Газапларыбызда кем гаепле?

Газапларны Аллаһы китерми икән, алайса ачлык, ярлылык, мәрхәмәтсез сугышлар, йончыткыч авырулар һәм табигать афәтләре өчен кем җаваплы? Аллаһы Сүзендә — Изге Язмаларда — кешелек газапларының өч төп сәбәбе турында әйтелә.

1. Эгоизм, комсызлык һәм нәфрәт. «Кешенең башка кеше өстеннән хакимлек итүе зыян гына китерә» (Вәгазьче 8:9). Еш кына газапларны камилсез, үз-үзләрен генә яратучы һәм мәрхәмәтсез кешеләр китерә.

2. Көтелмәгән вакыттагы очраклы хәл. Башка сәбәп турында Изге Язмаларда болай дип әйтелә: «Аларның һәммәсе дә көтелмәгән вакытта очраклы хәлгә эләгә» (Вәгазьче 9:11). Бу нәрсәне аңлата? Кешеләрнең тиешсез вакытта тиешсез урында булуы, игътибарсызлыгы я дөрес булмаган адымнары фаҗигаләргә китерә ала.

3. Дөньяның явыз хакиме. Изге Язмаларда газапларның иң мөһим сәбәбе турында ап-ачык әйтелә: «Бөтен дөнья Явызның хакимлеге астында тора» (1 Яхъя 5:19). Явыз бу — Шайтан Иблис, кодрәтле рухи зат. Башта ул Аллаһының фәрештәсе булган, ләкин «хакыйкатьтән читкә киткән» (Яхъя 8:44). Шайтанга башка рухи затлар да кушылган һәм, үз нәфесләрен канәгатьләндерер өчен, Аллаһыга каршы фетнә күтәргән. Шулай итеп алар җеннәр булып киткән (Яратылыш 6:1—5). Шуннан бирле кансыз Шайтан һәм җеннәре дөньядагы вакыйгаларга нык тәэсир итә. Хәзер Иблис нык ярсый һәм, «бөтен дөньяны юлдан яздырып», җиргә күп кайгы китерә (Ачылыш 12:9, 12). Әйе, Шайтан — аяусыз хаким. Кешеләрнең газаплары аңа канәгатьлек бирә. Аллаһы түгел, ә Шайтан газапларны тудыра.

УЙЛАП КАРАГЫЗ: тик мәрхәмәтсез, рәхимсез һәм явыз шәхес кенә гаепсез кешеләрне газаплый ала. Йәһвә турында исә Изге Язмаларда: «Аллаһы — мәхәббәт ул»,— дип әйтелә (1 Яхъя 4:8). Шуңа күрә «Аллаһы өчен явызлык кылу, Чиксез Кодрәт Иясе өчен яманлык эшләү акылга сыймаслык хәл!» (Әюп 34:10)

Ләкин сездә мондый сорау туа ала: «Күпмегә кадәр Чиксез Кодрәт Иясе Аллаһы мәрхәмәтсез Шайтанга идарә итәргә рөхсәт итәр?» Күргәнебезчә, Аллаһы явызлыкны нәфрәт итә һәм газапларыбыз аңа авырту китерә. Аның Сүзендә мондый чакыру язылган: «Бар мәшәкатьләрегезне аңа йөкләгез, чөнки ул сезнең хакта кайгырта» (1 Петер 5:7). Аллаһы безне ярата һәм аның бар газапларны һәм гаделсезлекне бетерер өчен кодрәте бар. Моның турында киләсе мәкаләдә сүз барыр.a