Сезгә каршы ясалган бер корал да уңышлы булмаячак
«Сиңа каршы ясалган бер корал да уңышлы булмаячак» (ИШАГЫЙЯ 54:17).
1, 2. Албаниядәге Йәһвә Шаһитләренең кичереп чыкканнары Ишагыйя 54:17 дә язылган вәгъдәнең дөреслеген ничек күрсәтә?
БЕРНИЧӘ дистә ел элек Европаның көньяк-көнчыгыш өлешендә урнашкан таулы бер илдә мәсихчеләрнең кечкенә бер төркеме булган. Бу илнең коммунистик хөкүмәте аларны юк итәр өчен бар көчен куйган. Әмма бу мәсихчеләрне җәзалау да, эш лагерьләре дә һәм масса-күләм мәгълүмат чараларының аларга ташлануы да җиңә алмаган. Кем соң бу мәсихчеләр? Бу Албаниядә яшәүче Йәһвә Шаһитләре. Бу елларда аларга бергә очрашулар үткәрү һәм вәгазьләү бик авыр булган. Әмма алар бирешмәгән, һәм бу мәсихчеләргә хөрмәт, ә Йәһвә исеменә дан китергән. Үткән елда Албаниядә яңа филиал багышланганда Йәһвәгә инде күп еллар тугры хезмәт иткән бер Шаһит болай дигән: «Шайтан күпме генә тырышса да, һәрвакыт җиңелә, ә Йәһвә һәрвакыт җиңә!»
2 Моның барысы Аллаһының Ишагыйя 54:17 дә язылган вәгъдәсе дөрес икәнен күрсәтә. Ул үз халкына мондый вәгъдә биргән: «Сиңа каршы ясалган бер корал да уңышлы булмаячак; һәм синең белән судта көрәшкән һәркайсы телне — син хөкем итәчәксең». Тарих шуны раслый: Шайтан дөньясының Йәһвә Аллаһының тугры хезмәтчеләре башкарган эшне туктатырга тырышлыклары уңышсыз.
Шайтанның уңышсыз тырышлыклары
3, 4. а) Шайтан нинди «кораллар» куллана? б) Ни өчен Шайтан кулланган «кораллар» уңышсыз?
3 Аллаһы хезмәтчеләренә каршы нинди кораллар кулланыла? Бу тыюлар, кешеләрнең һөҗүмнәре, төрмәләр һәм «законны кулланып, явызлык кылырга» (ЯД) тырышлыклар (Мәдхия 93:20). Хәзер дә, без бу мәкаләне өйрәнеп утырганда, кайбер илләрдәге чын мәсихчеләр Аллаһыга тугры булганга сынаулар аша үтә (Ачылыш 2:10).
4 Мәсәлән, Йәһвә Шаһитләренең бер филиалы хәбәр иткәнчә, Аллаһы хезмәтчеләре вәгазьләгәндә кыйналган булган, һәм бер ел эчендә андый 32 очрак теркәлгән булган. Шулай ук хокук саклау органнары 59 тапкыр Шаһитләрне — яшьләрне һәм картларны, ир-атларны һәм хатын-кызларны — кулга алган. Кайбер кардәшләрдән, җинаятьчеләрдән кебек, бармак эзләрен алганнар, аларны фотографиягә төшергәннәр һәм камерага ябып куйганнар. Башка кардәшләребезгә физик зыян китерү белән янаганнар. Башка бер илдә Йәһвә Шаһитләрен кулга алганнар, штраф салганнар, кыйнаганнар һәм андый очраклар саны 1100 дән артык булган. Бу очракларның 200 дән артыгы Гайсә үлемен искә алу Кичәсе вакытында булган. Әмма Йәһвә рухы ярдәмендә Аллаһының бу һәм башка илләрдәге хезмәтчеләре, дошманнары алардан күпкә көчлерәк булса да, исән калган (Зәкәрия 4:6). Дошманнарның нәфрәте көчле булса да, Йәһвәне мактаучылар үз эшләрен дәвам итәчәк. Аллаһы ниятенең үтәлешен туктата ала торган «корал» юк, без моңа бер дә шикләнмибез.
Ялган сөйләүче телләр хөкем ителгән
5. Беренче гасырда Йәһвә хезмәтчеләренә нинди ялган телләр каршы чыккан?
5 Ишагыйя Аллаһы халкы үзенә каршы чыккан һәркайсы телне хөкем итәчәк дип алдан ук әйткән булган. Беренче гасырда мәсихчеләрне, аларга яла ягып, еш кына явызлык эшләүчеләр итеп күрсәткәннәр. Мәсәлән, Рәсүлләр 16:20, 21 дә болай дип әйтелә: «Бу кешеләр... безгә, римлыларга, кабул итәргә дә, башкарырга да ярамаган йолаларны вәгазьләп, шәһәрдә тынычсызлык тудыралар». Икенче бер очракта дини дошманнар шәһәр хакимият кешеләрен Мәсих шәкертләренә каршы чаралар күрергә этәреп, болай дигәннәр: «Бөтен җирдә чуалыш чыгарып тынычлыкны бозып йөрүчеләр монда да килгәннәр... Алар барысы да кайсарның әмерләренә каршы чыга» (Рәсүлләр 17:6, 7). Рәсүл Паулны хәтта «бердәмлекнең чире», сектаның башлыгы һәм «бөтен дөньяда... фетнә салучы» дип атаганнар (Рәсүлләр 24:2—5).
6, 7. Чын мәсихчеләр үзләренә ташланган гаепләүләрне ничек хөкем итә?
6 Шуңа күрә безнең көннәрдә дә чын мәсихчеләр турында ялган белән гайбәтнең таралуына гаҗәпләнәсе юк. Андый һөҗүмнәрне без ничек хөкем итәбез? (Ишагыйя 54:17).
7 Йәһвә Шаһитләренең яхшы тәртибе гаепләүләр белән ялган пропаганданың дөрес түгеллеген исбат итә (1 Петер 2:12). Мәсихчеләр үзләрен законга буйсынучы һәм башкалар турында кайгырта торган югары әхлаклы кешеләр итеп тотсалар, аларга ташланган бар гаепләүләр нигезсез икәнен күрсәтәчәкләр. Без хак икәнебезне тәртибебез күрсәтә. Безнең яхшы эшләребез безне күзәткән кешеләрне еш кына күктәге Атабызны данларга һәм без барган юлның — иң яхшы юл икәнен танырга дәртләндерә (Ишагыйя 60:14; Маттай 5:14—16).
8. а) Безгә Изге Язмаларга нигезләнгән карашларыбызны кайвакыт ничек якларга туры килә? б) Гайсә үрнәге буенча, без каршы килүчеләрнең телләрен ничек хөкем итәбез?
8 Безгә шулай ук кайвакыт үзебезнең Изге Язмаларга нигезләнгән карашларыбызны кыюлык белән якларга туры килә. Мәсәлән, үз хокукларыбызны яклар өчен, без дәүләт хакимиятенә һәм судларга мөрәҗәгать итәбез (Эстер 8:3; Рәсүлләр 22:25—29; 25:10—12). Гайсә җирдә яшәгәндә кайвакыт үз гаепләүчеләренең ялган сүзләрен шунда ук фаш иткән (Маттай 12:34—37; 15:1—11). Гайсә үрнәге буенча, без үзебезнең эчкерсез карашларыбызны аңлатырга һәрвакыт әзер (1 Петер 3:15). Без мәктәптәге, эштәге, гаиләдәге мыскыллап көлүләргә Аллаһы Сүзендәге хакыйкатьләрне вәгазьләвебезне туктатырга беркайчан да юл куймаячакбыз (2 Петер 3:3, 4).
Иерусалим — «авыр таш»
9. Зәкәрия 12:3 тә «авыр таш» дип нинди Иерусалим аталган, һәм аның вәкилләре булып җирдә кем хезмәт итә?
9 Ни өчен халыклар чын мәсихчеләргә каршы чыга? Моны Зәкәрия язган пәйгамбәрлек аңларга булыша. Зәкәрия 12:3 тә: «Ул көнне мин Иерусалимны бар кабиләләр өчен авыр таш итәчәкмен»,— дип әйтелә. Монда сүз нинди Иерусалим турында бара? Монда «күктәге Иерусалим» — майланган мәсихчеләр чакырылган күктәге Патшалык турында әйтелә (Еврейләргә 12:22). Мәсих Патшалыгы варисларының кечкенә калдыгы әле дә җирдә яши. Алар үзләренең «башка сарыклар» саныннан булган хезмәттәшләре белән бергә кешеләрне, соң булганчы, Аллаһы Патшалыгының гражданнары булырга чакыралар (Яхъя 10:16; Ачылыш 11:15). Халыклар бу чакыруны кабул итәме? Йәһвә үз хезмәтчеләренә бүген ничек булыша? Бу сорауларга җавап алыр өчен, Зәкәрия язган китапның 12 нче бүлегенә игътибар итик. Бу безгә тагын да ныграк шуңа инанырга булышачак: Аллаһының майланганнарына һәм аларның тугры хезмәттәшләренә каршы ясалган бер корал да уңышлы булмаячак.
10. а) Ни өчен Аллаһы халкын эзәрлеклиләр? б) Үз юлларыннан «авыр ташны» алып куярга тырышкан халыклар белән нәрсә булган?
10 Зәкәрия 12:3 тә халыклар «имгәнәчәк» дип әйтелә. Ничек? Аллаһы Патшалык турындагы яхшы хәбәр вәгазьләнергә тиеш дигән. Йәһвә Шаһитләре бу әмергә җитди карыйлар. Әмма Патшалык — бу кешелек өчен бердәнбер өмет дип вәгазьләү халыклар өчен «авыр таш» булып киткән. Алар бу «ташны» алып куяр өчен, аны күтәрергә тырышалар: алар Патшалык вәгазьчеләренә каршы чыгалар. Әмма моның аркасында алар үзләрен «имгәтәләр» һәм зур зыян күрәләр. Халыклар уңышсыз булып чыккан һәм үз абруйларын төшергән. Чын мәсихчеләр бу дөнья төзелешенең ахыры алдыннан Аллаһының Мәсих Патшалыгы турындагы «мәңгелек Яхшы хәбәрне» вәгазьләү эшен үзләре өчен зур хөрмәт дип саныйлар, һәм халыклар аларның авызларын томалый алмаячак (Ачылыш 14:6). Африка илендәге бер төрмәнең надзирателе Йәһвә хезмәтчеләренә каршы кулланылган көчне һәм алар кичергән җәбер-золымны күреп, болай дигән: «Бу кешеләрне эзәрлекләп, сез юкка гына көчегезне әрәм итәсез. Алар беркайчан да үз карашларын үзгәртмәячәк һәм арта барачаклар».
11. Ни өчен Аллаһы Зәкәрия 12:4 тә язылган вәгъдәсенә тугры дип әйтеп була?
11 Зәкәрия 12:4 не укыгыз. Йәһвә мондый вәгъдә бирә: ул Патшалыкның батыр вәгазьчеләренә каршы көрәшүчеләрне, образлы әйткәндә, сукыр итәчәк һәм алар арасында «тәртипсезлек тудырачак» (ЯД). Ул үз сүзенә тугры булып кала. Мәсәлән, Йәһвә Шаһитләренең дине тыелган бер илдә дошманнар Аллаһы халкын рухи ризыксыз калдыра алмаган. Бер газетта Йәһвә Шаһитләре Изге Язмаларга нигезләнгән әдәбиятны үз илләренә алып килер өчен хәтта аэростатлар кулланалар дип әйтелгән булган! Аллаһы үз вәгъдәсенә тугры калган: «Мин күзләремне ачачакмын... ә халыкларның һәркайсы атын күрми торган итәчәкмен». Ачуларыннан күрми башлаган Патшалык дошманнары нинди якка барырга икәнен белми. Әмма без бер дә шикләнмибез: Йәһвә үз халкын төркем буларак саклаячак һәм аның иминлеге турында кайгыртачак (4 Патшалык 6:15—19).
12. а) Гайсә җирдә булганда нинди мәгънәдә ут яндырган? б) Майланганнарның калдыгы ничек итеп ут яндырган, һәм моның нәтиҗәсе нинди булган?
12 Зәкәрия 12:5, 6 ны укыгыз. «Яһүдия шейхлары» — Аллаһы халкы арасында күзәтү эшен башкаручылар. Алар Патшалыкның җирдәге эшләре турында кайгыртсын өчен, Йәһвә аларга ялкынланып торган ашкыну бирә. Гайсә үз шәкертләренә бер тапкыр: «Мин җиргә ут алып килдем»,— дигән (Лүк 12:49). Ул чыннан да ут яндырган. Гайсәнең ашкынып вәгазьләве ярдәмендә кешеләр өчен Аллаһы Патшалыгы иң мөһим сорау булып киткән. Яһүдләр арасында бу сорау кайнар бәхәсләр уяткан (Маттай 4:17, 25; 10:5—7, 17—20). Безнең көннәрдә дә шул ук хәл булган: «утын арасындагы янып торган утка һәм көлтәләр арасындагы утка охшаш» Мәсихнең шәкертләре рухи ут яндырдылар. 1917 елда чыккан «Тәмамланган сер»a дигән китапта христиан дөньясының икейөзле булуы ачык итеп фаш ителгән иде. Бу руханиларның ачуын чыгарган. Ә күптән түгел генә «Патшалык турындагы хәбәр» дигән сериядән 37 номерлы «Ялган диннең ахыры якын!» дигән трактат чыккан иде. Кеше Аллаһы Патшалыгы яки аның дошманнары ягында торырмы? Бу трактат күп кешеләргә сайлау ясарга булышты.
«Яһүдия чатырлары» коткарылган
13. «Яһүдия чатырлары» дигән сүзләр нәрсә аңлата, һәм ни өчен Йәһвә аларны коткарачак?
13 Зәкәрия 12:7, 8 не укыгыз. Борынгы Исраилнең бар җирләрендә чатырлар корылган булган. Аларда вакыт-вакыт көтүчеләр һәм игенчеләр яшәгән. Иерусалимга баручы дошман бу кешеләр аша үтәргә тиеш булган, шуңа күрә аларга яклау кирәк булган. «Яһүдия чатырлары» дигән сүзләр шуны күрсәтә: безнең көннәрдәге майланганнарның калдыгы, образлы әйткәндә, ныгытылган шәһәрләрдә түгел, ә ачык басуда яши. Алар Мәсих Патшалыгының эшләрен батырларча яклыйлар. Гаскәрләр иясе Йәһвә башта «Яһүдия чатырларын» коткарачак, чөнки Шайтан иң беренче итеп нәкъ аларга ташлана.
14. «Яһүдия чатырларында» яшәүчеләрне Йәһвә ничек яклый һәм ничек аларны абынудан саклый?
14 Тарихтан Йәһвәнең басудагы «чатырларда» яшәүче Патшалыкның майланган илчеләрен яклаганы күренәb. Ул аларны, Давыт патша-гаскәрине кебек, көчле һәм батыр итә, шуңа күрә алар абынмыйлар.
15. Ни өчен Йәһвә «бар халыкларны» юк итәчәк, һәм бу кайчан булачак?
15 Зәкәрия 12:9 ны укыгыз. Ни өчен Йәһвә «бар халыкларны» юк итәчәк? Чөнки алар һәрвакыт Мәсих Патшалыгына каршы чыгалар. Алар Аллаһы халкын эзәрлекләгәне өчен хөкем ителгән. Тиздән Шайтанның җирдәге хезмәтчеләре Аллаһы халкына соңгы тапкыр ташланачак, бу һөҗүм дөньяда Изге Язмаларда Һармагедун дип аталган хәл тудырачак (Ачылыш 16:13—16). Бу хәл тугач, Иң Югары Судья үз хезмәтчеләрен яклаячак һәм халыклар арасында үз исемен изгеләндерәчәк (Йәзәкил 38:14—18, 22, 23).
16, 17. а) «Ходай колларының» нинди «мирасы» бар? б) Шайтанның ташлануларына карамастан, безнең нык калуыбыз нәрсәне исбатлый?
16 Шайтан бөтен җир шары буенча хезмәт иткән Аллаһы халкының ашкынуын һәм иманын какшата алмый, аның андый «коралы» юк. Без беләбез: Аллаһының безне коткарырга көче бар, шуңа күрә безнең күңелебездә тынычлык, бу «Ходай колларының мирасы» (Ишагыйя 54:17). Безнең тынычлыгыбызны һәм рухи байлыгыбызны беркем дә урлый алмый (Мәдхия 117:6). Шайтан каршы килүләрне арттыруын һәм газаплар тагын да күбрәк булсын өчен көч куюын дәвам итәчәк. Әмма, гаепләүләргә карамастан, безнең какшамас ныклыгыбыз бездә Аллаһы рухы бар икәнен күрсәтә (1 Петер 4:14). Йәһвәнең урнашкан Патшалыгы турындагы яхшы хәбәр бөтен җир шары буенча игълан ителә. Аллаһы халкын туктатырга тырышып, каршы килүчеләр аңа, образлы әйткәндә, «ташлар» аталар. Әмма Йәһвә үз халкына, алар бу ташлардан үзләрен якласын өчен, көч бирә, һәм бу ташлар аның халкына зыян китерми (Зәкәрия 9:15). Майланганнар калдыгын һәм аларның тугры хезмәттәшләрен туктатып булмый!
17 Тиздән без Иблис һөҗүмнәреннән тулысынча азат булачакбыз. Әйе, безгә каршы ясалган бер корал да һәм безгә каршы судта көрәшкән һәркайсы тел дә уңышлы булмаячак. Бу сүзләр безгә чын юаныч бирә!
[Искәрмәләр]
a Йәһвә Шаһитләре тарафыннан бастырылган. Хәзер инде бастырылмый.
b Моның турында күбрәк белер өчен, «Йәһвә Шаһитләре — Аллаһы Патшалыгының игълан итүчеләре» (рус) дигән китапның 675—676 нчы битләрен карагыз. Йәһвә Шаһитләре тарафыннан бастырылган.
Сез ничек җавап бирер идегез?
• Шайтан кораллары уңышсыз икәнен нәрсә күрсәтә?
• Ни өчен күктәге Иерусалим «авыр таш» булып киткән?
• Йәһвә «Яһүдия чатырларын» ничек коткара?
• Һармагедун якынлашып килгән вакытта сез нәрсәгә шикләнмисез?
[23 нче биттәге иллюстрацияләр]
Шайтан һөҗүмнәренә карамастан, Йәһвәнең Албаниядәге халкы тугры калган
[25 нче биттәге иллюстрация]
Гайсә ялган гаепләүләрне фаш иткән
[26 нче биттәге иллюстрация]
Яхшы хәбәрне вәгазьләүчеләргә каршы ясалган бер корал да уңышлы булмаячак