Өченче бөтендөнья сугышы булырмы? Изге Язмаларда нәрсә әйтелә?

Соңгы 30 ел күп кенә кеше бөтендөнья хәле яхшыра дип уйлап яшәгән иде. Ләкин күптән түгел генә башланган вакыйгалар хәл башкарак икәнен күрсәтә.

«Израиль һәм „Хезболла“ Ливан чикләре янында бер-берсе белән атышалар. Моның сәбәбе Газада барган сугыш» («Рейтер», 2024 ел, 6 гыйнвар).
«Иран хакимлегендәге төркемнәр төрле яклардан һөҗүм итә. Бу ил шулай ук кабат атом-төш коралын ясауга кереште, Россия белән Кытай да аның союздашы булып китте. Шуңа күрә көнбатыш илләренә яңа куркыныч яный башлады» («Нью-Йорк Таймс», 2024 ел, 7 гыйнвар).
«Россия һөҗүмнәре аркасында Украина илендә тәртипсезлек арта бара» («БМО яңалыклары» 2024 ел, 11 гыйнвар).
«Кытай экономикасы үсә бара, сугыш коралы ягыннан да бу ил алдынгы ил булып китте. Шул ук вакыт Тайваньда милләтчелек рухы хөкем сөрә. Өстәвенә, Пекин белән Вашингтон арасындагы болай да киеренке мөнәсәбәтләр, тагын да начарланды. Моның барысы хәл кискен начар якка үзгәреп куярга мөмкин икәнен күрсәтә» («Джапан Таймс» 2024 ел, 9 гыйнвар).

Изге Язмаларда бүгенге дөньяның андый хәле турында берәр нәрсә әйтеләме? Моның барысы өченче бөтендөнья сугышына китерерме?

Изге Язмаларда бүгенге вакыйгалар турында алдан әйтелгән булган

Изге Язмаларда бүгенге көннәрдә илләр арасында барган берәр махсус сугыш турында әйтелми. Ләкин анда безнең көннәрдә, гомумән алганда, сугышлар булачак һәм алар аркасында «җирдә тынычлык» булмаячак дип әйтелә (Ачылыш 6:4).

Даниял пәйгамбәр китабында «ахыргы вакытта» төрле державалар бер-берсе белән көрәшәчәк дип әйтелгән. Алар өстенлек итәр өчен көрәш алып бара. Алар үзләренең коточкыч сугыш кораллары белән мактана һәм үз «хәзинәләрен» ягъни зур күләмдә акчаларын сарыф итә (Даниял 11:40, 42, 43).

Тиздән башланачак сугыш

Изге Язмалар буенча, дөнья хәле яхшы якка үзгәрер алдыннан аның хәле бик начар булачак. Гайсә пәйгамбәр болай дип әйткән булган: «Ул вакытта бөек афәт булачак. Андый афәтнең дөнья яратылганнан бирле булганы юк иде әле» (Маттай 24:21). Бу «бөек афәт» Армагеддон дип аталган сугыш белән тәмамланачак. Бу сугыш — «Чиксез Кодрәт Иясе Аллаһының бөек көнендә булачак сугыш» дип әйтелә Изге Язмаларда (Ачылыш 16:14, 16).

Ләкин Армагеддон сугышы ярдәмендә кешелек юк ителмәячәк, ә сакланган булачак. Шул сугыш ярдәмендә Аллаһы күп санлы коточкыч сугышлар булдырган кешелек идарәсен юк итәчәк. Ничек Армагеддон мәңгелек тынычлык китерәчәк? Моны белер өчен мондый мәкаләләрне укыгыз: