Гайсә җинаятьчегә күктәге тормыш вәгъдә иткәнме?

Ни өчен андый сорау туа? Чөнки Гайсә аның белән бергә җәзалап үтерер өчен кадакланган җинаятьчегә оҗмахта яшәячәген вәгъдә иткән. Ул болай дигән: «Хак сүз әйтәм сиңа бүген: син минем белән бергә оҗмахта булачаксың» (Лүк 23:43). Кайбер Изге Язмалар тәрҗемәләрендә бу шигырь болай дип яңгырый: «Хак сүз әйтәм: бүген үк син Минем белән бергә җәннәттә булачаксың». Гайсәнең явызлык кылучы аның белән бергә күктә яшәр өчен шул ук көнне күтәрелер дип әйтәсе килмәгән. Без моны кайдан беләбез?

Әйдәгез, башта ни өчен шул җинаятьченең күктә яшәргә мөмкинлеге була алмаганын карап чыгыйк. Күктә яшәргә өмете булган кеше суга һәм изге рухка чумдырылган һәм рух белән тудырылган Гайсәнең шәкерте булырга тиеш (Яхъя 3:3, 5). Ул шулай ук Аллаһының әхлакый нормаларына туры килергә һәм намуслылык, сафлык һәм кызгану кебек сыйфатларын чагылдырырга тиеш (1 Көринтлеләргә 6:9—11). Ул җирдәге тормышының ахырына кадәр Аллаһы белән Мәсихкә тугры булып калырга тиеш (Лүк 22:28—30; 2 Тимутигә 2:12). Шул таләпләргә туры килеп кенә ул терелергә һәм җитди җаваплылык алырга — Мәсих белән бергә рухани һәм патша булып мең ел идарә итәргә — лаек булуын күрсәтә (Ачылыш 20:6).

Гайсә янындагы явызлык кылучы исә җинаятьче булган һәм җинаятьче булып үлгән (Лүк 23:32, 39—41). Әйе, Гайсәгә: «Үз Патшалыгыңа килгәч, мине исеңә төшер»,— дип әйтеп ул үз хөрмәтен күрсәткән (Лүк 23:42). Ләкин ул суга чумдырылган һәм рух белән тудырылган Гайсәнең шәкерте булып китмәгән. Ул үз тормышы белән тәкъва һәм тугры булуын да күрсәтмәгән. Бу җинаятьчегә ул күктәге Патшалыкта Гайсәнең үлемгә кадәр тугры булып калган шәкертләре белән бергә идарә итәчәген вәгъдә итү дөрес булыр идеме? (Римлыларга 2:6, 7).

Күз алдыгызга китерегез: акчагызны урлаган кеше сездән гафу үтенә. Бәлкем, сез аңа гаеп ташламаска булырсыз. Әмма аңа үз эшегезне ышанып тапшырыр идегезме я гаиләгез турында кайгыртуны аңа тапшырыр идегезме? Андый җаваплылыкны сез нык ышанган кешегә генә тапшырыр идегез. Бу очракта да шулай: күктә яшәргә өметкә ия булган кешеләр Аллаһының гадел нормалары буенча җир белән идарә итсен өчен ышанычлы булырга тиеш (Ачылыш 2:10). Явызлык кылучы үзенең соңгы минутларында эчкерсез булып күренсә дә, андый ышаныч казанмаган.

Әллә Гайсә бу җинаятьчегә ул аның белән бергә шул ук көнне күктә булачак дип әйтмәгәнме? Бу мөмкин булмаган, чөнки Гайсә үзе ул көнне күккә күтәрелмәгән. Киресенчә, ул өч көн дәвамында җир карынында, ягъни кабердә, булган (Маттай 12:40; Марк 10:34). Хәтта терелгәннән соң, күккә күтәрелер алдыннан, ул кырык көн дәвамында җирдә булган (Рәсүлләр 1:3, 9). Шулай итеп җинаятьче теге көнне үк Гайсә белән бергә күктә була алмаган.

Алайса, Гайсә нинди оҗмах турында әйткән соң? Җинаятьче, үледән терелгәч, Гайсәнең идарәсе астындагы җирдәге оҗмахта яшәячәк (Рәсүлләр 24:15; Ачылыш 21:3, 4). Оҗмах турында һәм Аллаһының таләпләре турында күбрәк белер өчен Йәһвә Шаһитләренең берсе белән сөйләшегез.