Пәйгамбәрләрдән үрнәк алыгыз. Һошея
1. Сезнең үзегезгә нинди сорау биргәнегез бардыр?
1 «Мин Йәһвә хакына нинди корбаннарга әзер?» Сез Йәһвәнең чиксез игелеге һәм шәфкатьлелеге турында уйлаганда, бәлки, үзегезгә андый сорау биргәнегез бардыр (Мәд. 102:2—4; 115:3). Һошеядан фидакарьлек таләп ителсә дә, ул Йәһвәнең бар йөкләмәләрен теләп үтәгән. Без Һошеядан нинди үрнәк алабыз?
2. Һошея вәгазьләгәндә нык калуыннан ничек без үрнәк ала алабыз?
2 Авыр вакытта вәгазьләгез. Һошеяның хәбәре иң беренче чиратта ун буынлы Исраил патшалыгына юнәлгән булган. Шул вакытта хак гыйбадәт кылу анда юк ителгән булган диярлек. Йәрихәбәм патша II Йәһвә каршында явызлык эшләгән һәм Йәрихәбәм патша I керткән бозауларга табынуны мәңгегә урнаштырырга тырышкан (4 Пат. 14:23, 24). Киләсе патшалар аркасында ун буынлы патшалыкның рухи хәле тагы да начаррак булып киткән, һәм ахыр чиктә б. э. к. 740 елда шул патшалык юк ителгән булган. Ялган гыйбадәт кылу киң таралган булса да, Һошея ким дигәндә 59 ел дәвамында пәйгамбәр булып тугры хезмәт иткән. Ваемсызлык яки каршылык белән очрашып без дә, Һошея кебек, еллар буе вәгазьләргә тәвәккәлме? (2 Тим. 4:2).
3. Һошеяның тормышы Йәһвәнең мәрхәмәтлелеген ничек чагылдырган?
3 Игътибарыгызны Йәһвә шәфкатьлелегенә туплагыз. Йәһвә Һошеяга «уйнашлык кылачак хатын-кызны» үзенә хатын итеп алырга кушкан (Һош. 1:2). Аның хатыны Гомерь аңа угыл тудырган, әмма соңрак, күрәсең, уйнашлык кылып ике бала тапкан. Һошеяның үз хатынын кичерергә әзер булуы Йәһвәнең үҗәт Исраил халкына карата, алар тәүбә иткәндә, бөек мәрхәмәтен чагылдырган (Һош. 3:1; Рим. 9:22—26). Һәртөрле кешегә Йәһвәнең шәфкатьлелеге ачык күренсен өчен, без башкаларны үзебездән өстенрәк куярга әзерме? (1 Көр. 9:19—23).
4. Без Йәһвә хакына китерә алган кайбер корбаннарны әйтеп бирегез.
4 Кайбер Йәһвә хезмәтчеләре, хезмәткә күбрәк вакыт багышлар өчен, акчалы карьераны калдырган. Кайберәүләр, Патшалык эшләрен беренче урынга куяр өчен, никахка кермәскә я бала тудырмаска булган. Һошея тормышы турында уйланганда, без, бәлки: «Мин алай эшли алмас идем»,— дип уйлый торганбыздыр. Әмма безгә Йәһвәнең юмарт игелеге өчен рәхмәтле булырга һәм изге рухның көченә таянырга кирәк. Шул чакта, Аллаһы безне, Һошеяны кулланган кебек, төрлечә куллана алачак. Безнең андый юллар турында хәтта уйлаганыбыз да юктыр (Мат. 19:26; Флп. 2:13).