38 Аннары ул сәрви* агачыннан корбан яндыру мәзбәхен ясады. Ул дүрткел* — озынлыгы 5 терсәк,* киңлеге 5 терсәк, ә биеклеге 3 терсәк булды.+ 2 Аның дүрт почмагына ул мөгезләр ясады. Мөгезләр мәзбәх белән бербөтен булды. Аннан соң ул аны бакыр белән каплады.+ 3 Шуннан соң ул мәзбәхнең бар кирәк-ярагын — көл савытларын, соскыларны, табакларны, чәнечкеләрне һәм ут савытларын ясады. Аның өчен кирәкле шушы бар әйберләр бакырдан эшләнде. 4 Ул шулай ук мәзбәх өчен рәшәткә — бакыр челтәр ясады һәм аны читеннән аскарак, аның уртасына урнаштырды. 5 Аннары ул дүрт боҗра коеп, аларны, колгаларны кидерү өчен, бакыр рәшәткә янындагы дүрт почмакка беркетте. 6 Шуннан соң ул сәрви агачыннан колгалар ясап, аларны бакыр белән каплады. 7 Аннан соң ул, күчереп йөртү өчен, мәзбәхнең ике ягындагы боҗраларга колгаларны кидерде. Ул мәзбәхне куыш эчле итеп, такталардан ясады.