Катлаулы сорау

ТОРМЫШ һәм үлем турында күптөрле карашлар бар. Кайберәүләр, үлгәч, башка берәр рәвештә я башка берәр җирдә яшәүләрен дәвам итәчәк дип уйлый. Икенчеләре яңадан туып яшәячәкләренә ышана. Башкалар исә үлемне тормышның ахыры дип саный.

Сезнең дә бу сорауга үз карашыгыз бардыр. Ул алган тәрбиягезгә я чыгышыгызга бәйле. Үлгәч нәрсә булганы турында фикерләр шулкадәр күп булганга, бу катлаулы сорауга ышанычлы һәм төгәл җавапны кемнән я кайдан табып була?

Гасырлар дәвамында дини җитәкчеләр кеше җанының үлемсез булуына өйрәткән. Барлык киң таралган диннәрнең диярлек тарафдарлары: христианнар, индуистлар, яһүдләр, мөселманнар һәм башка дин кешеләре үлемсез җанның барлыгына ышана. Ул тәннең үлемен кичереп, рухи дөньяда яшәвен дәвам итә дип уйлый алар. Буддистлар исә кеше хисапсыз тапкыр яңадан туып, ахыр чиктә газаплардан арына һәм нирвана дип аталган рәхәтлеккә ирешә дип ышана.

Шундый ышанулар аркасында җир шарында яшәгән күпчелек кеше үлем башка дөньядагы тормышка ишек ача дип уйлый башлаган. Шуңа күрә күпләр өчен үлем яшәү циклының мөһим бер өлеше булып тора, үлем аларга Аллаһының ниятенә керә кебек тоела. Әмма Изге Язмаларда моның турында нәрсә әйтелә? Моны белер өчен киләсе мәкаләне укыгызчы. Җавап сезне гаҗәпләндерер.