Хакимнәр

21 Исраи́л кешеләре Миспәдә:+ «Беребез дә Биньями́н кешесенә үз кызын хатынлыкка бирмәячәк»,— дип ант итте.+ 2 Аннары халык Бәйтелгә килеп,+ Аллаһы алдында кичкә кадәр ачы күз яшьләре белән кычкырып елап утырды. 3 Алар: «И Исраил Аллаһысы Йәһвә, ник Исраилдә андый хәл булды? Ник Исраилдә бер кабилә юкка чыкты?» — дип еладылар. 4 Ә икенче көнне халык иртән торды да, яндыру корбаннары һәм татулык корбаннары+ китерер өчен, шунда мәзбәх корды.

5 Шунда Исраил халкы: «Исраилнең бөтен кабиләләре Йәһвә алдына җыелганда, кем килмәде?» — диеште, чөнки алар, Йәһвә янына Миспәгә килмәгән һәркем һичшиксез үтереләчәк, дип бөек ант биргән иде. 6 Исраил халкы үз кардәше Биньямин белән булган хәл аркасында кайгырды. Алар әйтте: «Бүген Исраилдән бер кабилә чабып алынды. 7 Исән калганнарга хатыннар табар өчен безгә нәрсә эшләргә соң? Без бит Йәһвә белән ант итеп,+ аларга бер кызыбызны да хатынлыкка бирмибез дидек».+

8 Алар: «Исраил кабиләләреннән кем Йәһвә янына Миспәгә килмәде?» — диеште.+ Җыелыш үткән тукталу урынына Ябе́ш-гиладтан беркем килмәгән булып чыкты. 9 Халыкны санап чыккач, Ябеш-гиладта яшәүчеләрнең берсе дә анда булмаганы ачыкланды. 10 Шуңа күрә җәмгыять анда 12 000 иң көчле кешене җибәрде. Аларга болай диделәр: «Барыгыз, Ябеш-гиладта яшәүчеләрне, хәтта хатын-кызлар белән балаларны да кылычтан кичерегез.+ 11 Менә нәрсә эшләгез: һәр ир-атны һәм шулай ук ир-ат белән якынлык кылган һәр хатын-кызны үтерегез». 12 Ябеш-гила́д халкы арасында алар беркайчан да ир-ат белән якынлык кылмаган 400 гыйффәтле кызны тапты. Аларны Кәнга́н җирендәге Шило́+ янындагы тукталу урынына китерделәр.

13 Аннары бөтен җәмгыять Римму́н кыяташындагы+ биньяминлыларга хәбәр җибәреп, тынычлык төзергә тәкъдим итте. 14 Шунда биньяминлылар үз җирләренә кайтты. Аларга Ябеш-гилад хатыннарыннан исән калдырылган кызларны бирделәр,+ ләкин кайберәүләргә кызлар җитмәде. 15 Халык Биньямин белән булган хәл аркасында кайгырды,+ чөнки Йәһвә Исраил кабиләләре арасында бүленеш китереп чыгарды. 16 Җәмгыять өлкәннәре: «Калган ир-атларга ничек хатыннар табыйк? Биньяминның бөтен хатыннары юк ителде бит»,— диде. 17 Алар әйтте: «Биньямин кабиләсе Исраилдән юкка чыкмасын өчен, исән калганнарның мирасы булырга тиеш. 18 Ләкин без аларга үз кызларыбызны хатынлыкка бирә алмыйбыз, Исраил халкы: „Биньяминга хатын биргән һәркем ләгънәт ителсен“,— дип ант итте бит».+

19 Аннары алар әйтте: «Менә Бәйтелнең төньягында, Бәйтелдән Шехемгә алып барган олы юлның көнчыгышында һәм Лебонның көньягында урнашкан Шилода ел саен Йәһвә хөрмәтенә бәйрәм үтә».+ 20 Шуңа күрә алар Биньямин кешеләренә боерды: «Барыгыз, йөзем бакчаларында яшеренегез. 21 Шило кызларының биергә чыкканын күргәч, һәрберегез йөзем бакчаларыннан чыгып, Шило кызларыннан үзенә хатын тотып алсын һәм Биньямин җиренә кайтып китсен. 22 Аларның аталары я абый-энеләре, килеп, безгә ризасызлык белдерсә, без аларга: „Аңлагыз инде безне, без бит аларның һәрберсенә сугышта хатын таба алмадык,+ һәм сез дә аларга хатын бирә алмас идегез, юкса гаепле булыр идегез“+,— диярбез».

23 Биньямин кешеләре шулай эшләде дә. Һәрберсе биегән кызлар арасыннан үзенә хатын алып китте. Аннан соң алар үз мирасларына кайтып, үз шәһәрләрен яңадан торгызды+ һәм анда урнашты.

24 Шунда исраиллеләр аннан үз кабиләләренә һәм гаиләләренә таралышты. Аларның һәрберсе үз мирасына кайтып китте.

25 Ул көннәрдә Исраилдә патша юк иде.+ Һәркем үз күзлегеннән дөрес булганны эшләде.