Гайсә үз шәкертләрен дога кылырга өйрәтә

Фарисейлар, берәр нәрсә эшләгәндә, моны кешеләрне гаҗәпләндерер өчен эшләгән. Алар һәр игелекле эшне башкалар күрерлек итеп кылган. Фарисейлар, һәркем үзләрен күрсен дип, күп халык җыелган урыннарда дога кылган. Алар синагогаларда һәм юл чатларында озын догаларны кат-кат яттан кабатлаган. Шунда халык аларны ишетә алган. Шуңа күрә кешеләр Гайсәнең әйткән сүзләренә гаҗәпләнгән. Ә ул болай дигән: «Фарисейлар дога кылган кебек дога кылма. Алар, күп сүзләр әйтсәләр, Аллаһы үзләрен хуплар дип уйлый. Ләкин бу алай түгел. Дога ул — синең Йәһвә белән шәхси сөйләшүең. Бер үк сүзләрне кат-кат әйтмә. Йәһвә син аңа эчке хисләреңне сөйләрсең дип көтә».

Гайсә болай дип дога кылырга өйрәткән: «Күкләрдәге Атабыз, исемең изге ителсен. Синең Патшалыгың килсен. Күктәге кебек, җирдә дә синең ихтыярың үтәлсен». Гайсә шулай ук көндәлек ризык, гөнаһларның кичерелүе һәм башка шәхси сораулар турында дога кылырга кирәк дигән.

«Бертуктаусыз дога кылыгыз,— дип әйткән Гайсә.— Атагыз Йәһвәдән фатиха соравыгызны дәвам итегез. Һәр әти үз баласына иң яхшысын бирә. Әгәр улыгыз сездән икмәк сораса, сез аңа таш бирерсезме? Я балык сораса, елан бирерсезме?»

Үз сүзләрен аңлатып, Гайсә болай дигән: «Сез үз балаларыгызга иң яхшысын бирә беләсез икән, Атагыз Йәһвә сезгә изге рухын бигрәк тә бирәчәк! Иң мөһиме — сорагыз». Син Гайсәнең киңәше буенча эш итәсеңме? Син нәрсәләр турында дога кыласың?