Мәсихче булу нәрсәне аңлата? Изге Язмаларда нәрсә әйтелә?

Бүгенге көндә күп кенә кешеләр горурланып үзләрен мәсихче дип атый, әмма аларның эшләре моны күрсәтми. Аларның кайберләре үз-үзләрен генә ярата, башкалар белән үзләрен намуссыз тота, игелекнең нәрсә икәнен дә белми. Ә кайберләре тормыш иптәшләренә хыянәт итә. Моны күреп, кешеләр: «Чын мәсихчеләр нинди булырга тиеш соң?» — дип аптырап куя.

Мәсихче булу чынлыкта нәрсәне аңлата?

Әйе, үзеңне мәсихче дип атау җиңел, әмма мәсихче дип аталу гына җитми шул. Изге Язмалар буенча, мәсихче ул — Гайсә Мәсихнең шәкерте (Рәсүлләр 11:26). Гайсә: «Минем сүзләремне тотасыз икән, сез чыннан да минем шәкертләрем»,— дип әйткән булган (Яхъя 8:31). Әлбәттә, бер кеше дә Гайсәнең сүзләрен төп-төгәл тота алмый. Ләкин чын мәсихче Гайсәнең өйрәтүләрен кабул итә һәм алар буенча һәр көн яшәргә тырыша. Кайбер мисалларга игътибар итик.

Мәсихчеләр чын ярату күрсәтә

Гайсә нәрсә дигән? «Сезгә яңа әмер бирәм: бер-берегезне яратыгыз. Бер-берегезне мин сезне яраткандай яратыгыз. Бер-берегезне яратуыгыздан барысы да сезнең минем шәкертләрем булуыгызны белерләр» (Яхъя 13:34, 35).

Гайсә нәрсә эшләгән? Гайсә бар кешеләрне чын күңелдән яраткан. Ул аларның бай булу-булмавына, дәрәҗәләренә һәм чыгышларына карап тормаган. Ул авыруларны савыктырган, ачларны тукландырган һәм хәтта кешелек өчен үз гомерен биргән (Маттай 14:14—21; 20:28).

Мәсихчеләр үзләрен ничек тота? Алар юмарт, кешеләрне аермый, кичерүчән, мохтаҗ булганнарга ярдәм итә һәм башкалар хакына корбаннарга барырга әзер. Шулай итеп алар башкаларны эчкерсез яратканнарын күрсәтә (1 Яхъя 3:16).

Мәсихчеләр намуслы

Гайсә нәрсә дигән? «Мин... хакыйкать» (Яхъя 14:6).

Гайсә нәрсә эшләгән? Ул бар сүзләрендә дә, бар эшләрендә дә намуслы булган. Ул беркайчан да үзен мәкерле тотмаган һәм кешеләрне алдамаган. Аны намуслы кеше итеп белгәннәр. Намуслы булу авырлыклар тудырса да, ул шундый булып калган (Маттай 22:16; 26:63—67).

Мәсихчеләр үзләрен ничек тота? Мәсихчеләр ялганламый. Алар салымнар түли, урламый, шул исәптән эш бирүченең вакытын да урламый (Римлыларга 13:5—7; Эфеслеләргә 4:28). Алар, үзләренә файда эзләп, башкаларны алдамый; имтиханнар биргәндә, шпаргалкалар кулланмый; төрле документларны тутырганда да, төгәл мәгълүмат яза (Еврейләргә 13:18).

Мәсихчеләр үзләрен игелекле тота

Гайсә нәрсә дигән? «Эштән йончыганнар, авыр йөк күтәреп йөрүчеләр — һәммәгез дә минем янга килегез, һәм мин җаннарыгызны яңартып җибәрермен. Минем камытымны киегез һәм миннән өйрәнегез, чөнки мин юаш, басынкы күңелле, һәм сез җаннарыгызны яңартырсыз. Минем камытым уңайлы һәм йөгем җиңел» (Маттай 11:28—30).

Гайсә нәрсә эшләгән? Ул үзен игелекле тоткан һәм ачык күңелле булган. Балалар да аңа тартылган. Гайсә боекканнарны юаткан һәм кешеләрне хөрмәт иткән (Марк 10:13—15; Лүк 9:11).

Мәсихчеләр үзләрен ничек тота? Алар башкалар белән ипле сөйләшә, сүзләре белән рәнҗетми һәм үзләрен тупас тотмый (Эфеслеләргә 4:29, 31, 32). Алар кешеләргә карата бик игътибарлы һәм ярдәмчел (Гәләтиялеләргә 6:10).

Мәсихчеләр үз тормыш иптәшләренә тугры

Гайсә нәрсә дигән? «Аллаһы кушылдырганны кеше аермасын» (Марк 10:9).

Гайсә нәрсә эшләгән? Үзе никахта булмаса да, ул тормыш иптәшләрен бер-берсенә тугры калырга дәртләндергән (Маттай 19:9). Ул никахны җимерә алган эшләрдән кисәткән (Маттай 5:28).

Мәсихчеләр үзләрен ничек тота? Алар үз ирен я хатынын рәнҗетүче эшләрдән кача (Еврейләргә 13:4). Никахта алар бер-берсенә ярату һәм хөрмәт күрсәтә (Эфеслеләргә 5:28, 33).