¹² Ísï eska kájtsïkua tiámueri na kuájchakuenga sondadueri éjpuni, ambe engachi míteka eska úkuarhiaka sánderu orhepatini kuájchakusïndijtsïni parachi no no sési ambe eratseni. Peru jimbokachi seguru jarhaska ima ambeeri enga úkuarhiaka sánderu orhepatini, míteskachi eska ambe enga i parhakpini aiatspejka ísku ambe máeska (Filip. 3:8). Ambakiti ambe enga úkuarhiaka sánderu orhepatini ístu úsïndi eskachi sési pʼikuarheraaka ka eskachi no jukari uandanhiauaka. I ambeksï úkuarhinchaspti Wallace ka Laurinda engaksï África marhuani jaka. Tanimu semana jimbojku, Wallace uarhiranchaspti taati jémbani, ka Laurinda uarhiranchaspti amambani. Ka COVID-19 jimbo, nóksï úspti kʼuanhatsentani imeecheeri paisi jimbo paraksï imeecheeri familia jingoni jarhani. Wallace karaspti: “Míteni eska jauaka tsíntskua kánikuarini jarhuatasïndi. Jánguarhintasïnga no eratsentani na engaksï japka últimu jurhiatikuecha jimbo engaksï útasï ini parhakpinirhu japka, sino na engaksï jauakia primeru jurhiatikuecha jimbo jimbanhi parhakpinirhu. Eratsentani ini ambe, kánikuarini uinhaperantasïndi engani komu pʼikuarherani jarhajka jimbokaksï nóteru jarhaskia”.

13. ¿Ambechi uaa úni parakajtsïni Tata Diosï Jeoba íntskuaka imeeri espiritu santu?

¹³ “Asï jiáreta je eska espiritueri chpiri párhuaka” (1 Tes. 5:19, Táta Diósïri Uandakua Tata Jesukristueri Aiatsperakua). Apostoli Pablu uandaspti eska espiritu santu ísïiska eska chpiri ma engachi incharini jatsika. Ka indeni espiritu santu jimbo, tsitisïngachi ka uékasïngachi úni imani ambe enga sési jaka ka ístujtsïni íntskusïndi uinhapikua parachi uinhamu ánchikuarhikuni Tata Diosï Jeobani (Rom. 12:11). ¿Ambechi uaa úni parakajtsïni Tata Diosï Jeoba íntskuaka imeeri espiritu santu? Uétarhisïndi eskachi kurhakuaka, jorhenguarhini imeeri Karakatani ka eskachi imeeri kúnguarhikuarhu jauaka. Engachi ísï úska, uaakachi úni imani ambe enga “espiritu santu úrpijka” (Gal. 5:22, 23).

14. ¿Ambechi no jatsiski para úni parakajtsïni Tata Diosï seguiriuaka íntskuni imeeri espiritu santu? (Ístu exea je imajeniichani).

¹⁴ Tata Diosï Jeobajtsïni íntskusïndi imeeri espiritu peruchi jatsiska para jingontku jámani. Nóchi uékapiringa úni ambe ma enga uaaka “espiritu santueri chpiri pátani”. Parakajtsïni Tata Diosï Jeoba íntskuaka imeeri espiritu santu, jatsiskachi para sési jámani ka imani ambe eratseni enga sési jaka. Peru engachi jucha ueenaska ikichakueni jásï ambe eratseni ka indeni ambe niátani, imajtsïni nóteru íntskuatia imeeri espiritu santu (1 Tes. 4:7, 8). ¿Peru ístu ambechi jatsiski para miáni jarhani? Pablu uandaspti: “Asï jáma je ísku kurhandini ambe engaksï Tata Diosïiri uandakua páriicha uandantaka” (1 Tes. 5:20, TNM). Ini bersikulu jimbo, uandakua “ambe engaksï Tata Diosïiri uandakua páriicha uandantaka” imani ambe arhikuekasïndi ambe enga Tata Diosï uandajka imeeri espirituni úraparini. Pori ejemplu, Tata Diosï Jeobaeri jurhiatikueri ambe enga axuterku jakaia. Juchachi no eratsesïnga eska útasï kánikua kuerataxaka paraka niáraaka Tata Diosï Jeobaeri jurhiatikua o eskachi no exeaka enga Armajedoni úkuarhiaka. Sánderu sési, eratsesïngachi eska Tata Diosï Jeobaeri jurhiatikua axuterku jarhaskia ka méntkisïchi miáni jarhasïnga indeni ambe. Ísï jimbo, pauani pauanchi jánguarhintasïnga sési jámani ka imani ambe úni enga “xarhatajka eskachi janhanharhisïnga Tata Diosïni” (2 Ped. 3:11, 12).

“EXE JE ESKA IÁMINDU AMBE ÍSÏISKA”

15. ¿Ambechi jatsiski para úni parakajtsïni no nema enganiariuaka? (1 Tesalonicenses 5:21, TNM).

¹⁵ No ióni jimbo Tata Diosïiri enemiguechaksï uandaati: “Pínandisti ka sésichi nitamaxaka” (1 Tes. 5:3). Iápurisï ueenaati kurhaakuarhini uandakuecha engaksï demoniuecha uandaajka ka engaksï sáno iámindu kʼuiripuechani enganiariuauaka (Jaŋ. 16:13, 14). ¿Ka juchaia? ¿Uaachi enganiarinhani? Nóchi enganiarinhaaka engachi ísï úska eska i konseju na arhijka: “Exe je eska iámindu ambe ísïiska” (arhinta je 1 Tesalonicenses 5:21, TNM). Griegu jimbo uandakua enga ixú tradusirikuarhijka “exeni” úrakuarhesïreendi enga kʼuiripu ma exeni jarheenga sini ambe ma meru oruespi o plata. Ka juchajtuchi jatsiska para sáno májkueni ambe úni, jatsiskachi para exeni eska ima ambe engachi kurhaajka o arhintani meru ísïiska. Ka kánikua jukaparhakuespti eskaksï Tesalonika anapuecha úpiringa ini ambe, joperu sánderu jukaparhakueuati eskachi jucha ísï uaaka enga na niárani jauakia kʼéri miskuarhita. Enbesi dechi jakajkuni iámindu ambe engachi arhinhajka, ju je sési eratsentani parachi terukutantani ambe engachi arhintajka o kurhaani imani ambe jingoni enga Biblia ka Tata Diosï Jeobaeri kúnguarhikua uandajka. Engachi ísï úska, méntkujtsïni no uaati enganiariini demoniuecha imani ambe jingoni engaksï uandaaka (Prov. 14:15; 1 Tim. 4:1).

16. ¿Ambe ambakiti ambechi erokuarhixaki, ka ambechi jatsiski para úni iásï?

¹⁶ Míteskachi eska Tata Diosï Jeobaeri kúnguarhikua tsípiti pakaraaka kʼéri mískuarhitarhu, peruchi no míteska ambechi úkuarhinchaa pauani jucha (Sant. 4:14). Iasea engachi tsípiti pakaraaka kʼéri mískuarhitarhu o engachi antesi uarhiaka, Tata Diosï Jeobajtsïni íntskuati tsípikua para méntkisï engachi no méni jurajkuska. Imeecha engaksï erakukateeka auandarhuksï jauati Kristuni jingoni, ka máteru karichiichaksï irekaati Echerirhu paraisurhu ma. Enga jamberi niáraaka inde jurhiatikua, ju je méntku miáni jarhani ambe engachi erokuarhini jaka ka ju je méntkisï preparadu jarhani para Tata Diosï Jeobaeri jurhiatikua.