Гаиләдә көч кулланудан зыян күргәннәр өчен ярдәм

Бөтендөнья сәламәтлек саклау оешмасы (БССО) әйтүенчә, хатын-кызларга карата көч куллану — эпидемик авыру кебек, киң таралган проблема. Моны туктатыр өчен, ашыгыч чаралар таләп ителә. Бу оешма исәпләвенчә, хатын-кызларның якынча 30 проценты үз партнерларыннан физик һәм/я сексуаль көч куллануны кичергән. Һәм БМО отчеты буенча, бер ел эчендә дөньяда һәр көн 137 хатын-кыз партнерының я гаиләдәге берсенең кулыннан үлгәнa.

Статистика гаиләдәге көч куллану проблемасы никадәр киң таралганын күрсәтә, ләкин саннар артында нинди физик һәм эмоциональ авырту тора икәнлеге күренми.

Сез үзегез я танышларыгызның берсе көч куллануны кичергән икән, Изге Язмалардагы киләсе киңәшләр сезгә ярдәм итәр.

Сез гаепле түгел

Нәрсә ярдәм итә ала?

Сез берүзегез түгел

Көч куллану юк булачак

Зыян күргән кешеләргә ничек ярдәм итеп була?

Сез гаепле түгел

Изге Язмаларда нәрсә әйтелә: «Һәрберебез Аллаһыга үзе хакында хисап бирәчәк» (Римлыларга 14:12).

Истә тотыгыз: сезгә зыян китергән кеше үз эшләре өчен үзе җаваплы.

Көчләүче үз явыз эшендә сезне гаепләсә, ул хаклы түгел. Хатыннарны кимсетү ярамый, алар яратуга лаек (Көләсәйлеләргә 3:19).

Кайчак көч куллануның сәбәбе кешенең психик авыруы, балачакта начар тәрбиясе я исерткеч эчемлекләр була ала. Ничек кенә булмасын, сезне көчләгән кеше Аллаһы алдында җаваплы. Һәм ул үзгәрергә тиеш.

Нәрсә ярдәм итә ала?

Изге Язмаларда нәрсә әйтелә: «Ниятләр... киңәшчеләр күп булганда — чынга аша» (Гыйбрәтле сүзләр 15:22).

Истә тотыгыз: үзегезгә куркыныч янаганын сизсәгез я нәрсә эшләргә белмәсәгез, башка кешеләр ярдәм итә ала.

Ни өчен сез башка кешеләрнең ярдәменә мохтаҗ? Көчләүдән зыян күргән булсагыз, сез күп нәрсәләр турында уйлыйсыздыр. Бу хәлне чишәргә теләп, сезгә мондый нәрсәләр арасында мөһимрәген сайлау авыр булырга мөмкин:

• Шәхси иминлегегез

• Балаларыгызның иминлеге

• Матди хәлегез

• Иптәшегезгә карата яратуыгыз

• Иптәшегез үзгәрсә мөнәсәбәтләрегезне саклау теләгегез

Әлбәттә, сез каушап калырга һәм борчылырга мөмкин. Кемнән ярдәм сорап була?

Ышанычлы дус я туган кеше гамәли һәм эмоциональ ярдәм күрсәтә ала. Үзегез турында кайгыртучы кеше белән сөйләшү сезгә нык ярдәм итә ала.

Көчләү янаса, ышаныч телефоны буенча шалтыратып, тиз арада ярдәм алып була. Кайнар линиядә эшләүчеләр сезгә куркынычлыктан качар өчен план төзергә булыша ала. Иптәшегез, үз проблемасын танып үзгәрергә теләсә, кайнар линия хезмәте аңа беренче адымнар ясарга булыша ала.

Ашыгыч ярдәм кирәк булганда, башка ашыгыч хезмәтләр дә, мәсәлән, табиблар, шәфкать туташлары я башка профессионаллар булыша ала.

Сез берүзегез түгел

Изге Язмаларда нәрсә әйтелә: «Йәһвәb боек күңеллеләргә якын, рухы сынык булганнарны ул коткара» (Зәбур 34:18).

Истә тотыгыз: Аллаһы сезгә ярдәм итәргә вәгъдә итә.

Йәһвә сезнең турында бик кайгырта (1 Петер 5:7). Ул күңелегездәге борчуларны һәм хисләрне аңлый. Аллаһы сезне үз Сүзе — Изге Язмалар аша юата ала. Ул сезне аңа дога кылырга чакыра. Догада сез аңардан бу хәлне чишәр өчен зирәклек һәм көч сорый аласыз (Ишагыя 41:10).

Көч куллану юк булачак

Изге Язмаларда нәрсә әйтелә: «Аларның һәрберсе үз йөзем агачы һәм үз инҗир агачы астында яшәр, аларны беркем дә куркытмас» (Микай 4:4, искәрмә).

Истә тотыгыз: Изге Язмаларда тиздән һәрберсе иминлектә яшәячәк дип вәгъдә ителә.

Йәһвә Аллаһы гына безнең бар проблемаларны тулысынча чишәчәк. Изге Язмаларда болай дип язылган: «Ул аларның һәр күз яшен сөртәчәк, һәм үлем, кайгы, ачы тавыш, авырту инде булмаячак» (Ачылыш 21:4). Ул вакытта начар хатирәләрнең эзе дә калмаячак, чөнки алар яхшылар белән алмашыначак (Ишагыя 65:17). Сез дә андый тыныч киләчәкне күрә аласыз.