Ebbaruha ya Paulo ey’Okubanza Hali Timoseo
5 Otahana omusaija omukuru n’ekiniga. Baitu obaze na uwe omu mulingo ogw’embabazi nka so, hali abasaija abato nka bagenzi baawe, 2 hali abakazi abakuru nka bamaama, hali abakazi abato nka banyaanyoko, omu burukwera bwona.
3 Ofeehoga* abo abali bafaakati kwo.* 4 Baitu kakuba omufaakati aba aine abaana rundi abaijukuru, leka babanze beege kwemarra hali Ruhanga omu maka gaabo kandi bahe bazaire baabo, baisenkurubo na banyinenkurubo ebibasemeriire, habwokuba kinu nikisiimwa omu maiso ga Ruhanga. 5 Omukazi anyakuli mufaakati kwo, kandi alekerweho ataine bukoonyezi bwona, ataire okunihira kwe omuli Ruhanga kandi naagumizaamu naayesengereza kandi naasaba ekiro na nyamusana. 6 Baitu ogu ow’aikara naahondera okwegomba kwe okw’omubiri,* aba afiire noobu kiraaba ngu ali mwomeezi. 7 Nahabweki, ikara noobaha oburagirizi bunu* nukwo hatabaho eky’okubajunaana. 8 Amananu gali, omuntu weena kakuba aba atarukurolerra abe, kukira muno abo ab’omu ka ye, aba ayehakaine okwikiriza, kandi aba ali mubi muno kukira omuntu ow’ataine okwikiriza.
9 Omufaakati tasemeriire kuteekwa ha rukarra atakahikize emyaka 60, asemeriire kuba akaba aine omusaija omu, 10 amanyirwe nk’ayakoraga ebikorwa ebirungi, akooroora abaana be kurungi, yayolekaga amakune, yanaabyaga ebigere by’abarukwera, yakoonyeraga abarukubonabona, kandi yayekambaga kukora buli mulimo gwona omurungi.
11 Ha rubaju orundi, abafaakati abato mutabata ha rukarra, habwokuba okwegomba kwabo okw’okuteerana kwija hagati yabo na Kristo, kandi bagonza kutaaha obuswere. 12 Kandi balicwerwa omusango habwokuba balekere okwikiriza oku bakaba baine ha kubanza.* 13 Obwire nubwo bumu bakatunga engeso ey’okuba aho bataine eky’okukora, nibandaara omu maju g’abandi, ego hatali kutaba n’ekyokukora kyonka, baitu baba n’orugambo kandi nibeetaahya n’omu nsonga z’abandi, nibabaza ebintu ebi batasemeriire kubazaaho. 14 Nahabweki, ningonza abafaakati abato baswerwe, bazaale abaana, barolerre amaka gaabo, nukwo bataha omuhakanizi omugisa ogw’okusigikirraho kutubazaaho kubi. 15 Amananu gali, bamu bahindukire baahondera Sitaani. 16 Kakuba omukazi weena omwikiriza aba aine abanyabuzaale abanyakuli bafaakati, abakoonyere, ekitebe kiteetweka omugugu. Nukwo ekitebe kisobole kukoonyera abo abanyakuli bafaakati kwo.*
17 Abagurusi* abeebembera omu mulingo omurungi, bateekwemuga muno ekitiinisa kukira muno, abo abeekamba omu kubaza n’omu kwegesa. 18 Habwokuba ekyahandiikirwe kigamba kiti: “Otaliboha omunwa gw’enimi, obu erukuba neehuura,” kandi ngu; “Omukozi asemeriire kuheebwa empeera ye.” 19 Otaikiriza ebi barukujunaana omugurusi* rundi buli nibisigikirra ha bwakaiso obw’abantu babiri rundi basatu. 20 Abo abakora ebibi, obahanege omu maiso g’abantu boona, nukwo abandi na bo barorreho.* 21 Ninkuragira omu maiso ga Ruhanga na Kristo Yesu hamu na bamalaika abakomerwemu, kuhondera oburagirizi bunu otarukugwera orubaju rundi kusoroora.
22 Otanguhiriza kutaho omusaija weena emikono;* noobu kwakuba kwetaba omu bibi by’abandi; oikalege oli arukwera.
23 Otongera kunywa amaizi,* baitu onywege amaarwa make habw’enda yaawe na habw’oburwaire obu oikara nootunga.
24 Ebibi eby’abantu abamu byeyoleka omu rwijwire ekibaleetera kucwerwa omusango ahonaaho, baitu eby’abantu abandi byeyoleka hanyuma. 25 Omu mulingo nugwo gumu, ebikorwa ebirungi byeyoleka omu rwijwire, n’ebyo ebiteeyoleka omu rwijwire, tibisobora kwikara biserekerwe.