Хәсрәт кичерүчеләрне юатыгыз
1. Ни өчен хәсрәт кичерүчеләргә юату кирәк?
1 Якын кешене югалту — бу зур кайгы, аеруча Патшалыкка өметләре булмаган кешеләр өчен (1 Тес. 4:13). Күпләр еш кына мондый сораулар бирә: «Ни өчен кешеләр үлә? Үлгәч, кеше белән нәрсә була? Мин үлгән якынымны кайчан да булса күрә алырмынмы?». Вәгазьдә туганы яки дусты үлгәнгә кайгырган кешеләрне очратканда, аларны ничек юатып була? Аста берничә киңәш китерелә (Ишаг. 61:2).
2. Кеше кайгысы белән уртаклашса, без аңа озак вәгазьләргә тиешме?
2 Өйдән-өйгә. Кеше безгә аның берәр туганы күптән түгел үлгән дип әйтергә мөмкин. Кеше кайгыга баткан булса һәм өендә кайгыручы туганнары җыелган булса, аңа озак вәгазьләмәсәк, яхшырак булыр иде (Вәг. 3:1, 7). Бәлки, без аның кайгысын уртаклашырбыз һәм яраклы трактат, журнал яки брошюра биреп, сөйләшүне әдәпле генә тәмамларбыз. Уңайлырак вакытта килеп аның белән Изге Язмалардагы юату белән уртаклаша алабыз.
3. Мөмкинлек булса, без кайгы кичергән кешегә Изге Язмалардан нинди шигырьләр күрсәтә алабыз?
3 Кайвакыт беренче килгәндә күбрәк әйтеп була. Бу вакытта ялган карашларга каршы чыгу яхшы булмаса да, бергәләп терелтү турындагы Изге Язмалар вәгъдәләрен укып була (Яхъя 5:28, 29). Яки без Изге Язмалардан кеше үлгәч аның белән нәрсә була икәнен күрсәтә алабыз (Вәг. 9:5, 10). Изге Язмалардагы терелтү турында хәбәр шулай ук кешене юатырга мөмкин (Яхъя 11:39—44). Башка мөмкинлек — рәсүл Паулның Йәһвәгә ышанычын белдергән сүзләрен карап чыгу (Рәс. 24:15). Китәр алдыннан, кешегә «Синең өчен якын булган кеше үлгәндә» дигән брошюраны яки башка яраклы брошюра я трактат тәкъдим итеп була. Яисә без «Хак тәгълиматлар» китабын калдырып, 6 нчы бүлеккә игътибар итә алабыз һәм шул теманы кабат килгәндә карап чыгарга сөйләшә алабыз.
4. Тагын нинди очракларда кешеләрне юатып була?
4 Башка очраклар. Җирләү нотыгы Патшалык Залында үткәрелгәндә, Йәһвә Шаһите булмаган кеше анда булса, аңа юатучы хәбәр язылган басмалар биреп була. Кайчакта газеталарда берәр кешенең вафат булганы турында белдерүләр языла, бу вакытта аның якыннарына кыска юатучы хат язып була. Бер тапкыр берничә трактат белән хат алгач, бер тол ир үзенең кызы белән бу хатны язган вәгазьченең өенә килеп, аңардан болай дип сораган: «Миңа сез хат җибәрдегезме? Мин Изге Язмалар турында күбрәк белергә телим!». Бу ир кеше һәм аның кызы Изге Язмалар өйрәнүенә ризалашкан һәм җыелыш очрашуларына йөри башлаган.
5. Ни өчен без кайгырган кешеләрне юатыр өчен мөмкинлекләр эзләргә тиеш?
5 Вәгазьче 7:2 дә болай дип әйтелә: «Мәҗлесле өйгә баруга караганда җеназалы өйгә бару яхшырак». Вакытны күңелле үткәрер өчен генә тыңлаган кешегә караганда, хәсрәт кичерүче Аллаһы Сүзен гадәттә теләбрәк тыңлый. Безнең һәрберебез яраткан якыннарын югалтканга кайгырган кешене юатыр өчен мөмкинлекләр эзләргә тиеш.