Беренче Тимутигә
1 Бу хатны мин, Коткаручыбыз Аллаһының һәм безнең өметебез Мәсих Гайсәнең+ әмере буенча Мәсих Гайсә рәсүле Пау́л, 2 иман юлында йөрүче улым+ Тимутигә*+ язам.
Сиңа күктәге Атабыз Аллаһыдан һәм Хуҗабыз Мәсих Гайсәдән юмарт игелек, шәфкать һәм иминлек булсын.
3 Македо́ниягә китеп барышлый, мин сине Эфестә калырга өндәгән идем, хәзер дә анда калуыңны үтенәм. Чөнки анда кайберәүләр ялган тәгълиматлар тарата, 4 төрле уйдырмаларга колак сала+ һәм шәҗәрәләрдә актарына. Син аларга алай эшләмәскә әмер бир, чөнки андый нәрсәләрнең бер файдасы да юк,+ алар тик вакытны урлаучы фаразлар гына тудыра, һәм андый нәрсәләрнең Аллаһының иманны ныгытыр өчен биргәннәре белән һич уртак ягы юк. 5 Бу әмер бездә ихлас күңелдән, саф вөҗданнан, риясыз иманнан+ килгән мәхәббәт+ булсын өчен бирелә. 6 Кайберәүләр, боларны калдырып, мәгънәсез сөйләшүләрдә катнашып йөри.+ 7 Аларның канун укытучылары+ буласы килә, ләкин алар үзләренең әйткән сүзләрен дә, үҗәтләнеп нәрсә сөйләгәннәрен дә аңламый.
8 Канунның искиткеч булуы безгә билгеле, әмма бу шулай булсын өчен аны тиешле кулланырга 9 һәм шуны танырга кирәк: закон тәкъва кешеләр өчен түгел, ә явызлар+ һәм фетнәчеләр, бозыклар һәм гөнаһ кылучылар, тугрылыксызлар һәм изге нәрсәләрне нәҗесләүчеләр, әти-әниләрен һәм кешеләрне үтерүчеләр өчен, 10 шулай ук фәхеш кешеләр,* ир-ат белән якынлык кылучы ир-атлар, кеше урлаучылар, ялганчылар, антларын бозучылар һәм файдалы тәгълиматка каршы килә торган башка бар нәрсәләрне эшләүчеләр өчен бирелгән.+ 11 Бу тәгълимат бәхетле Аллаһының үземә ышанып тапшырылган шөһрәтле яхшы хәбәренә нигезләнгән.+
12 Мин үземә кодрәт биргән Хуҗабыз Мәсих Гайсәгә рәхмәтлемен, чөнки ул мине, хезмәткә билгеләп, тугры дип санады.+ 13 Ә мин элек көфер сүз әйтүче, эзәрлекләүче һәм дорфа идем,+ шулай да миңа шәфкать күрсәтелде, чөнки үземне имансыз булганга, белмичә шулай тоттым. 14 Ләкин Хуҗабызның юмарт игелеге миңа бик мул бирелде, мин шулай ук иманга һәм, Мәсих Гайсәнең шәкерте буларак, мәхәббәткә ия булдым. 15 Мәсих Гайсә дөньяга гөнаһ кылучыларны коткару өчен килде+ дигән сүзләр хак һәм тулысынча кабул ителергә тиеш. Ә гөнаһлыларның иң гөнаһлысы — мин.+ 16 Шулай да миңа шәфкать күрсәтелде. Бу Мәсих Гайсә, мәңгелек тормыш алыр өчен үзенә иман итәчәк кешеләргә үрнәк булсын дип, миңа, гөнаһлыларның гөнаһлысына, үзенең бар сабырлыгын күрсәтә алсын өчен булды.+
17 Мәңгелек Патшасына+ — гомердән-гомергә яшәүче,+ күзгә күренми торган+ бердәнбер Аллаһыга+ — хөрмәт һәм дан мәңге булсын. Амин.
18 Тимути́ улым, сиңа бу әмерне синең хакта элек әйтелгән пәйгамбәрлекләргә нигезләнеп бирәм. Алар син көрәшне яхшы сугышчы булып алып барсын өчен,+ 19 иманыңны һәм саф вөҗданыңны сакласын өчен бирелгән иде.+ Кайберәүләр исә вөҗданнарын сакламаган, нәтиҗәдә, аларның иманнары кыяларга бәрелгән кораб кебек һәлак булган. 20 Андый кешеләр санына Һимәнә́й+ белән Искәндә́р дә керә, мин аларны Шайтанга тапшырдым:+ җәза аша көфер сүзләр сөйләмәскә өйрәнсеннәр.