Буклетлар ярдәмендә сөйләшүне ничек башлап була?

2018 елның гыйнвар аеннан башлап «Тормышыбыз һәм хезмәтебез» эш дәфтәренең беренче битендә сөйләшү планнары бастырыла. Бу планнар безгә кешегә берәр басма калдырып китәргә генә түгел, ә аның белән аралашырга булыша. Сөйләшү планнарына нигезләнгән видеоларда ничек сөйләшүне Изге Язмаларны гына кулланып башлап булганы күрсәтелә. Бу вәгазьчеләргә үз сөйләшүләрен шартларга карап үзгәртергә мөмкинлек бирә. Ләкин сорау туа: өйдән өйгә йөреп вәгазьләгәндә, безгә әдәбиятны, мәсәлән электрон вариантта, бөтенләй кулланмаскамы? Һич тә юк! Әйтик, буклетлар ярдәмендә уңышлы итеп сөйләшүне башлап була. Буклетларның һәрберсе буенча без, бер үк схема кулланып, сөйләшүне башлый алабыз:

1. Кешегә буклетның беренче битендәге сорауны биреп, китерелгән җавапларның берсен сайларга тәкъдим ит.

2. Җавап итеп икенче биттә китерелгән Изге Язмалар өзеген күрсәт. Вакыт булса, буклетның эчендә язылган кайбер мәгълүматны укып чык һәм фикер алыш.

3. Ахырда, буклетның «Ничек уйлыйсыз» дигән сүзләреннән соң китерелгән сорауны биреп, киләсе тапкыр Изге Язмалардан җавап күрсәтергә тәкъдим ит.

Яңадан килеп, калдырылган сорауга җавап күрсәт һәм фикер алыш, аннары башка сорау калдыр. Сорауларны сайтыбыздан я буклетның соңгы битендә китерелгән басмадан сайлап була. Туры килгән вакытта «Аллаһыдан иңдерелгән яхшы хәбәр!» дигән брошюраны я өйрәтү коралларыбыздан башка өйрәнү басмасын куллан.