Пәйгамбәрләрдән үрнәк алыгыз. Йәил
1. Вәгазьләгәндә без Йәил басынкылыгын ничек үрнәк итеп тота алабыз?
1 Йәил пәйгамбәр кем булган? Ул үзен «Вафуил улы» дип кенә атый (Йәил 1:1). Бу басынкы пәйгамбәр үзенең хәбәрче роленә түгел, ә Йәһвәнең хәбәренә басым ясап сөйләгән. Бүген дә вәгазьләгәндә игътибар үзәгендә үзебезне мактау я таныту түгел, ә Йәһвә һәм Изге Язмалар булып кала (1 Көр. 9:16; 2 Көр. 3:5). Шул хәбәр безнең үзебезгә көч өстәп тора. Йәил пәйгамбәрлегендәге нинди сүзләр безгә ашкыныбрак булырга булышачак һәм өмет бирәчәк?
2. Йәһвә көненең якын булуы безне нәрсә эшләргә дәртләндерә?
2 «Йәһвә көне якын» (Йәил 1:15). Бу сүзләр берничә мең ел элек язылган булса да, без аларның ахыргы үтәлеше вакытында яшибез. Бозыла барган дөнья, территориябездәге ваемсызлык һәм мыскыллап көлүчеләр бу явыз дөнья төзелешенең соңгы көннәренең килгәнен раслый (2 Тим. 3:1—5; 2 Пет. 3:3, 4). Без ахырның якын булуын күреп торабыз, һәм бу безне вәгазь эшен беренче урынга куярга дәртләндерә (2 Пет. 3:11, 12).
3. Ни өчен бөек афәт якынлашкан саен хезмәтебез тагы да мөһимрәк булып китә?
3 «Йәһвә үз халкы өчен сыену урыны булачак» (Йәил 3:16). Бу шигырьдә күк белән җирне тетрәтү турында әйтелә. Бу тетрәтү бөек афәттә Йәһвәнең хөкемнәре үтәлгәндә булачак. Ул вакытта Йәһвә үз тугры хезмәтчеләрен саклап калачак, һәм моны белү безгә юаныч китерә (Ачыл. 7:9, 14). Вәгазь эшендә катнашып һәм Йәһвәнең үзебез турында кайгыртканын һәм безгә көч өстәп торганын күреп, без иманыбызны ныгытабыз һәм чыдамлылык сыйфатын үстерәбез. Бу сыйфатлар безгә якынлашып килә торган бөек афәт вакытында булышачак.
4. Ни өчен без шатлыклы була алабыз һәм киләчәккә ышаныч белән карый алабыз?
4 Йәил пәйгамбәрлегендә Йәһвә көне караңгылык көне дип аталса да, бу көн Аллаһы халкына коткарылган булачагына өмет бирә (Йәил 2:32). Шуңа күрә, әйдәгез, киләчәккә ышаныч белән карыйк һәм Аллаһы Патшалыгы турындагы яхшы хәбәрне ашкынып вәгазьлик. Шулай ук Йәил 2:23 тәге: «Йәһвә Аллаһыңда күңел ач һәм шатлан»,— дигән сүзләрне истә тотыйк.