Пәйгамбәрләрдән үрнәк алыгыз. Михей
1. Михей нинди сорау турында уйлангандыр, ләкин ни өчен аның вәгазе бушка булмаган?
1 «Бу бозык дөнья төзелешенең ахыры кайчан килер соң?» Исраил һәм Яһүд патшалыкларына каршы Йәһвәнең хөкемнәрен игълан иткәндә, Михей пәйгамбәр дә андый сорау турында уйлангандыр. Аның вәгазе бушка булмаган. Михей көннәрендә, б. э. к. 740 елны, Йәһвәнең Самарияне хөкем итеп әйткән сүзләре үтәлгән (Мих. 1:6, 7). Соңрак, б. э. к. 607 елны Иерусалим да җимерелгән булган (Мих. 3:12). Йәһвә хөкемнәренең бүгенге көннәрдә үтәләчәген көткәндә, без Михей иманыннан нинди үрнәк ала алабыз?
2. Йәһвә көнен көткәндә, без ничек сабырлык күрсәтәбез һәм ни өчен?
2 Сабыр бул. Михей болай дип язган: «Мин исә Йәһвәдән күземне алмыйм, коткаручы Аллаһымны сабырлык белән көтәм» (Мих. 7:7). Әлбәттә, Михей ахырның килүен көтеп, кул кушырып утырмаган. Йәһвәнең пәйгамбәре буларак, ул үз вазифаларын үтәгән. Йәһвә көнен көтеп, без дә «изге тәртипле булырга һәм Аллаһыга бирелгәнлекне күрсәтүче эшләр башкарырга тиеш» (2 Пет. 3:11, 12). Йәһвәнең сабыр булуы кешеләргә тәүбә итәр өчен вакыт бирә (2 Пет. 3:9). Шуңа күрә сабырлык турында әйткәндә, «пәйгамбәрләрдән үрнәк алыгыз» дигән үгет-нәсыйхәткә без колак салабыз (Ягък. 5:10).
3. Ни өчен безгә Йәһвәнең изге рухы турында сорарга кирәк?
3 Йәһвә көченә таян. Михейның йөкләмәсе авыр булган. Аны башкарыр өчен, ул Йәһвә көченә таянган (Мих. 3:8). Йәһвә безгә көч кирәк икәнен белә, шуңа күрә ул безне Изге Язмалар аша үзеннән көч сорарга дәртләндерә дә. Йәһвә арыган кешеләргә юмартлык белән көч бирә. Шулай итеп, алар үз теократик вазифаларын үти ала (Мәд. 83:6, 8; Ишаг. 40:28—31). Сезнең үз изге хезмәтегезне башкарганда моны татыганыгыз бармы? Сез Йәһвәдән аның куәтле рухын регуляр рәвештә сорап торасызмы? (Лүк 11:13).
4. Михей безгә нинди яхшы үрнәк калдырган?
4 Михей гомер буе Аллаһының ихтыярын үтәүне беренче урынга куеп торган. Башкалар әхлакый яктан бозыла барган булса да, ул тугры калырга тәвәккәл булган. Безнең дә сафлыгыбыз һәр көн сыналып тора. Әйдәгез, «гасырлардан-гасырларга, мәңге безнең Аллаһыбыз Йәһвә исеме хакына йөрергә» тәвәккәл булыйк (Мих. 4:5).