АВЫР ЭШ. Әле дә модадамы?

Күпләр бүген Алекс кебек уйлый. Аларның авыр эш эшлисе килми. Аарон исемле бер автомеханик болай ди: «Күп кенә кешеләр кара эш аларны түбәнсетә дип саный. Алар: „Яхшырак эш тапсам, шунда ук таярмын“,— дип уйлый».

Ни өчен күпләрнең авыр эштә эшлисе килми? Бәлки, алар массакүләм мәгълүмат чараларының «идеаль» тормышка карашын үзләштергәндер. Алар балда-майда йөзеп бармакка бармак та сукмыйча яшәргә тели. Мэттью исемле бер техник хезмәткәр болай ди: «Күпләр, үзеңне тәэмин итәр өчен авыр эштә эшләсәң, әллә ни зур уңышка ирешмәссең, дип уйлый». Җыештыручы булып эшли торган Шейн исемле бер ир-ат шундый ук фикергә килгән. Ул: «Бүген эш хакы өчен тулы көн эшләргә теләүче кеше инде юк»,— ди.

Башка кешеләр исә авыр эш ярата. Алар үз тормышлары белән канәгать. Мәсәлән, Дэниел исемле 25 яшьлек төзүче: «Минемчә, авыр эш эшләсәң, зур канәгатьлек кичерерсең, ә изге максат өчен эшләсәң, шатлыгың тагы да зуррак булыр»,— ди. 23 яшьлек Андре Дэниел белән ризалаша: «Эшләү шатлык белән канәгатьлек китерә. Эшеңне киметсәң һәм ялкаулансаң, шатлыгың озакка җитмәс, ләкин ямансулы хисләргә бирелерсең».

Дэниел һәм Андре кебек кешеләр авыр эшкә уңай караш белән карарга ничек өйрәнгән? Кыскача әйткәндә, Изге Язмалардагы принциплар буенча яшәп. Изге Язмалар авыр эшнең әһәмиятен төшерми. Ул тырышып һәм көч куеп эшләүне мактап телгә ала. Аллаһы Сүзе эшләргә генә түгел, ә эшне яратырга да өйрәтә.

Изге Язмалардагы кайсы принциплар безгә эшебезне яратырга булышыр? Әйдәгез, киләсе мәкаләдән кайберләрен карап чыгыйк.