Сукыр кешегә Йәһвә турында белем алырга ярдәм ит
1. Гайсә сукырларның хәленә ничек кергән?
1 Гайсәнең үлеменә берничә көн кала. Әрихәдән чыгып барганда, ике сукыр кеше: «Хуҗабыз, Давыт Улы, безгә шәфкатьле бул!» — дип кычкырып җибәрә. Гайсәнең уйларында гел үзен көтә торган сынаулар булса да, ул туктап кала да, аларны үзенә чакыртып савыктыра (Мат. 20:29—34). Гайсәнең үрнәгенә ияреп, без сукырларның хәленә ничек керә алабыз?
2. Урамда очраткан сукыр кешегә ничек вәгазьләргә?
2 Ярдәмеңне тәкъдим ит. Сукыр кешене берәр җирдә, мәсәлән, урамда очратканда, исәнләш, исемеңне әйт һәм ярдәмеңне тәкъдим ит. Ул башта синең изге ниятләреңне шик астына куярга мөмкин, чөнки сукырлар еш кына алдакчылар кулына эләгә. Ләкин эчкерсез булсаң һәм йомшак сөйләсәң, аның күңелен яулап алырга мөмкинсең. Шунысын истә тоту мөһим: күз күрмәүнең дәрәҗәләре төрле була, шуңа күрә кайбер сукырларга — күбрәк ярдәм, ә башкаларга әзрәк ярдәм кирәк булыр. Сукыр кешегә ярдәм күрсәткәч, үзеңнең Изге Язмаларга нигезләнгән белемне тарату эшендә катнашуыңны әйтә аласың. Аңардан берәр шигырьне, мәсәлән, Мәдхия 145:8 яисә Ишагыя 35:5, 6 ны укырга рөхсәт сора. Брайль шрифтын кулланып укый белсә, аңардан шул шрифттагы берәр басманы укып Изге Язмаларда язылганнарны беләсе киләме дип сора. Аңа шулай ук сайтыбыздан аудиоязмаларны йөкләү белән булышып була. Экраннан уку программасы урнаштырылган компьютер белән кулланса, ул, бәлки, безнең сайтыбыздагы мәкаләләрне, шулай ук RTF форматында йөкләп булган басмаларны «укырга» теләр. («Сукыр кешегә ярдәм иткәндә...» дигән рамканы кара.)
3. Сезнең якларда яшәүче сукырларны ничек эзләп табарга?
3 Сукырларны эзлә. Өйдән-өйгә йөргәндә, без сукыр кешеләрне сирәк очратабыз, чөнки алар таныш булмаган кешеләргә ишекне ачарга курка. Шуңа күрә сукырларны эзләп табар өчен һәм аларга вәгазьләр өчен күп тырышлыклар куярга кирәк (Мат. 10:11). Эштәге хезмәттәшләрең я сыйныфташларың арасында сукырлар бармы? Алар белән сөйләшеп кара. Җыелышыгыз территориягездә сукырлар өчен мәктәп булса, мәктәп китапханәсе эшчеләренә Брайль шрифтындагы кайбер басмаларны тәкъдим ит. Танышларыңның сукыр туганнары юкмы? Сезнең якларда сукырга хезмәт күрсәткән оешмалар яисә сукырлар яши торган картлар йортлары юкмы? Сукырның туганына, андый учреждениеләрдә эшләгән сәркатипкә яки директорга Йәһвә Шаһитләренең сукыр кешеләргә ярдәм итәсең килә дип әйт һәм Брайль шрифтындагы әдәбиятны яисә аудиоязмаларны алып килергә тәкъдим ит. Аңа Изге Язмаларны ачып Аллаһының сукырларның күзләрен ачарга вәгъдәсе турында сөйлә. Бәлки, аңа шулай ук сайтыбыздагы «Ул булмаса... белмим нәрсә эшләр идем» дигән видеороликны үзенең электрон җайланмада күрсәтеп була. Бу видеороликта Брайль шрифтындагы Изге Язмаларны укудан файда табучы бер сукыр ир кеше турында сүз бара. Әгәр дә син кешегә килү максатыңны әйтсәң, бәлки, берәр вакыт сукырлар белән очрашып сөйләшә алырсың.
4. Джанет белән булган очрактан без нинди сабаклар алабыз?
4 Джанет исемле бер сукыр апа-кардәш сукырлар яши торган бер учреждениегә барып килгән. Ул бер яшь хатын-кыз белән сөйләшә башлаган. Джанет аңа: «Гайсә пәйгамбәр сукырларны савыктырган, шулай итеп, ул киләчәктә бар сукырлар өчен нәрсә эшлисен күрсәткән»,— дигән. Алар Ачылыш 21:3, 4 буенча фикер алышканнар, һәм Джанет бу вәгъдәне Аллаһы Патшалыгы үтәячәк дип аңлаткан. Хатын-кыз уйланып алган да: «Минем андый сүзләрне сукыр кешедән беркайчан да ишеткәнем булмады. Яхшы күрүче кешеләр күбесенчә сукырлыкны гөнаһ өчен җәза дип саный: сукыр кеше үзе яисә аның ата-бабалары гөнаһ кылган»,— дигән. Джанет ул хатын-кызга электрон хат язып Изге Язмаларны өйрәнүне башлар һәм үткәрер өчен төп басмага сылтаманы җибәргән. Хәзер алар атнага ике тапкыр Изге Язмаларны өйрәнәләр.
5. Сукырларны Гайсә савыктырган кебек савыктыра алмасак та, ни өчен аларны кызгану мөһим?
5 Әлбәттә, без сукырларны Гайсә савыктырган кебек савыктыра алмыйбыз, ләкин без акыл күзләрен бу дөнья төзелешенең илаһы сукырайткан кешеләргә Аллаһы Сүзендәге хакыйкатьне белергә булыша алабыз (2 Көр. 4:4). Гайсә Әрихә янында ике сукыр кешенең күзен ачкан, чөнки «аларны кызганган» (Мат. 20:34). Без дә сукырларны кызгансак, аларның кайберләре сукырлыкны мәңгегә юкка чыгарачак Йәһвә Аллаһы турында белем алачак.