Чын иманның дошманы фаш ителә

ӘЛЕ җирне барлыкка китергәнче, Йәһвә Аллаһы күктә фәрештәләрне яраткан. Бар затлар Аллаһыга гына гыйбадәт кылырга тиеш булса да, вакыт узу белән бер фәрештә аларның үзенә табынуларын тели башлаган. Шул теләге буенча эш итеп, ул Аллаһыга каршы чыккан һәм шулай итеп Шайтан, ягъни «Дошман», булып киткән. Шайтан Аллаһыга ничек каршы чыккан?

Ул Хауваны Аллаһыны тыңламаска котырткан. Шайтан хәйлә корган. Аның Хаувага әйткән сүзләрендә мондый фикер чагылган: Йәһвә Аллаһы билгеле бер агачтан ашамаска боерып, Хаувадан ниндидер яхшы нәрсәне яшергән. Оятсызланып, ул Аллаһыны ялганчы дип атаган һәм мондый сүзләр әйткән: «Алла белә: ул агачның җимешен ашаган көнне сезнең күзләрегез ачылачак, яхшылык белән яманлыкның ни икәнен белеп, Алланың Үзе кебек булачаксыз» (Яратылыш 3:5). Шулай итеп аның бу сүзләрендә Хаува Аллаһы җитәкчелеген кире кагарга тиеш дигән фикер яңгыраган. Хаува, Шайтанның ялганына ышанып, акылсыз эш иткән. Ул Аллаһы канунын бозган һәм Адәмне дә шуны ук эшләргә этәргән. Шулай итеп Шайтан чын иман тотучыларның дошманы булып киткән. Бүгенге көндә дә ул кешеләрне адаштыруын дәвам итә. Ничек итеп?

Ялган иман тарала

Ягъкуб, ягъни Исраил, балаларын хак юлдан яздырыр өчен, Шайтан үзенең коралы итеп потка табынуны һәм кеше уйлап чыгарган гореф-гадәтләрне кулланган. Исраиллеләрнең дини җитәкчеләре «кеше уйлап чыгарган кагыйдәләргә» өйрәткәнгә, Гайсә, Мәсих, аларга аларның табынулары буш дип әйткән (Маттай 15:9). Бу халык Мәсихне кире каккач, Аллаһы да аларны кире каккан. Гайсә аларга болай дигән: «Аллаһы Патшалыгы сездән алынып, аның җимешен китерүче халыкка биреләчәк» (Маттай 21:43). Соңрак Гайсәнең шәкертләре Аллаһының хупланган халкы булып киткән.

Шуннан соң Шайтан инде Гайсә шәкертләрен юлдан яздырыр өчен, көч куйган. Ул уңышка ирешкәнме? Гайсә пәйгамбәрлек итеп бер ачык мисал китергән. Бу мисалда бер кеше басуга яхшы иген чәчкән. Соңрак дошман килеп, иген арасына тиле бодай чәчеп киткән. Алар уңыш уру вакытына кадәр бергәләп үскәннәр. Аннары тиле бодайны игеннән аерып, юк иткәннәр. Ә игенне келәткә җыйганнар.

Шуннан соң Гайсә үз шәкертләренә бу мисалны аңлатып биргән. Орлык чәчүче — ул үзе. «Яхшы орлыклар — Патшалык кешеләре, тиле бодай — шайтан кешеләре, һәм аны чәчүче дошман — иблис. Урак өсте — дөнья бетү ул, ә уручылар — фәрештәләр» (Маттай 13:38, 39). Ул үз шәкертләрен иген белән чагыштырган. Ләкин Шайтан Гайсәнең тугры шәкертләре арасына, тиле бодайны чәчкәндәй, үзенең ялган шәкертләрен «чәчкән». Шулай итеп Гайсә алдан әйткәнчә, аның үлеменнән соң күп гасырлар дәвамында ялган шәкертләр «чыга» барган. Алар мөртәтләрнең тәгълиматларын, шул исәптән Троица турындагы тәгълиматны, таратканнар, ягъни Аллаһы өч шәхестән тора дип өйрәткәннәр. Ялган шәкертләр шулай ук потларга табына башлаган һәм сәяси эшләрдә катнашкан. Гайсә тәгълиматларына бик әз кеше генә тугры булып калган.

Чын иман сакланып кала

Әмма, Гайсә әйткәнчә, ахыр чиктә барысы үзгәрәчәк. Аллаһының фәрештәләре иманнары чын булмаган кешеләрне юк итәр өчен, аларны аерып куячак. Шунда чын иманлы кешеләрне билгеләү җиңелрәк булачак. Ахыр чиктә Шайтан Иблис тә — чын иманның дошманы — юк ителәчәк. Ә чын иман тантана итәчәк!

Әмма бүген чын иманга ия булган кешеләрне ничек билгеләп була? Бу сорауга җавапны без киләсе бүлектән белербез.