Тыңлаучан кешеләр өчен фатихалар

Муса пәйгамбәр әйткәнчә, Аллаһы әмерләрен үтәсәк, без аның фатихаларын күрербез (Канун 10:13; 11:27). Ни өчен без Аллаһыны тыңлыйбыз? Аның җәзасыннан курыккангамы? Юк. Аллаһының искиткеч сыйфатлары бездә аңа карата ярату тудыра. Шуңа күрә без аңа буйсынабыз һәм аны рәнҗетергә теләмибез. «Аллаһыны ярату — аның әмерләрен үтәү» (1 Яхъя 5:3).

Әмма Аллаһыны тыңлау нинди фатихалар китерә? Әйдәгез, ике якны карап чыгыйк.

1. АЛЛАҺЫНЫ ТЫҢЛАУ ЗИРӘК ИТӘ

«Мин, Йәһвә, синең Аллаһың, мин — сине үзеңнең файдаңа өйрәтүче, син барырга тиешле юлдан алып баручы Аллаһы» (ИШАГЫЯ 48:17).

Йәһвә Аллаһы, Барлыкка Китерүчебез буларак, безне яхшы белә һәм безгә тиешле җитәкчелек бирә. Дөрес карарлар кабул итәр өчен, безгә Изге Язмалардан Аллаһының әмерләре турында белергә һәм бу белемнәрне тормышыбызда кулланырга кирәк.

2. АЛЛАҺЫНЫ ТЫҢЛАУ БӘХЕТЛЕ ИТӘ

«Аллаһы сүзен тыңлап, аны үтәүчеләр бәхетле!» (ЛҮК 11:28)

Бүген миллионлаган кеше, Аллаһы Сүзе буенча яшәп, чын бәхет сизә. Мәсәлән, Испаниядә яшәүче бер ир кеше элек тиз кызып китүчән булган һәм башкалар белән, шул исәптән хатыны белән, үзен кырыс тоткан. Беркөн ул Муса пәйгамбәрнең язмаларыннан Ягъкуб пәйгамбәрнең улы Йосыфның юаш холкы турында укыган. Йосыфны коллыкка саткан булсалар да һәм нахакка гаепләп төрмәгә утыртсалар да, ул йомшак, тыныч күңелле һәм кичерүчән кеше булып калган (Яратылыш, 37—45 нче бүлекләр). Испаниядәге бу кеше болай ди: «Йосыфның мисалы турында уйлану мине юаш, игелекле һәм тотнаклы булырга өйрәтте. Бу мине бәхетле итте».

Изге Язмаларда үзебезне башкалар белән ничек тотарга кирәклеге турында җентекләп әйтелә. Бу хакта киләсе мәкаләдән белик.