НИ ӨЧЕН Гайсә җиргә килгән? Ул: «Мин... Аллаһы Патшалыгы хакындагы Яхшы хәбәрне җиткерергә тиешмен, чөнки Мин шуның өчен җибәрелдем»,— дигән (Лүк 4:43). Гайсә вәгазенең төп темасы — Аллаһы Патшалыгы. Шул Патшалыкка кагылышлы дүрт якны карап чыгыйк.

1. Гайсә Патша булырга тиеш. Гайсә үзе турында ул пәйгамбәрлек ителгән Мәсих һәм Данил пәйгамбәр күренештә күргән Патша ди (Яхъя 4:25, 26). Ул үз шәкертләренә бер көн «шөһрәтле тәхеткә» утырачак һәм алар да аның белән бергә тәхетләргә утырачак дип әйтә (Маттай 19:28). Ул бу идарә итүчеләрне «кечкенә көтү» дип атый һәм «бу утардан булмаган башка сарыкларым да бар» ди (Лүк 12:32; Яхъя 10:16).

2. Аллаһы Патшалыгы чын гаделлек урнаштырачак. Гайсә ачык итеп шуны күрсәтә: Патшалык Йәһвә Аллаһының исемен изгеләндерәчәк һәм Шайтан Гадәндәге фетнәдән башлап Аллаһының исеменә төшергән бар хурлыкны юк итәчәк. Шулай итеп иң зур гаделсезлек бетереләчәк (Маттай 6:9, 10). Гайсә кешеләрне — ир-атларны да, хатын-кызларны да, байларны да, ярлыларны да — аермыйча өйрәткән. Аның төп йөкләмәсе исраиллеләрне өйрәтү булса да, ул шулай ук самареялеләргә, мәҗүсиләргә һәм башка халыкларга булышкан. Ул шул көннәрдәге дини җитәкчеләрдән аерылып торган һәм кешеләргә бертигез караган.

3. Аллаһы Патшалыгы бу дөньядан түгел. Гайсә яшәгән көннәр сәяси яктан тыныч булмаган. Аның туган җирләре белән чит ил идарә иткән. Шулай да халык аны сәяси эшләрдә катнаштырырга теләгәч, ул моңа ризалашмаган (Яхъя 6:14, 15). Бер хакимгә ул: «Минем Патшалыгым бу дөньяныкы түгел»,— дигән (Яхъя 18:36). Ә үз шәкертләренә: «Сез дөньядан түгел»,— дип әйткән (Яхъя 15:19). Ул аларга, хәтта аны яклар өчен дә, сугыш коралын кулланырга рөхсәт итмәгән (Маттай 26:51, 52).

4. Мәсих идарәсе мәхәббәткә нигезләнәчәк. Гайсә кешеләргә йөкләрен җиңеләйтергә һәм көч бирергә вәгъдә иткән (Маттай 11:28—30). Ул үз вәгъдәсен үтәгән. Ул төрле борчылулар белән көрәшер өчен, мөнәсәбәтләрне яхшыртыр өчен, мал-мөлкәт җыю тозагына эләкмәс өчен һәм бәхетле яшәр өчен ярату тулы гамәли киңәшләр биргән (Маттай, 5—7 нче бүлекләр). Ул барысын мәхәббәт белән башкарган, һәм аңа төрле кешеләр тартылган. Хәтта бик каты җәберләнгән кешеләр дә аның янына килгән, чөнки алар бер дә шикләнмәгән: Гайсә үзен йомшак һәм мәхәббәт белән тотачак. Әйе, киләчәктә Гайсә гаҗәеп Патша булачак!

Гайсәнең Аллаһы Патшалыгы турында өйрәтер өчен тагын бер бик уңышлы ысулы булган: могҗизалар. Ни өчен ул аларны эшләгән? Әйдәгез моны белик.

Инҗилнең Маттай, Марк, Лүк һәм Яхъя китапларына нигезләнгән.

АЛЛАҺЫ Гайсәгә башка кешеләрдә булмаган сәләт биргән. Гайсә бик күп могҗизалар эшләгән, һәм кешеләр моны еш кына үз күзләре белән күреп торган. Бу могҗизалар аша Гайсә шуны исбат иткән: аның камил булмаган кешеләр юк итә алмаган авырлыкларны хәл итәргә һәм дошманнарны җиңәргә көче җитәрлек. Кайбер мисалларны карап чыгыйк.

Ачлык. Гайсә ике очракта берничә икмәк һәм балык белән меңләгән кешене тукландырган. Ризык һәр кешегә җиткән һәм хәтта калган да әле. Бер тапкыр Гайсә суны шәрабка әйләндергән, бу аның беренче могҗизасы булган.

Авырулар. Гайсә «халыкны төрле авырулардан һәм чирләрдән савыктырып йөргән» (Маттай 4:23). Ул сукырлар, саңгыраулар, махау чире һәм өянәк авыруы белән авыручыларны һәм гарипләрне сәламәт иткән. Ул бар авыруларны савыктыра алган.

Афәтләр. Гайсә үз шәкертләре белән Гәлиләя диңгезе аша үткәндә, көчле давыл күтәрелгән. Аның шәкертләре куркып борчыла башлаган. Гайсә давылга: «Шаулама, тынычлан!» — дигән. Шунда ук тынлык урнашкан (Марк 4:37—39). Башка бер очракта ул давыл вакытында су өстеннән барган (Маттай 14:24—33).

Явыз рухлар. Явыз рухлар кешеләрдән күпкә көчлерәк. Йәһвәнең бу явыз дошманнары күпләрне җәфалый, һәм кешеләр бернәрсә эшли алмый. Әмма Гайсә күп тапкыр аларны кешеләрдән куып чыгарган һәм алардан курыкмаган. Ә бу рухлар аңардан курыккан һәм аның нинди хакимлеккә ия булуын белгәннәр.

Үлем. Бер кеше дә Инҗилдә «соңгы дошман» дип аталган үлемнән котыла алмый (1 Көринтлеләргә 15:26). Ләкин Гайсә тол хатынның үлгән улын һәм бер үлгән кызны терелткән. Бер тапкыр ул үзенең якынча дүрт көн үле булган кадерле дустын кайгырып елап торган халык алдында терелткән. Бу искиткеч могҗиза булган! Хәтта Гайсәнең иң начар дошманнары да аның бу могҗизасын таныганнар (Яхъя 11:38—48; 12:9—11).

Ни өчен Гайсә бу могҗизаларны эшләгән? Ул бу кешеләргә булышса да, алар барыбер үлгән бит. Әйе үлгән, әмма аның могҗизалары Мәсих Патша идарәсе турындагы бар гаҗәеп пәйгамбәрлекләрнең үтәләчәген исбат иткән. Шуңа күрә бер дә шикләнмәскә була: Аллаһы билгеләгән Патша ачлыкны, авыруларны, афәтләрне, явыз рухларны һәм үлемне юк итәчәк. Гайсә Аллаһының аңа моның өчен кирәкле көчне биргән икәнен күрсәткән.

Инҗилнең Маттай, Марк, Лүк һәм Яхъя китапларына нигезләнгән.

26. Аллаһы Патшалыгы турында вәгазьли башлый

27. Б. э. 31 Гайсә 12 рәсүлен сайлый; Таудагы вәгазе

28. Б. э. 32 Гайсә Лазарны терелтә