Ebikorwa by’Abakwenda
7 Baitu nyakatagara omukuru* yagamba ati: “Ebintu binu mananu?” 2 Sitefano yamugarukamu ati: “Basaija inywe, ab’oruganda, bataata, muhuliirize. Ruhanga ow’ekitiinisa akabonekera isenkuruitwe Ibburahimu obu akaba ali Mesopotamiya, atakaikaire omu Harani, 3 kandi yamugambira ati: ‘Ruga omu nsi y’owaanyu kandi oruge omu banyabuzaale baawe, ogende omu nsi ei ndaakwoleka.’ 4 Hanyuma yaruga omu nsi y’Abakalidaaya* yagenda kwikara Harani. Kandi obu akaba ali oku, hanyuma ya ise kufa, Ruhanga yamuleeta omu nsi ei murukwikaramu hati. 5 Baitu atamuhe obugwetwa bwona omu nsi egi, noobu kaakuba akacweka akataito ah’okuta ekigere kye; baitu yamuraganiza kugimuha nk’obugwetwa kandi hanyuma ye agihe oruzaaro rwe,* noobu kiraaba ngu akaba atakatungire omwana. 6 Kandi Ruhanga akamugambira ngu ab’oruzaaro* rwe baakubaire banyamahanga omu nsi ey’etali yabo kandi abantu baakubafoire abairu kandi bababonabonese* kumara emyaka 400. 7 Ruhanga akagamba ati: ‘Ihanga eriribafoora bairu ndiricwera omusango, kandi hanyuma y’ebintu ebi balirugayo bandamye omu kiikaro kinu.’
8 “Ekindi, akamuha n’ekiragaano eky’okusarwa, akazaara Isaka, kandi yamusara ha kiro ekya munaana, kandi Isaka yazaara Yakobbo, Yakobbo yazaara bakuru b’enganda ikumi na ibiri. 9 Bakuru b’enganda banu bakakwatirwa Yusufu ihali kandi baamutunda omu Misiri. Baitu Ruhanga akaba ali hamu na uwe, 10 kandi yamujuna omu mihito ye yoona, yamuleetera kusiimwa n’okwoleka amagezi omu maiso ga Faraaho omukama wa Misiri. Kandi akamukoma kulema Misiri hamu n’enju ye yoona. 11 Baitu enjara ekagwa omu Misiri yoona n’omu Kanaani, haabaho omuhito mwingi kandi baisenkuruitwe tibaasobora kutunga ekyokulya kyona. 12 Baitu Yakobbo obu yahuliire ngu haliyo ebyokulya* omu Misiri, yatumayo baisenkuruitwe omurundi ogw’okubanza. 13 Omurundi ogwa kabiri, Yusufu yayemanyisa hali bagenzi be, kandi bagenzi ba Yusufu baamanywa hali Faraaho. 14 Kandi Yusufu yasindika obutumwa kweta ise, Yakobbo, hamu n’abanyabuzaale be boona kuruga omu kiikaro eki, bakaba bali 75 boona hamu. 15 Kandi Yakobbo akagenda Misiri, yafeera oku, kandi hanyuma baisenkuruitwe na bo baafa. 16 Bakatwarwa Sekemu, baaziikwa omu kituuro Ibburahimu eki akaba aguzire omu sente z’efeeza kuruga hali batabani ba Hamora, omu Sekemu.
17 “Baitu akasumi obu kakaba nikairra haihi Ruhanga kuhikiiriza omurago ogu akaba agambiire Ibburahimu, abantu bakeeyongera kukanya omu Misiri, 18 kuhikya omukama ondi ow’akaba atamanyire Yusufu obu yatandikire kulema Misiri. 19 Omukama onu akakozesa omulingo ogw’amagezi kubonabonesa baisenkuruitwe, baitu omu mulingo omubi yahambiriza bataata kulekaho abaana baabo nukwo bafe. 20 Omu kasumi ako Musa akazaarwa, akaba ali murungi hali Ruhanga* kandi bakamurolerra* kumara emyezi esatu omuka ya ise. 21 Baitu obu baamulekereho, muhara wa Faraaho yamutwara yamukuza nk’omwana we. 22 Nahabweki Musa, akatendekwa omu magezi goona aga Misiri. Amananu gali ngu, akaba ali w’amaani omu bigambo n’omu bikorwa.
23 “Obu yahikize emyaka 40, yateekerezaaho* kubungira* bagenzi be, abaana ba Isaleeri. 24 Obu yarozere omu hali bo naatwazibwa kubi, akamurwanirra yamuhorra enzigu, yaita Omunyamisiri. 25 Akateekereza ngu bagenzi be nibaija kukyetegereza ngu Ruhanga n’abajuna naakozesa omukono gwe, baitu batakyetegereze. 26 Ekiro ekyahondiireho, akaija nambere bali obu bakaba nibarwana, kandi yalengaho kubakoonyera kugarraho obusinge, naagamba ati: ‘Basaija inywe, muli b’oruganda. Habwaki nimutwazangana kubi?’ 27 Baitu ogu ow’akaba naatwaza kubi mugenzi we yamusindika, naagamba ati: ‘Nooha yakukomere kutulema n’okutucwera emisango? 28 Na nyowe noogonza kunyita nkooku oisirege Omunyamisiri kiro kya ijo?’ 29 Obu yahuliire eki, Musa yairuka yagenda omu nsi ya Midiani, yatandika kwikarayo nk’omunyaihanga kandi yazarrayo abaana babiri aboojo.
30 “Obu haarabireho emyaka 40, malaika yamubonekera omu irungu ha Rusozi Sinai omu kisaka ekirukwaka omurro. 31 Musa obu yakirozere yahunirra muno, baitu obu akaba nairra haihi kwetegereza kurungi, yahurra iraka lya Yahwe* nirigamba liti: 32 ‘Niinyowe Ruhanga w’abaswenkuru, Ruhanga wa Ibburahimu, wa Isaka na Yakobbo.’ Musa yatandika kutukumira, yaleka kurorayo. 33 Yahwe* yamugambira ati: “Juuramu enkaito zaawe, habwokuba ekiikaro nambere oyemeriire nikyera. 34 Mananu kwo mboine okubonabona kw’abantu bange abali Misiri, kandi mpuliire okusinda kwabo kandi nsirimukire okubajuna. Ija hati bunu nkutume Misiri.’ 35 Musa onu wenyini ou bakaba bangire, nibagamba bati: ‘Nooha yakukomere kuba mulemi kandi omucwi w’emisango?’ nuwe weenyini Ruhanga ou yatumire nk’omulemi kandi nk’omucunguzi kuraba omuli malaika ayamubonekiire omu kisaka. 36 Omusaija ogu akabaihayo hanyuma y’okukora ebyamahano n’obwokurorraho omu Misiri, ha Nyanja Erukutukura n’omu irungu kumara emyaka 40.
37 “Musa onu nuwe yagambiire abaana ba Isaleeri ati: ‘Ruhanga alibaimukiza nabbi ali nka nyowe kuruga omu bagenzi banyu.’ 38 Onu nuwe akaba ali omu kitebe hagati omu irungu ali hamu na malaika ayabalize na uwe ha Rusozi Sinai, kandi nuwe yabalize n’abaisenkuruitwe kandi yaheebwa ebigambo ebirukwera ebitahwaho nukwo abituhe. 39 Baisenkuruitwe bakanga kumworobera baamunaga kuli kandi omu mitima yabo bakeegomba kugaruka Misiri, 40 nibagambira Aroni, bati: ‘Tukorre baruhanga batwebembere habwokuba titumanyire ekihikire hali Musa onu, ayatwebembiire kuruga omu nsi ya Misiri.’ 41 Nahabweki bakakora enyana omu biro ebi, kandi baaleeta ekihongwa hali ekibumba eki kandi baatandika kwegondeza omu mirimo ey’engaro zaabo. 42 Nubwo Ruhanga yahinduka yabarugaho, kandi yabaleka baramye ihe ery’omu iguru, nkooku kyahandiikirwe omu kitabu kya banabbi ngu: ‘Inywe enju ya Isaleeri, ebisoro ebisazirwe n’ebihongwa, mwabihaga nyowe omu myaka 40 ei mwamazire omu irungu? 43 Baitu mukahimba eheema ya Moleki* n’enyunyuuzi ya ruhanga Refani, ebisisani ebi mwakozere nukwo musobole kubiramya. Nahabweki ndibatwara omu bunyagwa kuhingura Bbabburooni.’
44 “Baisenkuruitwe bakaba baine eheema ey’obwakaiso omu irungu, nkooku Ruhanga yaragiire Musa okugikora naasigikirra ha mulingo ogu akaba arozere. 45 Kandi baisenkuruitwe bakagitunga baagireeta hamu na Yosuha omu nsi ey’ekaba erumu amahanga agayabingire omu maiso ga baisenkuruitwe. Kandi ekaikara oku kuhikya omu biro bya Daudi. 46 Akasiimwa omu maiso ga Ruhanga kandi yasaba aheebwe omugisa ogw’okutungira Ruhanga wa Yakobbo ekiikaro eky’okwikaramu. 47 Baitu Suleimaani nuwe yamwombekiire enju. 48 Baitu ogu Anyakuli Haiguru Muno taikara omu maju agakozerwe n’emikono nkooku kyagambirwe nabbi ngu: 49 ‘Iguru nikyo ekitebe kyange kandi ensi nuko akatebe k’ebigere byange. Nju ya mulingo ki ei mulinyombekera? Agambire Yahwe.* Rundi ekiikaro kyange eky’okuhuumurramu kiri nkaha? 50 Omukono gwange gutakole ebintu ebi byona?’
51 “Inywe abasaija abagumangaine kandi abatasazirwe omu mitima n’amatu, mwikara nimuhakaniza omwoyo ogurukwera; nk’abaisenkuruinywe oku baakozere, na inywe nukwo mukora. 52 Nabbi ki baisenkuruinywe ou batarahiganiize? Ego, bakaita abo abaarangire kara okwija kw’ogu ow’ahikiriire, inywe ou mwagobiize kandi mwaita, 53 inywe abaatungire Ebiragiro* ebyabahairwe kuraba omuli bamalaika, baitu timubyorobiire.”
54 Obu baahuliire ebintu binu, baabiihirwa* muno omu mitima yabo kandi baatandika kumunenera ensaya. 55 Baitu Sitefano, aijwire omwoyo ogurukwera, yahanga amaiso ge omu iguru kandi yarora ekitiinisa kya Ruhanga n’ekya Yesu ayemeriire ha mukono ogw’obulyo ogwa Ruhanga, 56 kandi yagamba ati: “Dora! Nindora iguru likingwirwe kandi Omwana w’omuntu ayemeriire ha mukono gwa Ruhanga ogw’obulyo.” 57 Obu baahuliire eki, baatokera haiguru baasweka amatu gaabo n’ebiganja byabo kandi boona hamu baamweseesaho. 58 Hanyuma y’okumunaga aheeru y’orubuga, baatandika kumuteera amabaale. Bakaiso baateeka ebijwaro byabo ebya haruguru ha bigere by’omusigazi arukwetwa Saulo. 59 Obu bakaba nibateera Sitefano amabaale, akesengereza naagamba ati: “Yesu, Mukama wange, ninkukwasa obwomeezi* bwange.” 60 Hanyuma y’okuteeza amaju, yakunga n’iraka erikooto naagamba ati: “Yahwe,* otabajunaana habw’ekibi kinu.” Hanyuma y’okubaza ebi, yagwijagira omu kufa.